Read Biete 1 RÊNGHEI 2 Bible Online

1 RÊNGHEI 2 - Biete bible

1 RÊNGHEI 2

¹Davida thi rang zoro a hong nâi tâk a, a naipa Solomona kha a koi a,

²thu archa a, a ziangah, “Rinêng chung dân angkan ki thi rang zoro a hong nâi tâk a. Irât takkan om inla, pansal takkan om roh.

³PUMAPA ni Pathianin itho ranga thu nang ai pêk chu tho roh. Mosia dân bua riziak angkan a dânhei murdi neh a thupêkhei murdi hi zôm roh; khanchu, ni fena kipah neh ni sintho tinah thluantlung ni ti.

⁴A thu ni zômin chu PUMAPA khan ki zianga, ‘Ner chihein an lungril murdi neh an ringna murdia iamom takka ki thupêkhei izôm ranga an om dân an ridînin chu Israelhei rêngṭhungmuna ṭhung rang risam no tin e,’ itia a îsîr kha a îndet rang a nit.

⁵“Khabanah khan Zeruii naipa Joaba ne tho zia, Israelhei sipai ruaitu inikah Nera naipa Abnera neh Jethera naipa Amasa hei ithat a, ki chunga a tho ziahei kha ni riat a. Khangkana ringei lâi takin ridoi lâi angkana thisen phuba a lâka, anni ruai a that tlia kha nî riat a nit. Mi ningsiat sin ino thisen kha ki konga kongkhit angkan neh ki kea pheikok angkana a ne înpêl tâk a nit.

⁶A chunga ni tho rang dân chu ni riat a, a lu-ah kêlmul iṭoi hi thlânah thlangam takkan infe tlak no roh.

⁷“Khannisela, Gilead mi, Barzilaia naihei chungah khan chu lungkhamna inlang inla, anni kha iṭha takkan donsui roh; nen zirpuipa Absaloma ata lâizâm ki tho lâiah khan lung an ne lei înkham a nit.

⁸“Behurim khuaa mi Benjamina richi, Gera naipa Simeia hi a om sa a. Ani khan Mahanaim munah ki fe lâiah khan natinsat takkan vâni a ne sâm a; khannisela, Jordanah ne don rangin a lei zuang a, amakhan, ‘Khandaiin nang that no ning e,’ itin PUMAPA riming ichingin a ziangah ṭong ker khâm tâk a.

⁹Khannisela, thiam ichangin isua tlak no roh. Mi vâr ni nit a, a chungah ingkana tho rang im ai nit iti chu riang ni ti. A lu-ah kêlmul iṭoi kha thisen neh thlânah nen fe rang a nit,” a ti a.

¹⁰Davida chu a thi tâk a, Davida khopuiah an phûm a.

¹¹Israelhei chunga Davida inlal sung chu kum sômilikah a nit, Hebron khuaah kum sarikah ân lal a, Jerusalem khuaah kum sômithumkah neh kum ithumkah a înlal a nit.

¹²Solomona chu a pa Davida rêngṭhungmunah khan â ṭhung a; a ram chu iṭha takka indetin a hong om tâk a.

¹³Khanungchu, Hagithi naipa Adonija kha Solomona nu Bathsebi ziangah a fe a. Ani khan, “Iṭha tiang thua hong im nî nit?” a ti a. Adonija khan, “O, iṭha tiang thua a nit,” a ti a.

¹⁴Khanungchu, “Ni ziangah im manih iti rang kî nei a nit,” a ti a. Ani khan, “Im ai nit,” a ti a.

¹⁵Khante, Adonija khan, “Keimah hi rêng ichang rang ki nit a, Israelhei murdi khom hin an ne ithlîr ṭian a nit iti ni riat a. Nikhomsela, a nit no lamin thil arhêl tâk a, PUMAPA lungdo a nit sikin ken zirpuipa rêng ai chang tâk a nit.

¹⁶Atûnah hin thil khatkah nang ingên rang ki nei a, ṭhat ne tipui loiin om tlak no roh,” a ti a.

