Read Biete 1 RÊNGHEI 21 Bible Online

1 RÊNGHEI 21 - Biete bible

1 RÊNGHEI 21

¹Jezreel khuaa rêng Ahaba in kôl inâi tengah khan Jezreel mi Nabotha an iti khan grep rikul a nei a.

²Ahaba khan Nabotha ziangah, “Ni grep rikul hi keiman lei dong rong, ki in inâi teng a nit a, thlâi iring bila siam kî nuam a nit. Arthûlin grep rikul hi nêka ṭha ual nang pêng ki ti, a nitnole ni nuam vângin chu a man iṭha ualin sum nang pêng ki ti,” a ti a.

³Nabotha khan Ahaba ziangah, “Hi grep rikul hi ki puheia rithoka kî lua a nit a, nang peh thei tlak no ning e,” a ti a.

⁴Nabothan khangkan a ziangah thu a ti sikah khan Ahaba kha ingûi tak neh lunghoi loi takkan a inah a fe tâk a. A zâlmunah a zâl a, bang tiang ma a song a, fâk rêng rêng zong nuam mak a.

⁵Khanchu, a nupui Jezebeli kha a va fe a, a ziangah, “Îtho tâk im ni lungril khangkah taka ai ngûi? Ithôm fâk ni zong nuam no?” a ti a.

⁶Ahaba khan a nupui ziangah khan, “Nabotha ker sônpui a, ‘Ni grep rikul hi nen richo roh, a nitnole ni nuamin chu arthûl grep rikul dang nang pêng ki ti,’ ki ti a; ani khan, ‘Ki grep rikul chu nang peh no ning e,’ itin a ne sâm sika a nit,” a ti a.

⁷A nupui Jezebeli khan a ziangah, “Israel ram rêng ni mak chêm a? Thoi inla, bu nen la, lungril ifân takkan om roh. Nabotha grep rikul chu keiman nang lah pêk ki ti,” a ti a.

⁸Khanungchu, Jezebeli khan lekha arziak a, Ahaba riming richikna a nam a, Jezreela milianhei neh ram tlâng ulianhei a thon a.

⁹A lekhaah khan, “Bu ngei nî sûn lei inpuang unla, mipuihei bûm unla, Nabotha kha chôiinrisângin mipui maah inṭhung rei.

¹⁰Khante, mi chanlamboi pasal inikah, ‘Pathian neh rêng ni îsîr insiat a nit,’ itia hong ikaltu rang lei siam rei. Khanungchu, khopui putiang ṭhui unla, lungin dêng that rei,” a ti a.

¹¹Jezreela milianhei neh ram tlâng ulianhei khan Jezebelin an zianga ai thon lekhaa a irziak angkah takah khan an lei tho a.

¹²Bu ngei nî sûn an inpuang a, mipuihei an bûm a, Nabotha kha chôiinrisângin mipui maah an inṭhung a.

¹³Mi chanlamboi pasal inikahei khan mipuihei makungah khan, “Nabotha hin Pathian neh rêng â sîr insiat,” itin Nabotha kha an hong sêl ikal a. Khanchu, khopui putiang an ṭhui suak a, lungin an dêng that tâk a.

¹⁴Khanchu, Jezebeli ziangah, “Nabotha lungin an dêng a, a thi tâk,” itin an iril a.

¹⁵Jezebelin Nabotha kha lungin an dêng that iti a riat kaneh, Ahaba ziangah, “Thoi inla, Jezreela mi Nabotha grep rikul nang a inrichôk nuam ino kha va nei ta roh. Nabotha chu a thi tâk,” a ti a.

¹⁶Voikazelin Nabotha grep rikul idong rangin Ahaba chu a fe zel tâk a.

¹⁷Khanungchu, PUMAPA thu khah Tisbe mi zânthla Elija ziangah a zuang tlung a.

¹⁸“Thoi inla, Samaria khuaa om Israel rêng Ahaba sôn rangin zu fe roh. Nabotha grep rikulah a om a, inei itumin amakhan ai fe a nit.

¹⁹A ziangah, PUMAPA khan hingka hin a ti, ‘A miriam ni that zoin, a neinun khom inei pêk nî tum kêng na? a ti,’ tin la, a ziangah, PUMAPA khan hingka hin ai ti a nit, ‘Uihein Nabotha thisen an iliakna mun ngêiah hin nangma thisen khom hi an îliak rang a nit, a ti,’ ti roh,” a ti a.

²⁰Ahaba khan Elija kha a mun chu, a ziangah, “Ni ne hong imu suak tâk na, ke râl inthangpa?” a ti a. Elija khan a sâm a, “O nang ki hong imu tâk a nit hih, PUMAPA mitmuah thil ṭhano tho rangin ni irpêk let tâk a nit.

²¹Khasikin, PUMAPA khan hingka hin ni ziangah ai ti a nit, ‘Ni chungah hin thil ṭhano zuang ithlun ki ta, nang ki zuang înrimang rang a nit. Ni insungkuahei ipa murdi chu naipang neh ulian khom ki înrimang rang a nit.

²²Nangman ki ning nen thik sik neh Israelhei thilisual nen tho sikin Nabata naipa rêng Jeroboama insungkuahei neh Ahija naipa Baasa insungkuahei angkan ni insungkuahei hi siam ki ti,’ a ti.

²³Jezebeli chungchâng thu khom PUMAPA khan hingkan ai ti a nit. ‘Jezreel khopui kulpui sunga uihein Jezebeli sa hi la fâng an ti.

²⁴Ni insungkuahei lâia mi khopuia thi murdi chu uihein fâng an ta; rama thi murdi chu vasatelhein fâng an ti,’ a ti,” a ti a.

²⁵A nupui Jezebeli îthora PUMAPA mitmua thil ṭhano tho ranga rizuar, Ahaba angkana hi tute rêng rêng omak.

²⁶PUMAPA khan Israela richihei maa ai ûmisua Amorhei thiltho angkan mirmilhei chubai iûnin thil porinche tak ai tho ngai a nit.

²⁷Kha thu khah Elija khan a ti zoin chu Ahaba khan a puan â potthlêra, borapuan a sil a, bu a ngei a, borapuanah a zâl a, beidong neh ingûi takkan a om tâk a.

²⁸Khante, PUMAPA khan Elija ziangah khan,

²⁹“Ahaba ki makungah arngai intlômzia hi ni mu na? Ki makungah arngai intlôm sikah hin a damsung kârkah chu a chungah thil ṭhano ithlun pêk no ning e; a naipa dam sungin kêng Ahaba insungkua chungah thil ṭhano ki la îthlun pêk rang,” a ti a.