Read Biete 1 RÊNGHEI 4 Bible Online

1 RÊNGHEI 4 - Biete bible

1 RÊNGHEI 4

¹Rêng Solomona chu Israelhei murdi rêng a nit tâk a.

²Hihei hih a milianhei chu an nit. Thiampu: Zadoka naipa Azaria a nit a.

³Lekha ziaktuhei: Sisa naipahei, Elihorefa neh Ahija an nit a. Thurchi riziaktu: Ahituda naipa Jehosafata a nit.

⁴Sipai ruaitu: Jehoiada naipa Benaia a nit. Thiampuhei: Zadoka neh Abiathara hei an nit.

⁵Ram-optuhei chunga ruaitu: Nathana naipa Azaria a nit a. Rêng roisakpuitu: Nathana naipa thiampu Zebuda a nit.

⁶Rêng in isomhei enkoltu: Ahisara a nit a. Tharum sin an înthohei enkoltu: Abda naipa Adonirama a nit.

⁷Solomona khan Israel ram pumpui kha bial sômleiinikan a ṭhen a, kha ram bial optu mi sômleiinikah a phun a. Khahei khan rêng rang neh a insungkuahei rang ifâk an ngaitua ngai a. Ruaitu khatkan thlaka sung itumin kumthluanin thlakah chit ifah rua an ingaitua ngai a nit.

⁸Hihei hih an riminghei neh an ram bial enkolhei chu a nit: Benhura: Efraim tlângram optu a nit.

⁹Bendekera: Makaz khopui, Salbim khopui, Beth Semes khopui, Elon khopui neh Beth Hanan khopui hei optu a nit.

¹⁰Benheseda: Aruboth khopui neh Soko khopui hei neh Hefer ram bial pumpui optu a nit.

¹¹Benabinadaba: Dor bial pumpui enkoltu a nit a; ani khan Solomona nainu Tafathi nupuiin a nei a.

¹²Ahituba naipa Baana: Taanak khopui, Megido khopui neh Jezreel khua sim tiang Zerethan kho kôla om Beth Sean kôla ramhual murdi a rithoka Abel Mehola khopui neh Jokmeam khopui idêna optu a nit.

¹³Bengebera: Gilead rama Ramot khopui neh Gilead rama Manasea richia Jaira khua hei, Basan rama Argob ramhual khua roinpui tak tak kho sômirukkah, kulpui neh a dâikot kalna dâr thluan ineihei khom kha ai chang a nit.

¹⁴Idoa naipa Ahinadaba: Mahanaim ram bial optu a nit.

¹⁵Ahimaaza: Naftali ram hual optu a nit. Ani khom khan Solomona nainu Basemathi nupuiin ai nei a nit.

¹⁶Husaia naipa Baana: Asera ramhual neh Bealot khua optu a nit.

¹⁷Parua naipa Jehosafata: Isakar ramhual optu a nit.

¹⁸Ela naipa Simeia: Benjamin ramhual optu a nit.

¹⁹Uria naipa Gebera: Amorhei rêng Sihona neh Basan rêng Oga hei inlalna Gilead ramhual optu a nit. Hi sômleiinikahei chungah hin ruaitu tak khatkah ram pumpui chungah a lai om a nit.

²⁰Judahei neh Israelhei chu tuikhanglian rikama ṭiai zâkan an tam a, an fâkin an in a, râiifân takkan an om ngai a.

²¹Solomona khan Eufratis vadunga rithokin Aigupta ramrî kôl Filistiahei ram idênin roi a rêl a. Kha ram murdi khan sia an hong pêk ngai a, Solomona dam sung kârkah chu a thunuaiah an iom a nit.

²²Solomona khan sûnka ranga ifarua ai nang chu ibaidi ṭha chi her sângkah neh ibaidi narân her sîngkah a nit a.

²³Serâtchal insunga vâi inthâi sômkah, serâtchal rama lênga tak sôminikah neh bera rizakah; khabanah khan sakhihei, sangalhei, sazukchalhei neh âr vâi inthâihei a nit.

²⁴Solomona khan Eufratis vadung râl ram pumpui, Tipsaa rithoka Gaza dênin roi a rêl a. Eufratis vadung râla rêng murdi kha a thunuaia om an nit a, a rî richôipui ramhei neh khan ringei irkan an om a.

²⁵Solomona damsung kârkah chu Judahei neh Israelhei kha Dana rithoka Beerseba khua dênin mi tin mahni grep rikul neh theipui bil ineiin râlringam takkan an iom a nit.

²⁶Solomona khan a tâli kâitu sakor sîngilikah neh sakor chungchuang chi sînglei sânginikah a nei a.

²⁷Ram-optu sômleiinikahei khan an pêk rang thla kipah khan Rêng Solomona neh rêng ina khalai rikhîl ngaihei murdi fâk rang kha an ngaitua ngai a; an inang murdi an ipêk riai ngai a nit.

²⁸Ram-optu tinin an tho tum inkung angkah chitin a nangna mun takah khan sakorhei neh tâli kâi ngai sakorhei khop rang inrup barli neh bupôlhei an hong ichôi sa ngai a nit.

²⁹Pathianin Solomona chu vârna neh riatna inthûk tak neh lungril rizat tak suisua rual ino dôr a pêk a.

³⁰Solomona vârna khan khosak mihei neh Aigupta mihei vârna murdi kha ai khûm riai a nit.

³¹Mi murdi nêkan ai vâr a nit: Ezra mi Ethana hei, Mahola naihei Hemana, Kalkola, Darda hei nêkan khom a vâr ual a; a kôlvêla nam murdihei lâia khan arming ân thang tâk a.

³²Thuvâr sângithumkah a ril suak a, Lâ chu sânglei ringakah ai phua a nit.

³³Thing thurchihei khom Lebanon tlânga Sidar thinga rithoka kul banga hong imông husop idênin â sîr ngai a, sa thurchihei, iva thurchihei, bokrivâka lôn mîring chi tinrêng thurchihei, inga thurchihei khom a îsîr ngai a nit.

³⁴Rammual pumpuia rênghein Solomona vârna an riat a, a thu ringai rangin mihei an ihong ngai a nit.