¹⁷Bathsebi khan, “Im ai nit?” a ti a. Adonija khan, “Ringaiihoi takkan Rêng Solomona ne sôn pêk inla, ni thu chu nial tlak no nih kî riat a nit, Sonam mi Abisagi hi nupuiin nen nei riseh,” a ti a.

¹⁸Khante, Bathsebi khan, “O a ṭhat rêng chu nang lei isôn pêk ki ti,” a ti a.

¹⁹Khanchu, Bathsebi kha Adonija rithûla va sôn pêk rangin Rêng Solomona ziangah khan a fe tâk a. Rêng kha a nu lôm rangin a thoi a, a nu makungah khan â khûn a. Khanungchu, a rêngṭhungmunah â ṭhung a, a nu rangah khan rêngṭhungmun khatkah a hong indo sa a; â changtiangah khan a nu kha ân ṭhung tâk a.

²⁰Khanchu, Rêngpa nu khan, “Thil ichînte khatkah nang ingên rang kî nei a nit; ṭhat ne tipui loiin om no roh,” a ti a. Rêng khan, “Enu im ai nit; ṭhat nang tipui loiin om no ning e,” a ti a.

²¹Khante, ani khan, “Sonam mi Abisagi hi nen zirpuipa Adonija nupuiin innei roh,” a ti a.

²²Rêng Solomona khan a sâm a, a nu ziangah khan, “Îtho sika Sonam mi Abisagi hi Adonija ranga ngên pêk im ni nit hi? Rêngṭhungmun khom hi ngên pêk ngân ta roh ba; ani kha ki ulianpa kêng ai nit, thiampu Abiathara neh Zeruii naipa Joaba khom a tianga ṭang an nit khateh,” a ti a.

²³Khanungchu, Solomona khan PUMAPA riming ichingin ṭong arkhâm a, “Adonija thil ngên hin ama chungah thina thu sîr a nit noa a nitin chu Pathianin ai lo lo ne lo riseh, kha nêka natinsat khomin kuttum ne tho riseh.

²⁴Ki pa Davida rêngṭhungmunah idet takkan PUMAPA khan a nen ṭhung tâk a, a ṭonginkung angkan rêng ram chu keimah neh ker chihei ziangah a ne ipêk tâk a nit. PUMAPA ringna chingin kî ti a nit, vuanah hin Adonija chu a thi ngêt rang a nit,” a ti a.

²⁵Khanchu, Rêng Solomona khan Jehoiada naipa Benaia kha a tir a, ani kha a fe a, Adonija chu a va that tâk a.

²⁶Khanungchu, Rêng Solomona khan thiampu Abiathara ziangah, “Anathot khuaa nangma in neh loiah ro ta roh. Ithi inrup pial chu ni nit a; khannisela, ki pa Davida ziangah ni om lâia PUMAPA Thuthlung Bôm enkoltu ni lei nit sikin neh ki pa dengthei tuangna murdi lei itlângpuitu ni nit sikin atûn chu nang la that hi no ning e,” a ti a.

²⁷Khanungchu, Solomona khan Abiathara chu PUMAPA thiampu a nitna ân ringam tâk a. Khanchu, PUMAPA khan Silo khuaa thiampu Elia neh archihei chungchâng thu a îsîr kha a îthlun indik a nit.

²⁸Khante, kha thu khah Joaban a riat a. Joaba kha Absaloma tiang chu lei ṭang mak a; khannisela, Adonija tiang chu a lei iṭang a nit. Khanchu, Joaba kha PUMAPA Puan-Inah â tlân a, mâichâm rikîhei kha â tûk tâk a.

²⁹“Ritongna Puan-Inah Joaba â tlân a, mâichâm kôlah a om,” itin Rêng Solomona an iril a. Rêng Solomona khan Joaba ziangah, îtho sika mâichâmah a îtlân lût im hang ridon rangin mi a tir a. Joaba khan Solomona a ṭi sika PUMAPA ziangah a îtlân lût a nit iti a lei iril a. Khanchu, Rêng Solomona khan Jehoiada naipa Benaia kha Joaba hang ithat rangin a tir a.

