Read Biete 1 RÊNGHEI 20 Bible Online

1 RÊNGHEI 20 - Biete bible

1 RÊNGHEI 20

¹Suria rêng Benhadada khan a sipaihei murdi a bûm a; rêng sômithumkah inikahei khomin an sakor neh tâlihei iṭhuiin an ṭangpui a. Samaria khua a hang hual a, a hang doi tâk a.

²Ani khan khopui sungah mi a tir a, Israel rêng Ahaba ziangah khan, “Benhadadan hingka hin a ti,

³‘Ni tangka neh ni rângkachakhei, ni nupuihei neh ni naihei, nin rêngkan ki ziangah hong ripeh riai rei,’ a ti,” an ti a.

⁴Israel rêng Ahaba khan a lei sâm a, “O rêng inthang epu, ni ti lam angkah khan keimah neh kî nei murdi chu ni ta a nit,” a ti a.

⁵Khante, Benhadada mi tirhei kha itôika nungah khan an hong nôk a, “Benhadadan hingka hin a ti, ‘Ni tangka hei, ni rângkachak hei, ni nupuihei, ni naihei ni ne pêk rang a nit, itin mi ki hong tir tak a.

⁶Nikhomsela, naktûk hingka tik hunah hin ki milianhei ni ziangah hong tir ki ta, ni in neh ni milianhei in kha khuruk thông an ta; khante, an mit ila kangân chu lâng an ta, zuang chôi riai an ti,’ a ti,” an ti a.

⁷Khanchu, rêng Ahaba khan a rama ruaituhei murdi khah a koi a, “Lei ringai ta u, hi mi hin thil ṭhano tak itho a tum zia hih. Ki ziangah mi a hong tir a, ki nupuihei, ki naihei, ki tangka hei neh ki rângkachak hei a hong ngên a, ki lei isêl khom ni mak a,” a ti a.

⁸Ruaituhei murdi neh mipuihei murdi khan a ziangah, “Lei uksak non la, lei nuam pêk no roh,” an ti a.

⁹Khanchu, Ahaba khan Benhadada mi tirhei ziangah khan, “Rêng inthang ki pu ziangah khan, ‘Ni bôi zianga mi tir a, ni hong ingên masa murdi kha chu ke pom a; khannisela, â nikna angkah hin chu tho thei no ning e, a ti,’ ti pêk rei,” a ti a. A mi hong tirhei kha an kîr nôk a, kha thu khah an va thlun a.

¹⁰Benhadada khan a hong tir nôk a, “Samaria khua inuai chit rangin ki mihei hong tir ki ta, an kutin înrinôi chit an ta îte zua no nih. Khangkan ki tho non chu pathianhein ne that zel riseh,” a ti a.

¹¹Rêng Ahaba khan a sâm a, “Râlpa dik takin chu râltuk zoiin kêng an lar loi ngai, a phaman riloih ngai mak e, a ti itin rêng Benhadada kha va ril rei,” a ti a.

¹²Amah neh arthloppui rênghein puan inah munka zu an lei in lâiin kha thu khah Benhadada khan a lei riat a; khanchu, a mihei ziangah khan, “Khopui idoi rangin risiam rei,” a ti a. Khanchu, khopui idoi rangah khan an risiam tâk a.

¹³Kha lâi ngirah khan zânthla khatkah hi Rêng Ahaba ziangah a va fe a, a ziangah, “PUMAPA khan, ‘Kha sipai itam takhei kha ṭi no roh. Vuanah hin nêna nang kî pêk rang a nit; khanchu, keimah PUMAPA chu ki nit iti riang ni ti,’ a ti,” a ti a.

¹⁴Ahaba khan, “Tûm â rui rang?” a ti a. Zânthla khan, “PUMAPA khan hingkan a ti, ‘Ram bial dang dang optu nuaia tlangvâl sipai rithlang suakhei khan irui an ti,’ a ti,” a ti a. Khanchu, Rêng khan, “Tûm ma ruai rang,” a ti a. Zânthla khan a sâm a, “Nangman,” a ti a.

