Read Biete 2 RÊNGHEI 10 Bible Online

2 RÊNGHEI 10 - Biete bible

2 RÊNGHEI 10

¹Samari khuaah khan Ahaba richihei mi sômsarikah an om a. Jehua khan lekhathon arziak a, khopui ruaituhei, ulianhei neh Ahaba naihei enkoltuhei ziangah a thon a. Lekhathonah khan,

²“Rêng naihei kha nin ziangah an iom a nit a, tâlihei, sakorhei, râlthluk hei, kulpui inei khua hei khom nin kuta om an nit a. Khasikin, hi lekha hih nin mu kaneh,

³rêng naihei lâia mi â ṭha tak neh â fel tak rithlang suak unla, a pa rêngṭhungmunah inṭhung unla, nin pu thar inzôk rangin doipui rei,” itin arziak a.

⁴Khannisela, Samaria roirêltuhei kha an rilo ân thing tâk a, “Rêng Jorama neh Rêng Ahazia hei khom khan an idoi inê no a nit a, eimani vâng hin ingkan im Jehua kha ei inê rang tâka na?” an ti a.

⁵Khanchu, rêng insunga ruaitu takhei, khopui optuhei, ulianhei, rêng nai enkoltuhei khan Jehua ziangah, “Ne somhei kin nit, itho ranga ni ne iti murdi chu thông kin ti. Khasikin, tute rêngin siam no ning ung; nangman ṭha ni ti lam angkah takin tho roh,” itin mi an tir a.

⁶Khante, an ziangah, “Ki tianga ṭang nin nit a, ki thu nin ôi rangin chu nin pu rêng Ahaba naipahei lu lah unla, naktûk hingka tik zoroah hin Jezreel khuaah ki ziangah hong chôi rei,” itin lekha a thon nôk a. Rêng Ahaba nai sômsarikahei kha khopui ruaitu, anmani enkoltuhei kuta om an nit a.

⁷Jehua lekha thon kha an mun chu, Samari khua ruaituhei khan rêng nai sômsarikahei kha an man a, an that a, an lu khah kokvârah an thun a, Jezreel khuaah Jehua ziangah an thon tâk a.

⁸Khante, thangkoi a hong tlung a, “Rêng naihei lu kha an hong chôi tâk,” itin Jehua kha a ril a. Jehua khan, “Kul kotbâi kôlah, mun inikan buk unla, naktûk idênin om riseh,” a ti a.

⁹Atûkah khan kul kotbâi kôlah a va fe a, khantaka mi lei iomhei ziangah khan, “Rêng Jorama kha ki phiarrûka, ki lei that tâk a, nangmani chu îte rinang mak chei u. Khannisela, hihei murdi hih tu ithat im ai nit?

¹⁰Ahaba insungkuahei chungchânga PUMAPA thusîr khah ai tlung riai rang a nit iti reh rei. PUMAPA khan â som Elija manga a îsîr kha a zuang ilen tâk a nit hih,” a ti a.

¹¹Khanungchu, Jehua khan Jezreel khuaa Ahaba suapuihei, a milian murdihei, a mal murdihei neh a thiampuhei kha khatkah khom zua viat loiin a that infâi riai a.

¹²Jehua kha Jezreel khua ata a suak a, Samaria a fe tâk a. Lampuiah “Berapuhei riabuk” an iti ngaiah khan,

¹³Juda Rêng Ahazia suapuihei a mu a, “Tuhei im nin init,” a ti a. Anni khan, “Ahazia suapuihei kin nit a, Jezreel khuaah rêng insungkuahei neh rêngnu Jezebeli naihei chibai zu bûk rang kin iti a nit,” itin an sâm a.

¹⁴Jehua khan, “An iringin man rei,” itin a sipaihei thu a pêk a. Khanchu, an iringin an man a, amakhan, Beth-Eked[6] khur kôlah khan an that a. An rêngkan mi sômilika inikah an nit a, khatka lua an izua no a nit.

¹⁵Jehua kha khantak ata arthok nôk a, lampuiah khan Rekaba naipa Jonadaba khan a lei hong don a. Jehua khan chibai a bûk a, a ziangah, “Ner ngaidân neh ker ngai dân ar-ang a nit. Ne thlop ingim?” a ti a. Jonadaba khan a sâm a, “Nang thlop ki ti,” a ti a. Jehua khan, “A nitin chu ni kut ne hong peh roh,” a ti a. Khanchu, a kut a hang pêk a, Jehua khan a tâli sungah a kâi lût a,

¹⁶a ziangah, “Ki ziangah hong san la, PUMAPA ta ranga ṭhatnem ker ngaizia hi hong mu rêng rêng roh,” a ti a. Khanungchu, an ruaikan munkan a tâliah an chuang a, Samaria khua tiang an fe tâk a.

