Read Biete 1 RÊNGHEI 22 Bible Online

1 RÊNGHEI 22 - Biete bible

1 RÊNGHEI 22

¹Kum inika sung chu Suriahei neh Israelhei kha ridoi loiin an om a.

²Khannisela, a kum ithumna kumah khan Juda rêng Jehosafata kha Israel rêng Ahaba ziangah a zu fe a.

³Ahaba khan a milianhei ziangah, “Gileada Ramot khua hi eimani ta a nit iti ireh ṭianka îtho sika Suria rêng hi sutpai loia om ṭian mai im ei init?” a ti a.

⁴Khante, Ahaba khan Jehosafata ziangah, “Ramot khua ne hang idoipui ni nuam im?” a ti a. Jehosafata khan a sâm a, “Keimah neh nangmah, ki mihei neh ni mihei chu pumkah ei nit a, ki sakorhei neh ni sakorhei chu pumkah an nit.

⁵Khannisela, a masa takin PUMAPA lei isôn bak rei,” a ti a.

⁶Khanchu, Ahaba khan zânthlahei mi rizalikah sar a koibûm a, an ziangah, “Ramot khua doi rangin kin irthok rang im, kin irthok ino rang im?” a ti a. Anni khan, “Hang doi roh, PUMAPA khan nêna nang ai pêk rang a nit,” an ti a.

⁷Khannisela, Jehosafata khan, “Hi munah hin PUMAPA zânthla dang tu mani lua PUMAPA ne hang isôn pêk rang dang an iom ino mani?” a ti a.

⁸Ahaba khan Jehosafata kha a sâm a, “PUMAPA ne sôn pêk rang mi khatkah Imla naipa Mikaia chu a la om dua; khannisela, ani hi chu ki mi nel lam tak a nit; ki chungchâng thu hi â seh tiang ringot ti no chu â ṭha rêng rêng a isîr ngai ino a nit,” a ti a. Jehosafata khan, “Rêng khan khangkan chu ti no sela,” a ti a.

⁹Khanungchu, Ahaba khan ruaitu khatkah a koi a, “Imla naipa Mikaia hang ṭhui vak ta,” a ti a.

¹⁰Israel rêng Ahaba neh Juda rêng Jehosafata kha Samaria khua kul kotbâi lûtna kôla rîzôlah an rêng silboma rivon, an rêngṭhungmun seng sengah an iṭhung a, an makungah khan zânthlahei murdi khan thu an isîr inpuang a.

¹¹Khante, an lâia khatkah Kenaana naipa Zedekia khan thîrin serki rilimhei a siam a, Ahaba ziangah, “PUMAPA khan hingka hin a ti, ‘Hiheiah hin Suriahei chu doi ni ta, inê rip ni ti,’ a ti,” a ti a.

¹²Zânthla murdihei khan khangkah korongin an ti a, “Ramotah khan hang fen la, hang inê ni ti, PUMAPA khan nêna nang ai pêk rang a nit,” an ti a.

¹³Mikaia va koi ranga an itirpu khan Mikaia ziangah, “Zânthlahei murdîn rêng thluantlung rang thu inrual takkan an inpuang a, an înpuang tâk angkah takin nang khomin â ṭha tiang hang inpuang roh dua,” a ti pêk a.

¹⁴Khannisela, Mikaia khan, “PUMAPA ringna chingin kî ti a nit, PUMAPA khan ki zianga a îsîr bang khah ki hang inpuang rang chu a nit,” a ti a.

¹⁵Rêng Ahaba makungah a hang rilangin chu rêng khan a ziangah, “Mikai, Gilead rama Ramot khua doi rangin rêng Jehosafata neh hin kin irthok rang im, kin irthok ino rang im?” a ti a. Mikaia khan a sâm a, “Rithok rei, thluantlung nin ti. PUMAPA khan nêna nangni ai pêk rang a nit,” a ti a.

¹⁶Khannisela, Ahaba khan, “Thutak ringot ti no ki ziangah PUMAPA riminga sîr loi rangin voi izâkâm nang kî ti rang tâk hi?” a ti a.

