Read Biete 1 RÊNGHEI 6 Bible Online

1 RÊNGHEI 6 - Biete bible

1 RÊNGHEI 6

¹Israela richihein Aigupta ram an mâk ata rithoka kum rizalikah sômiriatka kum, Israelhei chunga Solomona inlal kum ilina, a thla nikna Ziv thlaah khan Solomona khan PUMAPA Tempil isin chu ai phut a nit.

²Solomonan PUMAPA ta ranga Tempil ai sin kha a dung tiang mûk sômirukkah a nit a, a khang tiang kha mûk sôminikah, arsâng dân kha mûk sômithumkah a nit.

³Tempil ma tiangah khan tualipûk kha a in khanglian dôrkah, mûk sôminika sei, ân thûk tiang mûk sômkah a om a.

⁴Tempil bangah khan tukverhei, a sungtiang nêka a putianga chîn ual a om a.

⁵Khante, putiang bang rinêlin Tempil sîrtiang neh nungtiang chontan richuan ithumka nei isin a nit a, richuan tin kha mûk ringaka risâng a nit.

⁶Richuan nuai ita tak kha a khang tiang mûk ringaka rizat a nit, a lâi ita kha mûk irukka rizat a nit a, a chung ita tak kha a khang tiang mûk sarika rizat a nit. Tempil chontan chuanchung banghei kha a chontan nuai ita bang nêkan arphân ual sikin kalkhanghei kha in bangah khan irôl nang loiin inzamah khan â vêlkan a irngat zel a nit.

⁷Tempil sinna lunghei kha lungsukna muna suk isai diam korong a nit a; khasikin, Tempil an sin lâiah khan chungchôi irî hei, reipui irî hei, thîr riamrei irî hei rêng rêng kha ireh rang ai om ino a nit.

⁸Chontan nuai ita tak kotbâi kha Tempil sim tiang pangah khan a om a, archuan inikna chontan neh archuan ithumna chontana fena rangin rikal an ido a nit.

⁹Khanchu, Rêng Solomona khan Tempil chu a sin zoi tâk a. In kha sidar thing pum neh a phêkin a chung kha a zol a.

¹⁰Khante, bang rinêla chontan richuan ithumkah kha richuan tin kha riten natkan mûk ringakah chita risânga sin a nit a, khahei kha Tempil neh khan sidar thing kalkhanga inrizom korong a nit.

¹¹PUMAPA thu kha Solomona ziangah a zuang tlung a,

¹²“Ki dânhei neh thupêkhei ni zômin chu ni pa Davida zianga ki lei înkung tâk ki thu kha ni chungah hin indet ki ti.

¹³Hi Tempil ni sinah hin ki mi Israelhei lâiah om ki ta, anni chu ithla tlak no ning e,” a ti a.

¹⁴Khanchu, Solomona khan Tempil kha a sin zoi tâk a.

¹⁵Tempil sungtiang bang kha â ṭuanga rithokin a chungzol idênin sidar thing phêkin a zol a, â ṭuangah khan chu ifâr thing phêk a dâp a.

¹⁶Chontan sungril, Mun Rithiang tak an iti kha Tempil mongtiangah khan isiam a nit a, a dung mûk sôminikah a nit a, â ṭuanga rithoka a chungzol isuna sidar thingphêka kârdan isiam a nit.

¹⁷Khante, Mun Rithiang tak lût maa chontan kha a dung tiang mûk sômilikah a nit.

¹⁸Tempil sungtiangah khan sidar thing phêkhei kha pâr neh armuam rilim isina inrivo a nit a; sungtiang rêng rêng chu sidar thinga zol korong a nit a; khasikin, banga lung rêng rêng kha a îlang ino a nit.

¹⁹Tempil sung inrilna takah khan PUMAPA Thuthlung Bôm siana rang kha isiam a nit a, amakhan an isia a nit.

²⁰Hi chontan inril tak hi a dung tiang mûk sôminikah, arsâng dân mûk sôminikah a nit a, amakhah rângkachak rithiang tak inluana tuam a nit. Sidar thinga siam mâichâm khom kha rângkachaka tuam a nit a.

²¹Tempil sungtiang kha rângkachaka tuam riai a nit a, Mun Rithiang tak lûtna kotbâi kha rângkachak zingzirin â dan a, kotbâi khom kha rângkachaka tuam a nit.

²²Tempil sungtiang rêng rêng kha rângkachaka tuam a nit a, Mun Rithiang taka mâichâm khom kha rângkachaka tuam a nit.

²³Mun Rithiang takah khan oliv thinga siam Cherub rithla inika nei, an ruaika khan mûk sômkah seng senga risâng a om a.

²⁴Cherubhei kha ritia bang neh mêl riput dân ri-ang bang an nit a, rithla inikah seng seng an nei a, an rithla tin kha mûk ringakah chita sei a nit a; khasikin, kiangtiang rithla môr ata kiangtianga rithla môr kha mûk sômkah a nit.

²⁷Cherubhei kha Mun Rithiang takah khan kiangtiang kiangtiang an sia a; Cherubhei rithla kha arphar a, khatka rithla khan bang kiang tiang a va sun a, khatka rithla khom khan bang kiang tiang kha a va sun a, kha chontan inlâina takah khan an rithla neh an rithla khah artôn a.

²⁸Kha Cherubhei kha rângkachaka tuam riai a nit.

²⁹Tempil chontanpui sungtiang bang neh Mun Rithiang tak sungtiang banghei kha a vêlkan Cherub rilimhei, itûm kung rilimhei neh pâr rilimhei isina enihoi takka inrivo a nit.

³⁰Â ṭuanghei khom kha rângkachaka tuam a nit.

³¹Mun Rithiang tak lûtna inkot khârhei kha oliv thinga siam a nit. Kot lu kha chu inrizum a nit.

³²Kotkhârhei kha Cherub rilimhei, itûm kung rilimhei neh pâr rilimhei isina inrivo a nit. Kotkhârhei, Cherub rilimhei neh itûm kung rilimhei kha rângkachaka tuam korong a nit.

³³Tempil chontanpui lûtnaah khan kotkhâr kil ilika nei, kil tin riten nat, oliv thingin isiam a nit.

³⁴Kotkhâr ithlep thei inikah ifâr thingin a siam sa a.

³⁵Khaheiah khan Cherub rilimhei neh itûm kung rilimhei neh pâr rilimhei isin a, rângkachaka tuam korong a nit.

³⁶Tempil matiangah khan kottual sungril ual a siam a, lungisuk richuan thua thumkah neh sidar thingpum thuaka rikul khap a nit.

³⁷Tempil lungphûm chu Solomona inlal a kum ilina, a thla nikna Ziv thlaah khan iphûm a nit a.

³⁸Solomona inlal a kum sômleikhatna, a thla riatna, Bul thlaah khan Tempil chu an tum lam angkah thapin tinrêng izoia inrikip diam a nit. Khangkan, Solomona khan kum sarika sung ai sin a nit.