Read Biete 1 RÊNGHEI 3 Bible Online

1 RÊNGHEI 3 - Biete bible

1 RÊNGHEI 3

¹Solomona khan Aigupta rêng Faroa neh rizomna a siam a, Faroa nainu kha nupuiin a nei a; rêng in hei, Tempil hei, Jerusalem khua kulpuihei a sin zoi mâkah chu a nupui kha Davida khopuiah ân om a.

²PUMAPA Tempil la sin ni mak a; khasikin, mihei kha bôlkuang dang dangheiah an irbôl ngai a nit.

³Solomona khan PUMAPA chu lung a thlung a, a pa Davida thuchahei kha a zôm a; khannisela, ani khom bôlkuangheiah sa thatin, ribôlna ai lan ngai a nit.

⁴Voikah chu rêng kha ribôlna lan rangin Gibeon khuaah a fe a; kha mun kha ribôlna munpui tak a nit a. Solomona khan kha mâichâmah khan hâlrivâm thillan rang ran sângkah ai lan a nit.

⁵Gibeon khuaah kha zânah khan PUMAPA chu Solomona ziangah armangin a ziangah a zuang inlâr a, a ziangah, “Ne nih roh, im nang ki pêk rang?” a ti a.

⁶Solomona khan, “Ni bôi, ki pa Davida kha ni mitmuah a iamom a, idik tak neh lungril rithiang riputa ai om ngai angkah takah khan nangman a ziangah lungkhamlianna natinsat tak nen lang a, nangman hi lungkhamlianna natinsat tak hi a ta rangin nen kung pêk a, nangman vuaninta a rêng ṭhungmuna ṭhung rang naipa nî pêk a nit.

⁷Khasikin, atûnah hin, O PUMAPA ki Pathian, nangman ni bôi hi naipang rinoi, thu fe dân neh hong dân khom la riano ni khom inlang, ki pa Davida rithûlah khan rêngin ni ne lei siam tâk a.

⁸Ni bôi hi ni mi inih ranga ni irthlanghei, mi itam takkah tep zoi zât loihei lâiah hin kî om a nit a.

⁹Khasikin, thudik neh thuno ithlei thei a, ni mihei roi idik takka ki rêlpêk theina rangin ni bôi hi vârna ne peh roh. Khanonchu, ni mi hingka dôra tamhei hi ingkan im roirêl pêk thei tâng ki ta?” a ti a.

¹⁰Solomonan kha thil khah a ngên sikin PUMAPA chu a chungah a lôm tak tak a.

¹¹Khanchu, a ziangah, “Nangman ni ta ranga ringsôtna manih richongna manih, ne râlhei thina manih ngên loia idik takka roirêlna ranga vârna ni ngên sikin,

¹²ni ngên lam angkah takin nang tho pêk ki ti. Ringai roh, vârna neh riatna lungril nang pêng ki ta; khanchu, ni matona nangma angkana rêng zel tute la omak a, ne nungah khom nangma angkana rêng zel hi tute om tlak khâi no nih.

¹³Khante, nî ngên ino, richongna neh roinpuina khom nang peh sâng ki ti. Khanchu, ni dam sungin rêng lâiah khan nangma nang itluk rêng zel om no nih.

¹⁴Ni pa Davidan ai zui angkan ki dânhei neh ki thupêkhei ni zôm a, ki lampuihei ni zuiin chu ring dam sôtna nang pêng ki ti,” a ti a.

¹⁵Solomona chu a hang ṭhang a, armangah khan Pathianin a îsôn a nit iti a riat a. Khanungchu, Jerusalemah a fe a, PUMAPA Thuthlung Bôm maah â ding a, hâlrivâm thillan neh ringeina thillanhei a lan a; kha rizoin chu a milianhei murdi ta rang ruai â ṭhe a.

¹⁶Sûnkah chu nupang nochizuar inikah an fe a, Rêng Solomona makungah an hang ngîr a.

¹⁷Khante, khatkah khan, “Epu, hi nupang neh hin in khatka munka om kin nit a; kha munah kin om lâiah khan nai ipa ki nei a.

¹⁸Khante, nai ki nei zoi a, a sûn thumnî tenan chu hi nupang khom hin nai ipa a nei a. Munka om kin nit a, kha inah khan keimani ruai ti no chu tute mi dang omak a.

¹⁹Khanungchu, zânkah chu hi nupang hin a nai a del that a.

²⁰Khanchu, zânlâiah a thoi a, ki in kârin ki naipa ki kôla zâl khah a lâk a, a zâlmunah a chôi a, a nai ithi kha ki zâlmunah a hong isia a nit.

²¹Atûk zîngah, ki hang ṭhang a, hang idon rang ki tin chu â thi saiin ki mu a. Khannisela, iṭha takkan ki en inchialin chu ki naipa, kî neiah kha ni mak iti ki mun fel tâk a,” a ti a.

²²Khannisela, Nupang dang khan, “Ni mak e, â ringpu hi ki nai a nit, â thipu hi ni nai a nit,” a ti a. Nupang khatkah khan, “Ni mak, â thi kha ni nai a nit, â ring hi ki nai a nit,” a ti ngit a. Khangkan rêng makungah khan an rikhal ngit a.

²³Khanungchu, Rêng Solomona khan, “Khatkan, ‘Â ring hi ki nai a nit a, a thi kha ni nai a nit,’ a ti a. Khatkah khomin, ‘Ni mak, â thi kha ni nai a nit a, â ring hi ki nai a nit,’ a ti ngir a,” a ti a.

²⁴Rêng khan, “Khandai ne hong peh ta u,” a ti a. Khanchu, khandai kha rêng makungah an hong chôi a.

²⁵Rêng khan, “Naite a la ring hi bong inikan tan unla, bongkah kha khatkah peh unla, a dang bongkah khah khatkah kha peh rei,” a ti a.

²⁶Naite a la ringpu nu tak tak khan chu a naipa kha lung a thlung tak tak a, rêng ziangah khan, “O Epu, naite hi amah peh roh, ithat chu that tlak no roh,” a ti a. Khannisela, khatka nu khan chu, “Tute ne peh bîk no roh, bong inikan tan roh,” a ti a.

²⁷Khanungchu, Solomona khan, “Naite kha that no rei, hi nupang, thusîr masa hih peh rei, ani hi a nu dik tak a nit,” a ti a.

²⁸Khante, Israel mipuihei murdi khan kha thu-a rêng rêl dân kha an lei riat a; roirêlna rangin Pathian vârna kha a ziangah khan a om iti an riat tâk sikin rêng kha marit an tho tak tak tâk a.