Read Biete 1 RÊNGHEI 7 Bible Online

1 RÊNGHEI 7 - Biete bible

1 RÊNGHEI 7

¹Solomona khan ama ta rang rêng in khom a sin a, kum sômlei kum ithumkah ai sin a nit.

²In ilian tak, “Lebanon Rampui In,” an iti kha a dungtiang mûk rizakah a nit a, a khangtiang mûk sômringakah a nit a, arsâng dân kha mûk sômithumkah a nit. Sidar chopui rân ithumkah a nei a, a rân ikipah chopui sômleiringakah a om a, sidar thingpum â liangin a mang a, a chungzol kha sidar thingphêk a nit.

⁴A banghei kiang ruaikan tukver rân ithum thumkah a om a.

⁵Khante, a kotkhârhei neh tukverhei kha kil ilika nei, ritia natka siam a nit a, bang kiangruaika tukver rân ithumkahei kha ar-enphit korong a nit.

⁶Khante, chopui ineiin chontanpui a siam a, a dungtiang kha mûk sômringaka sei a nit a, a khangtiang kha mûk sômithumka lian a nit. Â matiangah khan tual thapuk chopui ineiin a siam sa a, a chung khom â om a nit.

⁷Roirêlna Chontanpui a siam a, Rêngṭhungmun chontan khom an ti sa ngai a; amakhan Solomonan roi ai rêl ngai a nit. Kha chontan khah â ṭuanga rithoka a chung idênin sidar thingphêka zol riai a nit.

⁸Roirêlna Chontanpui in nungtiangah khan Solomona omna rang in bîk kha, in dang ai sin angkah khan a sin nôk a. Khangkah ngirah khan a nupui, Faroa nainu tumin in dang a sin sa a.

⁹Kha inhei murdi kha, a tualzôl rizat tak ihuapin, a lungphûma rithoka a liang idênin lung iṭha chi a nit a. Kha lunghei kha inrup bang bangka lungkhura suk a, a sungtiang neh putianghei khom inâm dakka itol a, ât inṭim a nit.

¹⁰Khante, lungphûm kha lung iṭha chi, lung ilian pa pa, a ṭhen mûk sômkahhei, a ṭhen mûk iriatkaheia suk a nit.

¹¹Khahei chungtiangah khan lung iṭha chi, inrup bang bangka suk kha inrichuan a nit a; â liang rangin sidar thing imang a nit a.

¹²Khante, rêng in tualzôl kha a vêlkan lung isuk richuan ithumkah neh sidar thing thuaka rikul a nit a, Tempil rikul sung tualzôl angkana rikul a nit.

¹³Rêng Solomona khan Tura khuaa mi kutithiam Hurama a va koi a.

¹⁴Kha mi khah Naftali nam, numei nai a nit a, a pa â thi tâk kha Tura kho mi, sumsen inluan ngai a nit. Hurama kha sumsen inluanna tiang rêng rêngah khan a kut a thiamin, zoro sôt tak dâr chi dang dang lei inluan tâk ngai mi a nit. Rêng Solomona ziangah khan a fe a, sumsen inluanna tianga Solomona sin murdi chu a tho pêk riai a.

¹⁵Hurama khan sumsen chopui a sung rikua inikah, a sei dân mûk sômlei mûk iriatkah, a pum lian dân mûk sômlei mûk inikah, zabok bokka sa seng seng a siam a, Tempil lûtna kôlah khan a phun a.

¹⁶Chopui sîpa khop rangin sumsen inluan lûm inikah mûk ringakah seng senga sei a siam a.

¹⁷Kha chopui sîp kha zingziri risui rilim, voi sarika invêlin a vo a.

¹⁸Theisen rilim rân inika siamin a vo sa a.

¹⁹Thapuk chopui sîp lu bôkhei kha lili pâr angkan â en a hoi a, mûk ilika risâng a nit.

²⁰Khahei kha zingziri risui, lubôk lûm chunga chopui sîp inchêngah khan ikhop a nit. Khante, kha sumsen inluan lûm ichêng chung takah khan theisen rilim rizanikkah rân inikan â vêlkan a siam a.

²¹Hurama khan Tempil thapukah khan sumsen chopuihei kha a phun a, sim tianga chopui kha Jakin chopui an ti a, mâr tianga chopui kha Boaza chopui an iti a nit.

²²Khante, chopuihei sîpah khan sumsen inluan lûmah khan lili pâr rilim kha a om a. Khanchu, chopuihei isin kha zoi infel a nit tâk a.

²³Khante, Hurama khan sumsen tuipang ilianpa, mûk sômka thla, arsâng dân mûk ringakah, â rei kha mûk sômithumka kuala lian ân luan a.

²⁴Â rei nuaiah khan lûmpial rilim rân inikah ân vêl suak a, a rêngkan a tuipang neh khan inluan zel a nit.

²⁵Tuipang kha sumsen serâtchal sômleiinikah putianga ngat chit chungah inṭhung a nit a, ithumkan mâr tiang an ngat a, ithumkan thlang tiang an ngat a, ithumkan sim tiang an ngat a, ithumkan sak tiang an ingat a nit.