¹⁷Samaria an va tlungin chu Jehua khan Ahaba suapui Samaria la om isunhei kha a that riai a, khatka lua zua mak a. Elija zianga PUMAPA thusîr kha a zuang itlung tâk a nit.

¹⁸Jehua khan Samaria khua mipuihei murdi kha a koibûm a, an ziangah khan, “Ahaba khan Baal pathian sin kha ichîntekah bang ai tho a nit a; khannisela, keiman chu natinsat takkan kî tho rang a nit.

¹⁹Khasikin, Baala zânthla murdihei, chubai iûntu murdihei neh a thiampu murdihei ki ziangah hin hong koibûm ta u. Tute rikip loiin om no riseh; Baala ziangah hin ribôlna roinpui tak ilan rang ki nei a, tukhom arkip ino kangân chu ring viat no nih,” a ti a. Khannisela, Jehua khan Baala betuhei kha ithat itumin vârrilet takkan ai tho a nit.

²⁰Khanungchu, Jehua khan, “Baala biakna rang inkhômpui nikhua inkung rei,” a ti a. Khanchu, nikhua an khit tâk a.

²¹Jehua khan Israel ram pumpuiah thu a thang inthei a; khanchu, Baala chubai ûntuhei murdi kha an hong a, â ṭang ino rêng rêng omak a. An rêngkan Baala Tempilah khan an fe a, Baala Tempil kha kotbâia rithoka bangkôp idênin an sip tâk a.

²²Khanungchu, Jehua khan zakorfual enkoltu thiampu ziangah, “Baala chubai ûntuhei murdi hi zakorfual hong lah pêk roh,” a ti a. Khanchu, zakorfual kha a hong chôi pêk a.

²³Kha rizoiin chu Jehua kha Rekaba naipa Jonadaba neh Baala Tempila khan an lût a; Baala chubai ûntuhei ziangah khan, “Hi muna hin Baala chubai iûntuhei bang ti no chu PUMAPA chubai iûntuhei rêng rêng hong no riseh,” a ti a.

²⁴Khanungchu, amah neh Jonadaba kha ribôlnahei neh hâlrivâm thillan ilan rangin an lût tâk a. Jehua khan putiang mi sômiriatkah a lei inding ṭian a, “Hi mihei hih an rêngkan nin that riai rang a nit, nin isuan chu â suatu khan a ringna rithûlah khan ama ringna kha ichân a ti,” a ti a.

²⁵Jehua khan hâlrivâm thillan a lan zoi kaneh chu vêngtu sipaihei neh an ruaituhei ziangah, “Va lût unla, va that rei, tute inzôk no rei,” a ti a. Khanchu, khandaiin an rivât a; an rêngkan an that riai a, an ruakhei kha putiang an hong pai suak a. Khanungchu, Baala tempil sungrilah khan an lût a,

²⁶khantaka mirmilhei kha an lâk suak a, an hâl a.

²⁷Khante, Baala rilim lungphunhei kha an isim a, Baala tempil kha an isiat a, atûn tenah hin vâikôm fena munin an imang tâk a nit.

²⁸Khangkah khan Jehua khan Israel ram ata Baala chubai ûnna kha a îsiat a nit.

²⁹Khannisela, Nabata naipa Jeroboama sualna, Israelhei a ṭhui insualna kha Jehua khan mah vâng mak a, amakhah Bethel khua neh Dan khuaa rângkachak serâtte rilim chubai ûnna kha a nit.

³⁰PUMAPA khan Jehua ziangah, “Ki mit itlung takka thil ni tho sik neh ki lungril nuam dân angkah taka Ahaba insungkuahei chungah ni tho sikin ni chihei chu rikhûk ilina dênin Israelhei rêngṭhungmunah iṭhung an ti,” a ti a.

³¹Nikhomsela, Jehua khan PUMAPA, Israelhei Pathian dân kha a lungril murdin zôm mak a, Israelhei suala ṭhuitu Jeroboama nunchan kha a lâk ual tâk a.

³²Kha lâiah khan PUMAPA khan Israelhei ram kha ân chîn pêk thiai tâk a. Khanchu, Suria rêng Hazaelan Israel ram kha a hong rûn a.

³³Jordan sak tiang ram, Gilead hei, Gad hei, Reuben hei neh Manase hei omna ram Arnon vadung phâia Aroer hei, an khopui Gilead neh Basan ram idênin a lâk tâk a.

³⁴Jehua thurchi danghei, a thiltho murdihei neh a thiltho theizia murdihei kha Israel Rênghei Thurchi Riziakna Bu-ah riziak inchuang riai a nit.

³⁵Jehua kha a thi a, Samaria khuaah khan an phûm tâk a. Khante, a naipa Jehoahaza kha arthûlin ân lal tâk a.

³⁶Kum sôminikah kum iriatka sung Samaria khuaah khan Jehua kha Israelhei chungah a înlal a nit.