Read Biete 1 RÊNGHEI 9 Bible Online

1 RÊNGHEI 9 - Biete bible

1 RÊNGHEI 9

¹Rêng Solomona khan PUMAPA Tempil hei, rêng in hei neh in dang danghei a sin zoi riai nungah khan,

²Gibeona a om lâia a zianga a zuang înlâr angkah khan PUMAPA kha Solomona ziangah a zuang inlâr nôk a.

³PUMAPA khan a ziangah, “Ni ṭongṭaina ki lei riat a, hi Tempil nî sin hih kumkhuaka keimah chubai ne ûnna mun rangin kî thâr inrithiang tâk a nit. Ki mit neh ki lungril chu amakhan ai om kumkhua rang tâk a nit.

⁴Khante, nang khom hi thu nang kî pêk angkah taka tho rangin ni pa Davida omdân angkana lungril iṭha tak riput neh lunginṭong idik tak riputin ki mitmuah ni om a, ki thupêkhei neh ki dânhei ni zôm maiin chu,

⁵ni pa Davida zianga, ‘Ner chihei lâia rithokin Israelhei rêngṭhungmuna ṭhung rang risam no tin e,’ itia ki lei înkung angkah khan Israelhei chungah hin ni ram rêngṭhungmun chu kumkhuakan indet ki ta;

⁶Khannisela, nangman manih, ner chihein manih, ne zui kha nin pêt a, nangni kî pêk, ki thupêkhei neh ki dânhei hi nin ipom noa, pathian danghei sin nin va thoa, nin va biakin chu,

⁷ki mi Israelhei nangni kî pêk ram ata hi nangni inrimang ki ta, hi Tempil, keimah chubai ûnna ranga kî thâr inrithiang tâk khom hi marak ki ta; khanchu, Israelhei hi nam tinrênghein zerintêkin rikôk an ta, â sia tiang rikhînaa mang la nîng an ti.

⁸Hi Tempil hih â ramin om a ta, â fe â hong murdi khan arkhêl itin ilâirak an ta, ‘Îtho sik im PUMAPA khan hi ram neh hi Tempil hi hingka dôra ai tho hi na?’ tîng an ti.

⁹Khante, mihein, ‘PUMAPA an Pathian, an chibulhei Aigupta ram ata ṭhui suaktu kha nung an song tâk a, pathian danghei an itûk a, an biak a, an sinhei an tho tâk sika a nit. Khasikin, PUMAPA khan hi siatna murdihei hih an chungah a zuang îthlun pêk tâk a nit hi,’ itin la sâm an ti,” a ti a.

¹⁰Solomona khan PUMAPA Tempil neh ama in kha kum sôminika sung a sin a.

¹¹Tura rêng Hirama khan Solomona kha sidar thinghei, ifâr thinghei neh rângkachak a nang dôrkah, hi in sinnah rangah hin a pêk a. Khante, a sinzoi riai tenan chu Rêng Solomona khan Hirama kha Galili rama khua sôminikah a pêk a.

¹²Hirama kha Tura khua rithokin Solomonan khua ai pêkhei kha ien rangin a fe a, kha khuahei kha â dit lam ni tlak mak a.

¹³Khanchu, Solomona ziangah khan, “Ki suapuipa, hingkana khuahei hih na ni ne ipêk,” a ti a. Khasikah khan atûn tenah hin hi mun hih Kabul[2] ram an iti tâk a nit.

¹⁴Khante, Hirama khan Rêng Solomona kha rângkachak her sângilikah a lei ithon tâk a nit a.

¹⁵Rêng Solomona khan Tempil hei, ama in hei, khopui sua lam tianga ihor inêl rang hei, khopui kulbang isiam ranghein tharum sin itho ranga dânde pôl ai siam a nit. Khante, Hazor khua hei, Megido khua hei, Gezer khua hei, inding ṭhat nôkna rang sin itho ranghei khomin ai mang a nit.

¹⁶Aigupta rêng Faroa khan Gezer khua kha a hang rûn a, a lâk a, kha khuaa om Kananhei kha a that a, kha khua kha a hâl vang a. Khanungchu, a nainu Solomona nupui kha rineina thilpêk rangin Gezer khua kha a pêk a.

¹⁷Amakhah Solomonan ai siam inṭhat a nit. Rêng Solomona khan tharum sin itho ranga ai dânde pôlhei imangin Beth Horon Chuannuai khua hei,

¹⁸Baalat khua hei, Judai ramchâra Tamar khua hei,

¹⁹Solomonan neinun bûmna khua ai nei murdihei, a sakor neh sakor tâli siana khua hei, Jerusalem khua heiah, Lebanon heiah neh a roirêlna ram sung murdia isiam a nang ai ti murdihei kha ai siam zoi tâk a nit.

²⁰Tharum sin itho rangin Solomona khan Kanan mihei richi suanpâr, an ram an chuan pêk lâia Israelhein an ithat riai inohei kha idânden ai mang a nit. Khahei kha Amor mihei, Hit mihei, Periz mihei, Jebus mihei richi suanpâr atûn tena suaka zuang iom maihei kha an nit.

²²Israela richihei kha chu Solomona khan suakin siam mak a, anni chu a sipaihei, a milianhei, a sipai ruaituhei, a tâli neh a sakor chungchuang mihei ruaituhei ichangin a sin an itho a nit.

²³Solomona sin chungchânga tharum sin itho ranga dândehei chunga ruaitu bîk mi rizarngaka sômringakah an iom a nit.

²⁴Solomona nupui, Faroa nainu kha Davida Khopui ata kha ama in ai sin pêkah khan a thon a, kha nungah khan khopui sua tiang pang ram kha Solomona khan ai nêl insip tâk a nit.

²⁵Khante, Solomona khan PUMAPA ta ranga mâichâm ai siamah khan kum tin voi thumkah hâlrivâm thillan neh ringeina thillan kha a lan ngai a. PUMAPA maa mâichâmah khan namhoihei ai hâl sa ngai a nit. Khangkan Tempil kha a sin zoi diam tâk a.

²⁶Rêng Solomona khan Edom rama Tuipui Sen rikam Eloth kôla om Ezion Geber munah khan rikuang itam takkah a siam a.

²⁷Rêng Hirama mi rikuangpuhei, tuikhangliana lei rimang mai tâk ngaihei kha Solomona mihei isan rangin a tir a.

²⁸Ofir ramah an fe a, khantak ata kha rângkachak her sînglei sângilikah an hong chôi a, Rêng Solomona ziangah an hong pêk a.