²⁶Tuipang isa dân kha zabokka sa a nit a, â rei kha kilât irei angkah a nit a, lilipâr rimuam angkana ri-ûm a nit. Tui litar sîngilikah vêl kengna a nit.

²⁷Hurama khan sumsen tâli sômkah a siam sa a, tâli kha a dungtiang mûk ilikah, arsâng dân kha mûk ithumkah korong a nit.

²⁸Kil ilika neia inhor dumka siam a nit.

²⁹A bangah khan sakeibaknei rilimhei, serâtchal rilimhei neh Cherub rilimhei a chuang a, a tuamna chunga sakeibaknei rilimhei neh serâtchal rilimhei kârah khan a vo te tehei khom a om ritlâng dat a.

³⁰Tâli tin khan a ke chêng, sumsena siam neh sumsen kaldom a nei chit a. Tâli sung kil tinah khan tuibêl inṭhungna rang sumsena siam, a zia om ngatka inluan ai om chit a nit.

³¹Khante, a bêl sîngah khan tuibêl indettu rang dâr bêlvangkual a om a; tuibêl kha a chungtiangah khan mûkkah â tôt a, tuibêl iṭhungna sungah khan mûkkah neh artenkah a tlâk a; â rei itlâng kha suanrikual angkana chêng a nit. A vêlkan inrivo a nit.

³²A ke chêng ilikahei kha mûkkah neh artenka risâng a nit a, â thungna bang nuaia om a nit. Kaldomhei kha tâlihei neh inluan rikop zel a nit.

³³Tâli ke chêng kha sakor tâli ke angkana siam a nit a, a kaldomhei, a suanrikualhei, a sunkalna hei, a lâi ipohei kha inluan korong a nit.

³⁴Tâli kil tin mongheiah khan ringatna ilikah chit a om a, kha ringatnahei kha tâli neh inluan rikop korong a nit.

³⁵Khante, tâli chung chitah khan suanrikual, mûkkah neh artenka risâng hi a om a, arngatnahei, â ṭhungna inhor dumhei kha tâli neh khan inluan rikop korong a nit.

³⁶Ringatnahei neh ṭhungna inhorhei kha a mun ôl lam angkah takin Cherubhei, sakeibakneihei, itûm kung rilimheia inrivo a nit a, a vêlka hin a vo ai om korong a nit.

³⁷Khangkah koronga khan tâli sômkah kha a siam a, a rêngka khan ar-ang nat, artia korong neh siam dân ri-ang chit a nit.

³⁸Hurama khan risilna bêl sômkah a siam a, risilna bêl khatkah khan litar rizariatkah a kêng a, risilna bêl kha mûk ilikah chita rizat a nit. Tâli sômka chungah khan risilna bêl khatkah chit ân ṭhung a.

³⁹Khante, tâli ringakah kha Tempil sim tiang pangah a sia a, a dang ringakah kha Tempil mâr tiang pangah a sia a; khante, tuipang kha simsak ikilah a sia a.

⁴⁰Hurama khan bêlhei, vutluakhei, tâborhei a siam a. Khangkan, Hurama khan PUMAPA Tempil ranga Rêng Solomona ai siam pêk murdi kha a zoi riai tâk a. Hihei hih ai siam chu a nit: Sumsen chopui inikah, chopui sîpa lubôk, berbu angkana chêng lûm inikahei tuamna zingzirihei, chopui sîpa inpo inikahei vona ranga theisen rilim rizalikah rân inik nika omhei, tâli sômkahei, tâli sunga risilna bêl sômkahei, tuipang, tuipang iṭhungna serâtchal sômleiinikahei, bêlhei, vutluakhei, tâborhei a nit. Kha Tempil mangrua ranga Huraman rêng Solomona ai siam pêkhei murdi kha dâr ritle chi koronga siam a nit.

⁴¹

⁴²

⁴³

⁴⁴

⁴⁵

⁴⁶Rêng thupêk angkan Jordan phâizôla Sokot neh Zerethan kâra bepil munah khan khahei khah a înluan a nit.

⁴⁷Khante, Solomona khan kha bûrbêl murdihei kha a tam ok sikin var iloiin ai sia zel a nit; khasikin, a rik dân iria ni mak e.

⁴⁸Solomona khan PUMAPA Tempila mangrua rang rângkachak iṭha chin a siam sa a, khahei kha: Mâichâm, Pathian zianga lan ibai siana docham,

⁴⁹Mun Rithiang tak maa meiser iṭang sarika nei sômkah, sim tiang ringakah, mâr tiang ringaka ding hei, pârhei, meiser hei, châiche hei,

⁵⁰Kilât hei, meiser hupna hei, tâbor hei, namhoi khêng hei, meilâkna hei, Mun Rithiang tak kotkhâr kopza hei neh Tempil kotkhâr kopza hei kha rângkachak koronga ai siam a nit.

⁵¹Khante, Rêng Solomona khan PUMAPA Tempil ranga ai siam murdi chu a hong zoi rikip riai tâk a. Khanchu, Solomona khan a pa Davida lei ilan sai tâk, tangkaruahei, rângkachak hei neh bûrbêlhei kha a lâk lût a, PUMAPA ina neinunhei lâiah khan a sia tâk a.