Read Biete 1 RÊNGHEI 5 Bible Online

1 RÊNGHEI 5 - Biete bible

1 RÊNGHEI 5

¹Tura rêng Hirama chu Davida rual ṭha a lei nit mai ngai a, khangkan Solomona chu a pa Davida thûlin rêng a chang tâk iti a lei riatin chu Solomona ziangah palâi a tir a.

²Solomona khan Hirama ziangah hingkan thu a thon a,

³“Ki pa Davida kha, a kôlvêla irâl ramhei neh an ridoi ngai a, PUMAPA khan â râlhei kha a kepha nuaiah ân sia mâkah chu ridoipui mai a nang sikin PUMAPA a Pathian chubai ûnna rang Tempil ai sin thei ino a nit iti ni riat a.

⁴Khannisela, atûn chu PUMAPA, ki Pathianin kin kôlvêl ramhei neh ringei irkan a ne siam a, irâlhei om khâi mak a, nen buai rang khom om khâi mak.

⁵PUMAPA khan ki pa Davida ziangah, ‘Ni naipa ner thûla ni rêngṭhungmun ki la înlua rangah khan ki ta rang Tempil chu la sin a ti,’ itia a lei îsîr tâk angkah khan, PUMAPA ki Pathian chubai ûnna rang Tempil isin kî tum a nit.

⁶Khasikin, Lebanon tlânga sidar thinghei nen tuk pêk inla, ke somhei khom ne somhei lâiah sin tho sâng an ta, ne somhei lo chu ni ti lam angkan pêng ki ti. Ni mi Sidon mihei angkana thing iphûr thiam keini lâiah tute omak iti ni riat a,” itin thu archa a.

⁷Hirama khan Solomona thucha a lei riatin chu a lôm tak tak a, “Hi nam roinpui tak chungah roiirêl ranga naipa vâr tak Davida petu PUMAPA chu vuanah hin inpâkin om riseh,” a ti a.

⁸Khanungchu, Hirama khan Solomona ziangah, “Ni thu ner cha kha ki lei riat a; ni ngên lam angkah takin lei thông ki ta, sidar thing neh ifâr thing chu ni nang lam angkah takin nang pêng ki ti.

⁹Ke somhein Lebanon tlânga rithokin tuikhanglian idênin thing chu zuang chôi an ta, khuap itêl an ta, siana rang mun ni îndangah khan zuang chôi an ta, kha munah khan sût an ta; ne somhein an lei ilâk ngai rang a nit. Nangma tiang khom ki mihei hi an fâk rang ni lei tum pêk rang ni ta no nîm,” itin thu a thon a.

¹⁰Khanchu, Hirama khan sidar thing neh ifâr thing kha Solomona nang lam angkah takin a pêk a.

¹¹Solomona khan Hirama chu a mihei fâk rang bu tîn nuaiilikah neh oliv riak iṭha chi tîn rizalikah kum tin ai pêk ngai a nit.

¹²A lei inkung lam angkah takin PUMAPA khan Solomona chu vârna a pêk a. Hirama neh Solomona kârah khan ringeina a om a; an ruaikah khan munkan thu an thlung tâk a.

¹³Rêng Solomona khan Israel ram pumpuia rithokin tharum sin itho ranga ai dânde mi sîngithumkah an om a.

¹⁴Annihei ruaitu chu Adonirama a nit a, sîngkah chitin pôl ithumkan a ṭhen a, pôl khatkan Lebanonah thlaka sung chit an mang a, thla nikah chu in tiang an imang ngai a nit.

¹⁵Solomona khan lung isuk mi sîngiriatkah tlângramah khan a nei a, a lei ipêl ngai mi sîngsarikah ai nei a nit.

¹⁶Khahei kha tep loiin Solomona khan ruaitu bîk sin itho ngaihei ruaitu mi sângithumkah neh rizathumkah a nei sa a.

¹⁷Rêng Solomona thupêk angkan lung iṭha chi Tempil lungphûm rang kha lung ilian tak takhei an hong lâk a.

¹⁸Solomona mihei neh Hirama mihei neh Biblos khuaa mihei khan Tempil sinna rang thing neh lunghei kha an rî tâk a.