Read Biete 1 RÊNGHEI 8 Bible Online

1 RÊNGHEI 8 - Biete bible

1 RÊNGHEI 8

¹Khanungchu, Rêng Solomona khan Israel ruaituhei, a nam lupui murdi neh panam lupuihei murdi kha Jerusalem khuaah Davida khopui Zion ata PUMAPA Thuthlung Bôm kha Tempila rizôn rangin a koibûm riai a.

²Anni chu thla sarina Ethanim thlaa, Dângdi Kût mang zoroah khan an ribûm riai a.

³Khante, ruaituhei kha an ribûm riai zoiin chu thiampuhei khan Thuthlung Bôm kha an rizôn a.

⁴Tempilah an chôi tak a. Thiampuhei neh Levia chihei khan Ritongna Puan-In neh a mangrua murdi khom kha Tempilah an chôi sa a.

⁵Rêng Solomona neh Israel mi murdihei kha Thuthlung Bôm maah khan an ribûm a, bera neh serâtchal itam takkah tep zoi zât ino ribôlnan an lan a.

⁶Khanungchu, thiampuhei khan Thuthlung Bôm kha Tempil sungah an rizôn lût a, Mun Rithiang taka Cherubhei rithla nuaiah khan an sia tâk a.

⁷Cherubhei rithla zâr khan Thuthlung Bôm neh a zônfunghei kha arkhû riai a.

⁸Khante, a zônfung môrhei kha Mun Rithiang tak kotbâi ridîn taka dingin chu imu thei a nit a; khannisela, mun danga rithokin chu imu thei ni mak e, atûn tenah hin kha munah khan a lai om mai a nit.

⁹Aigupta ram ata an suak a, PUMAPA khan Israela richihei zianga thu a thlung lâia Mosian Horeb tlânga lungphêk inikah ai siahei banah chu kha bôm sungah khan îte dang omak e.

¹⁰Khante, thiampuhei kha Tempil ata an hong suak kaneh khan PUMAPA Tempil kha sûm khan a zuang rikhû tâk a.

¹¹PUMAPA roinpuinan Tempil kha a sip riai tâk sikin thiampuhei kha sin itho rangin lût nôk thei khâi mak a.

¹²Khanungchu, Solomona kha a ṭongṭai a: “PUMAPA nangman rivânah khin inî ni sia a, Khan sûm izîng kâra om ner thlang a.

¹³Atûnah hin kumkhuaka ni omna rangin, Tempil chu nang kî sin pêk tâk a nit,” a ti a.

¹⁴Khante, mipuihei kha an iding ṭhup lâiin, Rêng Solomona kha arhêl a, mipuihei tiang mâi a ngat a, mipuihei kha ṭhat a vur a.

¹⁵Hingka hin a ti a, “PUMAPA, Israelhei Pathian chu inpâk rei, ani khan ki pa Davida zianga a ṭonginkung kha a zuang ilen tâk a nit.

¹⁶PUMAPA khan, ‘Aigupta ram ata ki mi Israelhei ki ṭhui suak nî-a rithokin Israelhei nam lâiah tak khua khom hi ker ming omna ranga Tempil sinna rangin lar thlang ngai mang e. Khannisela, ki mi Israelhei ruaitu rangin nangmah, Davida hih nang ki irthlang a nit,’ itia lei iriltu chu amah a nit,” a ti a.

¹⁷Khante, Solomona ngir khan, “Ki pa Davida khan PUMAPA Israelhei Pathian chubai ûnna rang Tempil isin a tum ngai a.

¹⁸Khannisela, PUMAPA khan a ziangah, ‘Ni lungrilah khan ki ta rangin Tempil isin ni tum a, ni thôn ṭhat;

¹⁹khannisela, nangman chu ki Tempil sin no tin e. Ni naipa ni ṭhâlbea inzir ngêi khan ki Tempil chu la sin a ti,’ a lei ti tâk a.

²⁰“Atûnah hin PUMAPA khan a thusîr kha a zuang indet tâk a; PUMAPA lei înkung tâk angkah ngêiin ki pa Davida mun kha ki hong lua tâk a, Israel rêngṭhungmunah khan ki hong iṭhung tâk a, PUMAPA Israelhei Pathian Tempil chu ki hong isin tâk a nit.

²¹Tempilah khan Thuthlung Bôm, ei chibulhei Aigupta ram ata an hong suak a, PUMAPA neh thu an ithlung, Thuthlung riziakna lungphêkhei khom kha Tempilah isian a om tâk,” a ti a.

²²Khanungchu, Solomona kha PUMAPA mâichâmah, Israel mipui ribûmhei mitmuah â ding a, rivân tiang a kut a phar a,

²³a ṭongṭai a, “O PUMAPA, Israelhei Pathian, chungtiang rivânah neh nuaitiang rinêngah hin nangma angkana hi Pathian dang zel omak e. Ni mihei zianga ni thuthlung kha ni vong mai a; an lungril murdia ni mitmuah iṭha takka omhei chungah lungkhamna nen lang ngai a.

²⁴Ki pa Davida zianga ni ṭonginkung ni len a, vuanah hin ni lei iril tâk murdi inpuitlingin ai om a nit.