³⁰Benaia kha Ritongna Puan-Inah a hang fe a, Joaba ziangah, “Rêngin zuang suak riseh, nang a ti,” a ti a. Joaba khan, “Zuang suak no ning e, ki thi le khom hin thîng ki ti,” a ti a. Benaia kha rêng ziangah a kîr nôk a, Joaba thu tihei kha rêng â ril a.

³¹Khanchu, rêng khan Benaia ziangah, “A ti lam angkah khan hang that inla, phûm roh; khanchu, mi ningsiat sin ino Joaban ai thathei thisen ata kha keimah neh ki pa insungkuahei hi kin irlîm thei rang a nit.

³²Ki pa Davida riat loia mi ai thathei sikah khan PUMAPA khan Joaba chu kuttum tho riseh. Ama nêka mi fel ual neh ṭha ual mi inikah Nera naipa Abnera, Israelhei sipai ruaitu neh Jethera naipa Amasa, Judahei sipai ruaitu kha ai that a nit.

³³An thisen chu Joaba lu chungah neh archihei lu chungah kumkhuakan bâng mai riseh. Khannisela, Davida richi a rêngṭhungmuna ṭhunghei chungah chu PUMAPA zianga rithoka thlangamna kumkhuakan om mai a ti,” a ti a.

³⁴Khanchu, Benaia kha Ritongna Puan-Inah khan a fe a, Joaba chu a that a, ramchâra ama ramah khan an phûm tâk a.

³⁵Khante, rêng khan Benaia chu Joaba rithûlin sipai ruaitun a siam a, thiampu Zadoka chu Abiathara rithûlin a sia tak a.

³⁶Khanungchu, rêng khan Simeia kha a koi a, a ziangah, “Jerusalemah hin in sin inla, amakhan om inla, khopui mah no roh.

³⁷Khopui ata ni suak a, Kidron vadung ner kan nî takin chu nî thi ngêt ngêt rang a nit. Ni thisen chu nangma lu chung ngêiah om a ti,” a ti a.

³⁸Simeia khan rêng ziangah, “A ṭhat rêngpa, ki pun ni ti lam angkah takin ni bôi hin thông ki ti,” a ti a. Khanchu, Simeia chu Jerusalemah isôt iankah a om tâk a.

³⁹Kum ithumka nungah chu Simeia suakhei lâia inikah kha Gath khua rêng Maaka naipa Akisa ziangah lâizâm an tho a. Simeia khan a suakhei kha Gath khuaah an om iti a riat a.

⁴⁰A thoi a, a sakuartung ân rifûk a, a suakhei izong rangin Gath khuaa Akisa ziangah khan a fe tâk a. A suakhei chu a hang mu a, Gath khua ata kha a inah a ṭhui nôk a.

⁴¹Simeia chu Jerusalem khua ata a suak a, Gath khuaah a va fe a, a hong kîr nôk iti Solomonan a riat a.

⁴²Simeia kha ân koi a, a ziangah, “Jerusalem mah tlak loi rangin PUMAPA riming ichingin ṭong nang ki înrikhâm a nit a. Ni suak nî takin nî thi ngêt ngêt rang a nit itin nang ke ril a. Kha thu khah nang khomin izôm rangin ni îpom a nit kha.

⁴³Îtho sika PUMAPA riming ichinga ni ṭongrikhâm neh thu nang kî pêk kha len loia om im nî nit?

⁴⁴Ni lungril siatzia, ki pa Davida chunga ni thoziahei kha ni riat riai a; khasikin, PUMAPA khan ni siatna hi nangma lu chung ngêiah zuang iṭhum a ti.

⁴⁵Khannisela, kei chu ṭhat ne vur a ta, Davida rêngṭhungmun chu PUMAPA maah kumkhuaka indet nîng a ti,” a ti a.

⁴⁶Khanungchu, rêng khan Benaia kha thu a pêk a, ani kha a suak a, Simeia chu a va that tâk a. Khante, ram chu Solomona kutah khan indetin a om tâk a.