Read Biete 2 RÊNGHEI 1 Bible Online

2 RÊNGHEI 1 - Biete bible

2 RÊNGHEI 1

¹Rêng Ahaba thi nungah khan Moabhei kha Israelhei chungah an rihel tâk a.

²Israel Rêng Ahazia kha Samaria khuaa a chontan inchung thîngripal tukvera rithokin a tlâk a, a nat ok a. Khanchu, mi a tir a, an ziangah, “Fe unla, hi ki natna hi kî ṭhat suak nôk thei rang manih, Filistia mihei khopui Ekron pathian Baalzebuba[1] ne va sôn pêk ta u,” a ti a.

³Khannisela, PUMAPA vântirtôn khan Tibse mi zânthla Elija ziangah, “Thoi inla, Samaria khua rêng mi tirhei lei ritongpui rangin hang fe roh. An ziangah, ‘Israel ramah hin Pathian a om khâi no sikin im ai nit Ekron kho pathian Baalzebuba kha isôn ranga nin ife hi,

⁴PUMAPA khan hingka hin a ti, zâlmuna nî kâi kha zuang ṭum nôk khâi no tin, thi ngêt ngêt ni ti,’ a ti,” iti rangin a tir a. Elija khan PUMAPA thupêk lam angkah khan a tho a.

⁵Khanchu, rêng mi tirhei kha rêng ziangah an hong kîr nôk a, ani khan an ziangah, “Ithôm nin hong ikîr nôk?” a ti a.

⁶Anni khan a ziangah, “Mi khatkah ne sôn rangin a lei hong a, kin ziangah, ‘Fe unla, nangni hong itirtu rêng ziangah khan kîr nôk unla, a ziangah, PUMAPA khan hingka hin a ti; Israel ramah hin Pathian a om khâi no sikin im ai nit Ekron khua pathian Baalzebuba kha isôn ranga mi nî tir? Khasikin, zâlmuna nî kâi kha ṭum nôk khâi no tin a, thi ngêt ngêt ni ti, a ti, ti rei,’ ai ti a nit,” an ti a.

⁷Rêng khan, “Kha mi khah ingkana mîm ai nit?” a ti a.

⁸Anni khan an sâm a, “Samul puan a sil a, a kong savun kongkhitin a khit,” an ti a. Ani khan, “Tisbe mi Elija kha a nit,” a ti a.

⁹Khanungchu, rêng khan sipai ruaitu neh sipai sômringakah Elija hang iṭhui rangin a tir tâk a. Sipai ruaitu khan Elija kha itlângsîpah a lei iṭhung lâi takin a hang mu a, a ziangah, “Nangmah Pathian mi, rêngin izuang rangin thu nang ai pêk a nit,” a ti a.

¹⁰Elija khan, “Pathian mi ki nitin chu rivân ata mei zuang tla sela, nangmah neh ni lômahei kha nangni kângrivâm vang riseh,” a ti a. Khanchu, voikazelin rivân ata mei a zuang tlâk a, sipai ruaitu neh a lômahei kha a kângrivâm vang tâk a.

¹¹Rêng khan sipai ruaitu dang neh sipai sômringakah a tir nôk a. Sipai ruaitu khan Elija ziangah, “Nangmah Pathian mi, rêngin izuang zel rangin thu nang ai pêk a nit,” a ti a.

¹²Elija khan, “Pathian mi ki nitin chu rivân ata mei zuang tla sela, nangmah neh ni lômahei kha nangni kângrivâm vang riseh,” a ti a. Khanchu, voikazelin Pathian mei kha rivân ata a zuang tlâk a, sipai ruaitu neh a lômahei kha a kângrivâm vang tâk a.

¹³Â thar vangin rêng khan sipai ruaitu neh sipai sômringakah a tir nôk a. Kha sipai ruaitu kha itlângah a hang fe a, Elija makungah khan rikhûk a dil a, a ziangah, “O Pathian mi, ki ringna neh hi ni bôi mi sômringakahei ringna hi lunginkham inla, zua roh.

¹⁴Sipai ruaitu inikahei neh an lômahei kha rivân ata mei zuang itla khan a kângrivâm tâk a; keima ringna hi chu lungkhamin ne zua pêk roh,” a ti a.

¹⁵PUMAPA vântirtôn khan Elija ziangah, “Anmani lômah hin fe roh, ṭi no roh,” a ti a. Khanchu, Elija kha a thoi a, anmani lômin rêng imuh rangah khan a fe tâk a.

¹⁶Rêng ziangah khan, “PUMAPA khan hingka hin a ti, ‘Ekron kho pathian Baalzebuba sôn rangin mihei nî tir kêng na hi? Israel ramah hin isôn rang Pathian a om khâi no sikin im ai nit? Khasikin, zâlmuna nî kâi khah ṭum nôk khâi no tin, nî thi ngêt rang a nit,’ a ti,” a ti a.

¹⁷Khanchu, Elija thuril PUMAPA thu angkah khan Ahazia kha a thi tâk a. Ahazia khan nai ipa nei mak a; khasikin, a unaipa Jorama kha Judai ram rêng Jehosafata naipa Jehorama inlal kum iniknaah khan arthûlin a hong inlal tâk a.

¹⁸Ahazia thiltho thurchi danghei murdi kha Israel Rênghei Thurchi Riziakna Bu-ah ai chuang riai a nit.