²⁵Khante, atûnah hin O PUMAPA, Israelhei Pathian, ni bôi ki pa Davida zianga, ‘Ki dânhei nî zôm angkan ner chihein ki dânhei izôm ranga an om dânah an ridîn ngânin chu ner chihei lâiah khatkah chu Israelhei rêngṭhungmuna ṭhung rang risam no tin e,’ itia ni lei înkung tâk kha ilen rangin nang kî ngên a nit.

²⁶Khangkan, O Israelhei Pathian, ni bôi ki pa Davida zianga ni lei înkung tâk murdi kha ringaiihoi takkan inpuitling mai roh.

²⁷“Khannisela, O Pathian rinêngah hin om nuam tak tak ingim a? Rivân pumpuiah khom nî keng ino a nit a, hi ki Tempil sinah hin vâng chu ingkan im nê leng rang tâk na!

²⁸PUMAPA ki Pathian, kei chu ni bôi ki nit a, vuaninta ki ṭongṭaina hi ner ngai pêk inla, nang ki ngênna hi lo ne tluk pêk roh.

²⁹Chubai nang ûnna ranga ni mun rithlang, hi Tempilah hin sûn neh zânin ni mit inlêng mai roh. Hi Tempil tiang ingata ki ṭongṭai hi ner ngai pêk roh.

³⁰Khante, ni bôi neh ni mi Israelhei hin hi mun tiang ingata an ṭongṭai zoron an ngênnahei lei ringai pêk ngai inla; a nit, ni omna rivâna rithokin lei ringai inla, ne lei izâ ngai roh.

³¹“Mi tukhom, a bungtualbôm chunga thil thonsuala inriput, hi Tempila ni mâichâm maah hin a hong a, a thil thonsual no zia fiana ranga vâni a hong risâmin chu,

³²O PUMAPA, rivâna rithokin lei ringai inla, ni bôihei chungthu chu idik takkan rêl pêk inla, thil thonsualtu chu ama lu chung ngêiah a sual man ritlukin kuttum thon la, mi fel chu a felna angkah takin thiam inchangin isua roh.

³³“Ni mi Israelhei hin ni chungah thil an thonsual sika irâlhei kutah an hong tlôm a, ni tiang an hong ngat nôk a, hi Tempilah hin ringaiichîn takka an ṭongṭaia, ngaidam an hong ngênin chu,

³⁴nangman rivâna rithokin lei ringai pêk inla, ni mi Israelhei sualna chu ngaidam inla, an chibulhei nî pêk ramah hin ṭhui ikhîr nôk roh.

³⁵“Ni mihein ni chungah thil an thonsual sika rivân ni khâr a, ruahei a zuang sûr khâi no tikah khan, an sual rileta hi Tempil tiang ingata an ṭongṭaiin chu,

³⁶nangman rivâna rithokin lei ringai inla, rênghei sualna neh ni mi Israelhei sualna ngaidam inla, an fena rang lampui iṭha inmu roh. Khanchu, O PUMAPA, ni mihei an dongtum ranga nî pêk ramah hin rua insûr nôk roh.

³⁷“Hi ramah hin iṭâmhei a zuang tlâk a, ripuihei a zuang lêng a, phâivua lum isêmin manih, ikhâi hong pung sikin manih chimuhei an isiat a, irâlhein ni mihei an hong doi zoron neh ripui sika natna a hong tlung zoron,

³⁸an ṭongṭaina lei ringai pêk roh. Ni mi Israelhei lâia tukhom, an lungril taka rileta hi ni Tempil tiang ingata an ibân hong iphara ṭongṭai kangân chu,

³⁹an ṭongṭaina lei ringai pêk roh. Ni omna rivân ata lei ringai pêkin, ngaidam inla, ṭangpui roh. Nangmah bangin miriamhei lungril ngaituana nî riat a nit. Mi tin an inrup lam angkah takin ngaitua pêk roh.

⁴⁰Khanchu, ni mihei hin kin chibulhei nî pêk ramah an om sung kârkah ni thu zôm thei mai an ti.

⁴¹“Ni mi Israelhei ni no nam dang mi, ram ila taka omin, ner ming roinpui tak neh ni mihei ta ranga ni sintho roinpui takhei iria a, hi Tempila chubai nang iûn rang neh ni zianga ṭongṭai ranga hong kha,

⁴²

⁴³a ṭongṭaina ringai pêk roh. Ni omna rivâna rithokin lei ringai inla, nang a ngên lam angkah takin lei tho pêk roh. Khanchu, ni mi Israelhei angkan rammuala nam tinin ner ming riang an ta, ni thu zôm an ti. Hi Tempil kî sin hih nangmah chubai nang ûnna rang mun a nit iti riang an ti.

⁴⁴“Ni mihei chu an irâlhei idoi ranga an suakin, tak mun khomah om sela, hi ni khopui rithlang tiang mâi ingat neh hi Tempil ni ta ranga kî sin tiang mâi ingata ni ziangah an ṭongṭaiin chu,

⁴⁵an ṭongṭaina neh an nîna khah nangman rivâna rithokin lei ringai pêk inla, anni chu nêna peh roh.

