Read Biete 2 RÊNGHEI 11 Bible Online

2 RÊNGHEI 11 - Biete bible

2 RÊNGHEI 11

¹Rêng Ahazia nu Athali khan a naipa a thi iti a lei riat kaneh chu a thoi a, rêng naihei murdi kha ithat riai rangin thu a pêk a.

²Ahazia naipa Joasa kha chu a zôk a. Rêng Jorama nainu Jehosebi, Ahazia farnu khan ai thup a nit. Â don ngaitunu neh Tempil chontan khatkatah Athali mu nona rangin a thup a, ithat ai nit khâi ino a nit.

³Athali inlal sung kum irukkah kha Jehosebi khan Joasa kha Tempilah a thup a, idâirek kan ai enkol ngai a nit.

⁴Khannisela, a kum sarinaah khan thiampu laltak Jehoiada khan rêng vêngtu sipai rizaka ruituhei neh rêng in vêngtu sipai rizaka ruituhei kha a koi a, a thil tho tum kha â ril a, Tempil sungah ṭongrikhâmin ṭha an tipui a. Khanchu, Rêng Ahazia naipa Joasa kha ân mu a,

⁵an ziangah, “Sabatnîa sin itho ranga nin hong tikin mun ithumka ṭhena mun khatkan rêng in kha vêng nin ta;

⁶mun ithumka ṭhena mun khatkah kha Sur kul kotbâiah om nin ta; a dang mun ithumka ṭhena mun khatkah kha vêngtuhei nungtianga kul kotbâiah om nin ta; khangkah khan in kha nin rung rang a nit.

⁷Nin lâia lôm inikah sabatnîa ringam ranghei kha rêng irung rangin Tempilah an om rang a nit.

⁸Mi tinin riamrei ichôiin Rêng Joasa kha rung nin ta, a fena kipah nin zui rang a nit. Tukhom hual sunga hong ilût murdi chu nin lei that rang a nit,” itin thu a pêk a.

⁹Sipai ruaituhei khan thiampu Jehoiada thupêk angkah khan an tho a, mahni lôm seng sabatnîa hong ranghei neh sabatnîa ringam ranghei kha an ṭhui a, thiampu Jehoiada ziangah an fe a.

¹⁰Khante, thiampu khan sipai ruaituhei kha Tempil sungah an isia ngai pial Davida feihei neh iphohei kha a pêk a.

¹¹Tempil matiangah khan vêngtu sipaihei, riamrei ichôi chitin, rêng irung rangin an ngîr hual khup a.

¹²Khanungchu, Jehoiada khan rêng naipa Joasa kha a hang ṭhui suak a, rênglukhum ân khum a, rêng omdân rang riziakna dân bu kha a pêk a. Khanungchu, Joasa kha riak ân rithu a, rêngin ân puang tâk a. Mipuihei khan an kut an iben a, “Rêngpa chu dam sôt riseh,” itin an ipai a.

¹³Vêngtu sipaihei neh mipuihei rihu kha Athalin a lei riatin chu, rimot takkan PUMAPA inah mipuihei lâiah a va fe a.

¹⁴Amakhan balam angkan rêng ithar kha Tempil kotbâi icho bula ding kha an va mu a. Sipai ruaituhei neh bekul itumtuhei khan rêng kha an rikul a, kha rama mipuihei murdi kha râifân takkan an ipâi a, bekul an tum a. Khanchu, Athali khan a puanhei â potthlêr a, “Phiarrûkna a nit tâk hih,” itin â khêk a.

¹⁵Thiampu Jehoiada khan Athali kha Tempil hual sunga that kha nuam mak a; khanchu, sipai ruaituhei ziangah khan, “Vêngtu sipai inrân kârah khan ṭhui suak rei, tukhom hong inzôk itum murdi chu lei ithat rang a nit,” itin thu a pêk a.

¹⁶Khanungchu, an man a, rêng inah an ṭhui a, Sakor Kotbâi an iti-ah khan an that tâk a.

¹⁷Thiampu Jehoiada khan PUMAPA neh rêng Joasa neh mipuihei kha PUMAPA mihei an hong nitna rangin ṭong ân rikhâm a. Rêng neh mipuihei kârah khom thuthlung a siam a.

¹⁸Khanungchu, mipuihei kha Baala Tempilah an fe a, an ṭhet isim a, a mâichâmhei neh mirmilhei kha an ikhoi chit a, Baala thiampu Matana khom mâichâm kôlah khan an that a. Thiampu Jehoiada khan Tempil vêngtu rang mi a sia a.

¹⁹Khanungchu, amah neh sipai ruaituhei, rêng vêngtu sipaihei, rêng in vêngtu sipaihei khan Tempil ata rêng kha rêng in tiang an fepui a, mipui murdi khan an hong zui a. Joasa kha Vêngtuhei Kotbâi an iti a khan a lût a, rêngṭhungmunah khan â ṭhung tâk a.

²⁰Kha rama mi murdi kha an lôm a, Athali kha rêng inah an that tâk sikin khopuiah khan îte buaina omak a.

²¹Joasa kha Juda rêng a changah khan kum sarika mi a nit.