¹⁷Mikaia khan a sâm a, “Israel sipaihei murdi kha enkoltu nei ino bera angkan itlângheiah an rithek indar riai ki mu a. PUMAPA khan, ‘Hi mihei hin ruaitu nei mak a, mi tin mahni in tiang thlangam takkan fe ta riseh,’ ai ti a nit,” a ti a.

¹⁸Ahaba khan Jehosafata ziangah, “Ki chungchâng thu hih â seh tiang ringot ti no chu â ṭha tiang rêng rêng chu isîr no nih iti nang ki iril thlâm ni mak ima kha?” a ti a.

¹⁹Mikaia khan, “Atûnah hin PUMAPA thu hih ringai roh, PUMAPA kha rivâna a rêngṭhungmuna ṭhung ki mu a, a vântirtônhei murdi â changtiang neh â voitiang an iding a.

²⁰PUMAPA khan, ‘Ahaba hi Ramot khuaah a hang fe a, irâl kutah a hang thina rangin tûm a zu lêm rang?’ ai ti a nit. Vântirtôn ṭhenkahein hingka hin an ti a, a dang ṭhenkahein khangkan an ti a.

²¹Khanchu, rithla khatkah hi a hong suak a, PUMAPA makungah â ding a, ‘Keiman zu lêm ki ti,’ a ti a.

²²PUMAPA khan a ziangah, ‘Ingkan im ni zu lêm rang?’ a ti a. Ani khan, ‘Fêng ki ta, a zânthlahei murdi kha thu dik nino inpuang rangin siam ki ti,’ a ti a. Khanchu, PUMAPA khan, ‘Fen la, zu lêm roh, lo khom tluk ngêt ni ti,’ a ti,” a ti a.

²³Mikaia khan, “Khangkah khan ai nit tâk a nit. Hi ni zânthlahei murdi hi nang ilêm rangin ai siam tâk a nit. Khannisela, PUMAPA khan amah ngêiin siat ni tongna rang a înkung thlâm tâk a nit,” a ti a.

²⁴Khanungchu, zânthla Zedekia khan a hong nâi a, Mikaia mâikhang a hong ibên a, “Tikinta rithoka PUMAPA rithla khan a ne imâk a, ni ziangah thu a îsîr im ai nit?” a ti a.

²⁵Mikaia khan, “Ringai roh, chontan inril takah ribih ranga ni lût tenan la riang ni ti,” a ti a.

²⁶Khanungchu, Rêng Ahaba khan ruaitu khatka ziangah, “Mikaia hi man inla, khopui optu Amona neh rêng naipa Joasa ziangah ṭhui roh.

²⁷An ziangah, ‘Rêngin hi mi hih lung inah khum inla, thlangam takka ki hong kîr nôk mâkah chu ibai neh tui ichîntek tekah bang peh rei a ti,’ ti roh,” a ti a.

²⁸Mikaia khan, “Thlangam takka ni hong kîr nôkin chu PUMAPA khan keima ne mangin thu a îsîr ino nîng a ti,” a ti a. Amah ngir khan, “Nangni mipuihei, nin rêngkan lei reh rei dua,” a ti a.

²⁹Khanungchu, Israel rêng Ahaba neh Juda rêng Jehosafata kha Gilead Ramot khua doi rangin an fe tâk a.

³⁰Ahaba khan Jehosafata ziangah, “Risual bualah ei hang fen, kei chu rivo danglamin risiam danglam ki ta; khannisela, nang chu ni rêng thlukin rivo roh,” a ti a. Khanchu, Israel rêng kha rivo dangin arsiam danglam a, risual bualah khan a fe sa tâk a.

³¹Suria rêng khan a tâli chunga ruaitu sômithumkah inikahei ziangah khan, “Israel rêng ringot ti no chu mi chîn khom mi lian khom a tute doi no rei dua,” itin thu a pêk a.

³²Khanchu, tâli chunga ruaituhei khan Jehosafata an hang mun chu, “Israel rêng a nit ngêt hih,” an ti a; khanchu, idoi itumin an hual tâk a. Khannisela, Jehosafata kha â khêk suakin chu,

³³Israel rêng ni mak iti an riat a, ama doi kha an ringam tâk a.