⁴⁶“Ni mihein ni chungah thil an thonsual a, (tute thil thonsual ino omak a,) an chungah ni ning a thik a, irâlhei kutah ni pêk a, irâl ram ilah taka manih, inâi tenga manih khom suakin an ṭhui a,

⁴⁷suaka an ṭhuina ram chu lah ok khom sela, ni mihei khan kha ramah khan an sual an rilet a, an insîr a, thil kin lei thonsual a, dik ino tak neh isual takkan sin kin lei itho tâk a nit, itia suaka ṭhuituhei rama rithoka nang an hong ngênin chu, O PUMAPA an ṭongṭaina lei ringai pêk roh.

⁴⁸An irâl suaka ṭhuituhei ramah an lungril tak neh an ngaituana murdia ni tiang mâi an hong ngat a, kin chibulhei nî pêk ram neh ni khopui rithlang neh hi Tempil ni ta ranga kî sin tiang mâi ingata ni zianga an ṭongṭaiin chu,

⁴⁹an ṭongṭaina lei ringai pêk roh. Ni omna rivâna rithokin lei ringai inla, anni chu lung inkham roh.

⁵⁰An sualna murdi neh ni chunga an thil thonsual chu ngaidam inla, suaka ṭhuituhei khan anmani chu lunginkham riseh.

⁵¹Anni chu hâlinzôina mei, Aigupta ram ata nî ṭhui suakhei, ni mihei ngêi an nit a.

⁵²“Tinrêngthothei, O PUMAPA Pathian, ni mi Israelhei neh an rêng chu lungkhamin en mai inla, ṭangpui ringaia an ṭongṭai ikipah lei ringai pêk ngai roh.

⁵³Kin chibulhei Aigupta ram ata ni ṭhui suak lâia ni dongtum ranga rammuala nam tin lâi ata ni înranhei an nit a,” a ti a.

⁵⁴Solomona khan PUMAPA ziangah a ṭongṭaina neh ngênna murdi a ril zoiin chu, PUMAPA mâichâm maah rikhûk idil a, rivân tiang a kut iphara om kha a thoi a,

⁵⁵rôl iring takkan mipui ribûmhei murdi ṭhat a vur a.

⁵⁶“A ṭonginkung murdi angkah taka a mi Israelhei thlangamna petu PUMAPA chu inpâkin om riseh. A bôi Mosia manga a ṭonginkung ilu tak murdihei kha thu khatkah te khom â tlong inchang mak a.

⁵⁷PUMAPA ei Pathian chu ei chibulhei zianga ai om angkah khan ei ziangah om sela, ne marakin, ne thla tlak no riseh.

⁵⁸A thu zôm thei rangin ne ṭangpui sela; khanchu, a lungdo angkan om ei ta; ei chibulhei thu ai pêk tâk, dânhei neh thupêkhei murdi kha zôm thei ei ti.

⁵⁹PUMAPA ei Pathian khan hi ṭongṭaina neh ngênnahei a zianga ki îthlun hi remai riseh. Israelhei neh an rênghei lunginkham sela, nîn tina an inang murdi chu peh mai riseh.

⁶⁰Khanchu, rammuala nam tinin PUMAPA bang hih Pathian a nit iti riang an ti.

⁶¹Khante, nangni a mihei vuaninta angkah hin a dânhei neh a thupêkhei neh izômin PUMAPA ei Pathian chungah iamom takkan om mai rei,” a ti a.

⁶²Khanungchu, Rêng Solomona neh Israelhei murdi khan PUMAPA maah ribôlna thillan an lan a.

⁶³Khante, Solomona khan PUMAPA maah ringeina thillanin serâtchal sînginikah sânginikah neh bera nuailei sînginikah a lan a. Khangkah khan rêng neh mipuihei murdi khan Tempil chu an ilan a nit.

⁶⁴Kha nî ngirah khan Rêng Solomonan Tempil rikul sung tolâi, Tempil kotmâi tak khom kha a thâr inrithiang a, amakhan hâlrivâm thillanhei, bubâl thillan hei, ringeina thillana sathâihei kha a hâl a. PUMAPA maa dâr mâichâm khan kha thillanhei murdi leng rangin chu a chîn rai a, mâichâma leng ino chu tualah khan ai hâl a nit.

⁶⁵Rêng Solomona neh Israel hatpui ribûmhei khan Tempilah khan Dângdi Kût, sûn sarika sung an mang a. Amakhan Israel ram mâr tiang Hamath pialikota rithoka Israel ram sim tiang Aigupta ramrî dêna mihei kha an hong ribûm a, mi itam takkah an nit.

⁶⁶A sûn iriat nî-ah khan Solomona khan mipuihei kha an in tiang â ṭhîn a. Khante, an rêngkan rêng kha ṭhat an vur a. Khanchu, PUMAPA khan a bôi Davida neh a mi Israelhei chungah a ṭhatna khangkah dôr dôr ân lang sikah khan lungril ifân neh ilôm takkan an in tiang an kîr tâk a.