¹⁵Khanchu, Rêng khan ram bialheia ruaituhei nuaia tlangvâl sipaihei kha a koibûm a, an rêngkan rizanikah sômithumkah inikah an nit a. Khanungchu, Israelhei sipai murdi a bûm nôk a, sângsarikah an nit a.

¹⁶Sûnlâi takah hin an va suak a, Benhadada neh arthloppuitu rêng sômithumkah inikahei kha an puan inheia zu an lei inrui lâi tak a nit a.

¹⁷Ram bialheia ruaituhei tlangvâl sipaihei kha an va suak masa a. Khante, Benhadada khan râl enthlâttu ai tirhei khan, “Samaria khua rithoka hong isuak an om e,” itin an iril a.

¹⁸Ani khan, “Ringei ituma hong an nit khomin, a nit nole ridoi ituma hong an nit khomin an iring pumin lei man rei,” itin thu a pêk a.

¹⁹Tlangvâl sipaihei khan ma an hong iruai a, an inung kha Israel sipaihei khan an hong zui a.

²⁰An bitum chit kha an va that a; khanchu, Suriahei kha lâizâm an tho tâk a, Israelhei khan an rizûl a; khannisela, Suria Rêng Benhadada kha sakor chunga chuangin sakor chungchuang mihei neh an itlân suak tâk a.

²¹Rêng Ahaba khan phûlah a va pan a, sakor neh tâlihei khah a va doi a, Suriahei kha a that ok a.

²²Khanungchu, zânthla khan rêng Ahaba kha a va nâi a, a ziangah, “Kîr nôk tan la, ni sipaihei siam inpung inla, ni tho rang dân ngaitua roh, kum a hong vunah hin Suria rêng khan nang a hong idoi nôk ngêt rang a nit,” a ti a.

²³Rêng Benhadada milianhei khan a ziangah, “Israelhei Pathian hi tlâng Pathian a nit a; khasikin, Israelhei khan an ne înê a nit. Khannisela, phâizôlah ei doiin chu ei înê ngêt rang a nit.

²⁴Atûnah hin hingka hin tho roh; rêng sômithumkah inikahei hi an thuneina pai pêk riai inla, an rithûlin ram optu danghei seh roh.

²⁵Khanungchu, sipaihei, sakor neh tâli ni îchân tâk zâkah kha sipai inding ṭha nôk inla; khanchu, phâizôlah hang doi ei ta, anni chu inê ngêt ei ti,” an ti a. Rêng Benhadada khan an roisakpui kha â pom a, khangkah khan a tho tâk a.

²⁶A kum nôka chu Benhadada khan Suriahei kha a bûm a, Israelhei idoi rangin Afek khuaah an hang fe a.

²⁷Khante, Israelhei khom kha an ribûm a, an rifo a, an rithok suak a, lôm inikan Suriahei idepah ṭangmun an va khuar a. Israel mihei kha kêl lôm iroitete lôm inika angkah teah hin an ilang a, Suriahei kha chu a ram phêk an idâp riai a nit.

²⁸Zânthla kha rêng Ahaba ziangah a fe a, a ziangah, “PUMAPA khan hingka hin a ti, ‘Suriahein PUMAPA chu itlâng Pathian a nit a, phâi Pathian chu ni mak e, an iti a nit; khasikin, hi mipui itam takkahei hi ni kutah nang kî pêk rang a nit. Khanchu, keimah hi PUMAPA chu ki nit iti riang ni ti,’ a ti,” a ti a.

²⁹Sûn sarika sung chu Suriahei neh Israelhei kha ma risongin an ṭangmunah khan an om mai a. A sûn sarinin chu an ridoi tâk a; Israelhei khan Suriahei kha sûnka sungin sipai nuaikah an that a.

³⁰A la zôkhei kha Afek khopui sungah an itlân lût a, amakhan mi sînginikah neh sângsarikah khopui kulpui ichimin a del that a. Benhadada khom khopui sungah khan lâizâm a tho a, insung chontan inril takah a lût a.