³⁴Suria sipai khatkah hin tumbîk nei ual loiin a phel a kâp a, Israel rêng Ahaba kha a ṭângipho rizomna kâr takah a kâp fûk a. Khanchu, a tâli inlôntu ziangah, “Kâi inrihêl inla, risual bual ata hi ne suakpui roh. Sâbe nah tak kî tong tâk kêng,” a ti a.

³⁵Risual rûnpui lâiah khan rêng Ahaba chu tâli bang rinêlin Suriahei ma songin an inding a. A sâbe ata thisen kha tâli chungah khan a luang ngûi ngûi a, kholoiah chu a thi tâk a.

³⁶Nî tlâk rangto vêlin chu, sipaihei lâiah thupêk a tlung a, “Mi tin mahni khua tiang neh mahni ram tiang kîr riai ta riseh,” itin tlâng an isam tâk a.

³⁷Rêng Ahaba kha a thi tâk a. A ruak kha Samaria khuaah an chôi a, an phûm tâk a.

³⁸A tâli kha nochizuarhei risilna ngai Samaria dîlah khan an risûk infâi a; uihein a thisen khah an iliak a, PUMAPA thusîr kha a zuang itlung tâk a nit.

³⁹Ahaba thurchi danghei, a thiltho murdihei, a saiha in sin hei, a khua siam murdihei kha Israel rênghei Thurchi Riziakna Bu-ah ai chuang riai a nit.

⁴⁰Ahaba thi nungah khan a naipa Ahazia kha arthûlin ân lal tâk a.

⁴¹Israel rêng Ahaba inlal kum ilinaah khan Asaa naipa Jehosafata chu Judahei chungah a hong inlal a.

⁴²Jehosafata kha ân lal phut lâiah khan kum sômithumkah kum ringakah mi a nit. Jerusalem khuaah kum sôminikah kum ringakah roi ai rêl a nit. A nu riming kha Azubi, Silhia nainu a nit.

⁴³A pa Asaa lampui zui murdi kha a zui a; pêt tlak loiin PUMAPA mitmuah thil iṭha a tho ngai a. Khannisela, sanong bôlkuanghei kha chu pai inrimang mak a, mihei khan amakhan an la irbôlin, namhoi an lai hâl mai ngai a nit.

⁴⁴Jehosafata khan Israel rêng neh ringeina a siam a.

⁴⁵Jehosafata thurchi danghei, a thiltho theizia a înlang thuhei, a râldoi thuhei kha Juda rênghei Thurchi Riziakna Bu-ah ai chuang riai a nit.

⁴⁶A pa Asaa damlâia ipa neh nupang mirmil biakna muna rizuar ngai a la omhei kha a ram ata a ûmisua riai a.

⁴⁷Edom ram khan rêng nei mak a, rêng rithûla roiirêl rangin Juda rêng khan mi a phun pêk a.

⁴⁸Rêng Jehosafata khan Ofir rama rângkachak ipêl rang Tarsis rikuanghei a siam a; khannisela, Ezion-Geber munah rikuanghei kha an siat riai a, infe khâi mak e.

⁴⁹Khanungchu, Ahaba naipa Israel rêng Ahazia khan Jehosafata ziangah, “Ki mihei hi ni mihei neh rikuangheiah munkan fe riseh ba,” a ti a. Khannisela, Jehosafata khan inrifûk mak a.

⁵⁰Jehosafata kha a thi tâk a, Davida khopuia rênghei thlânah khan an phûm tâk a. Khante, a naipa Jehorama chu arthûlin ân lal tâk a.

⁵¹Juda rêng Jehosafata inlal kum sômleisarina kumin Ahaba naipa Ahazia kha Samaria khuaah khan Israelhei chungah a hong inlal a.

⁵²PUMAPA mitmuah thil ṭhano a tho ngai a, a nu Jezebeli hei, a pa Ahaba hei, rêng Jeroboama hei angkah ngirin thilisual a tho a, Israelhei ṭhuiinsualtu a nit.

⁵³Khante, a pa tho lam angkah ngirin Baal pathian sin a tho a, chubai a ûn ngai a, PUMAPA Israelhei Pathian ningthik kha a înṭuang tak tak a nit.