³¹A milianhein a ziangah, “Ringai ta, Israel rênghei hi mi lunginkham thei tak rêng an nit iti thu kin lei riat a; borapuan ivongin, rui kin ringa zêlin Israel rêng zianga fe rang ne phal roh; khanchu, ni ringna a zua duai khom a nit thei,” an ti a.

³²Khanchu, borapuan an vong a, rui an ringah an zêl a, Israel rêng ziangah an va fe a, a ziangah, “Ni bôi Benhadada khan, lung nen kham sela, ki ringna ne zua pêk riseh, a ti,” an ti a. Ahaba khan a sâm a, “A lai ring chu a nit na? A ṭhat ani chu ken zirpuipa angkah a nit,” a ti a.

³³Benhadada milianhei khan ringai iṭha takkan, a lungril tak a îsîr nîng a ti iamin, “Nî ti angkan Benhadada chu ni suapuipa a nit,” an ti a. Khanchu, Ahaba khan, “Va fe unla, hin hong ṭhui rei,” a ti a. Benhadada kha a hong tlungin chu Ahaba khan a tâliah a lei inchuang a.

³⁴Benhadada khan a ziangah, “Ki pan ni pa ziang ata khua ai lâk tâkhei kha nang peh kîr nôk ki ta; khante, ki pan Samaria khua rivai mun ai siam angkah khan Damaska khuaah rivai mun ni ta rang la siam sa roh,” a ti a. Ahaba khan a sâm a, “Khangkan thu ni thlungin chu nang infêng ki ti,” a ti a. Khangkah khan Thuthlung a siampui a, ân fe tâk a.

³⁵Khante, zânthlahei lâia khatkah hin PUMAPA thupêkin a zânthlapui ziangah, “Ne hong itoh roh,” a ti a. Khannisela, ani khan ito nuam mak a.

³⁶Khanchu, a ziangah, “PUMAPA thu ni ôi no sikin, nangmah hin ni ne mâk kaneh sakeibakneiin nang lei sê that a ti,” a ti a. Khangkan a mâk kaneh khan sakeibakneiin a lei ibô a, a sê that tâk a.

³⁷Khanungchu, kha zânthla ngir kha mi dang ziangah a fe a, “Ne hong itoh roh,” a ti a. Kha mi khan a hang itôk a, â tôk iphop tâk a.

³⁸Zânthla khan a mâi kha puanin a tuam a, risiam danglamin arsiam a, Israel rêng hong thleng rang kha a ngâk ṭian a.

³⁹Rêng a hong tlungin chu zânthla khan rêng kha a lei isam a, “Ni bôi hi ridoina muna ṭang ki nit a, sipai khatkah hin irâl ai man kha ki ziangah a hong ṭhui a, ‘Hi mi hih lei ngâk roh; â tlân rimang duaiin chu a ringna rithûlin ni ringna ichân ni ti, a nit nole tangka sângithumkah ni chôi rang a nit,’ a ti a.

⁴⁰Khannisela, thil dangheiah ki buai a, kha mi khah a lei zôk pat tâk a,” a ti a. Rêng khan a sâm a, “Ni chungah thu thlûkna chu nangmah ngêiin ni înpuang a nit, khangkah takah khan itho nîng a ti,” a ti a.

⁴¹Zânthla khan a mâi tuamna puan kha a sân a, Israel rêng khan zânthlahei lâia mi a nit iti a riat tâk a.

⁴²Khanungchu, zânthla khan rêng ziangah khan, “PUMAPA khan hingka hin a ti; ‘Mi ithi ranga ki înkung kha ne sua sikin a ringna rithûlin ni ringna, a mihei rithûlin ni mihei ni îchân rang a nit,’ a ti,” a ti a.

⁴³Israel Rêng Ahaba kha ingûi tak neh lunghoi ino takkan Samaria khuaah a inah khan a fe tâk a.