Read Biete 2 RÊNGHEI 12 Bible Online

2 RÊNGHEI 12 - Biete bible

2 RÊNGHEI 12

¹Israel Rêng Jehua inlal kum sarina kumah khan Joasa kha Judahei chungah a hong înlal a nit. A nu riming kha Zibi, Beerseba khuaa mi a nit.

²Thiampu Jehoiada khan ân risei ngai sikin Joasa khan a damsung kârkah PUMAPA mitmuah thil iṭha a tho ngai a.

³Nikhomsela, nam dang pathian biakna bôlkuang kha chu paih inrimang mak a, kha bôlkuangheiah khan mihei an la irbôlin namhoi an lai hâl mai ngai a nit.

⁴Joasa khan thiampuhei a koi a, an ziangah, “PUMAPA ina thillan mihein an hong pêk ruala an hong ichôi ngai, a ṭhen chu thillan lâia lan sa ngêt rang an itihei a nit a, a ṭhen chu ngaihoi thilpêk a nit; kha ngaihoi thilpêkhei kha chu lei rê inṭha mai ngai rei.

⁵Thiampu tinin an sin an lei itho pêkhei hong ichôi sum chit lei enkol an ta, kha sum kha Tempil siam inṭhatna ranga a nang lam taka mang rang a nit,” a ti a.

⁶Khannisela, Rêng Joasa inlal kum sôminikah kum ithumna tenan khom thiampuhei khan Tempil ṭetna munhei kha la siam inṭha la ni mak a.

⁷Khanchu, Rêng Joasa khan thiampu Jehoiada neh thiampu danghei kha a koi a, an ziangah, “Îtho sik im Tempil nin la siaminṭhat no? Atûna rithokin chu sum nin imuhei kha rê khâi no unla, siam inṭhat nan peh suak ta rei,” a ti a.

⁸Thiampuhein sum rê khâi ino khah ṭha an ti a, Tempil ṭetna munhei la siam hi no rang khomin ṭha an ti a.

⁹Khanungchu, thiampu laltak Jehoiada khan bôm a siam a, a sîng â ver inri-ong a, mâichâm kôlah, Tempil lûtna changtiang pangah ân ṭhung a. Tempil lûtna kôla thiampu lei iom kha Pathian zianga thilpêk hong ipetuhei thilpêk kha a lei dong a, bômah khan a thun mai ngai a.

¹⁰Bôma khan tangka a tam ual ikipah rêng lekhaziaktu neh thiampu laltak Jehoiada kha an hong a, tangka khah an inzôi a, a rik dôr an irchik tap ngai a nit.

¹¹Tangka nit zâk kha an riziak zoiin chu Tempil isintuhei chunga ruaituhei kutah an pêk a, anni khan sinthotu kutithiamhei lo an pêk ngai a.

¹²Lungisuk ngaihei, lung ipêl ngaihei khan Tempil siaminṭhatna rang thinghei neh lunghei an richôk a, sum imang nangna murdiah an imang ngai a nit.

¹³Tholôm poisa kha chu Tempila tangkarua kilât hei, tâbor hei, bekul hei, meiser enkolna mangrua hei, rângkachak neh tangkarua bûrbêl chi dang danghei siam nan chu mang viat mak e.

¹⁴Sinthotu lo neh Tempil siamna ranga mangruahei richoh nan bang an imang ngai a nit.

¹⁵Sinthotuhei kha an iamom tak tak a, an sum mang dân khom enpui ual ngai mak a.

¹⁶Siat ribôlna thillan neh sual ribôlna thillan ruala an hong ipêkhei kha chu bôm sungah khan thun sa ngai mak a; amakha chu thiampuhei dongtum a nit.

¹⁷Kha lâi zoroa khan Suria Rêng Hazaela khan Gath khua a hang doi a, an hang lâk a; khanungchu, Jerusalem hong idoi a tum a.

¹⁸Juda Rêng Joasa khan a matona rêng Jehosafata hei, Jehorama hei, Ahazia hei lei ilan tâk thil iser murdi kha a lâk a, amah ngêiin ai lan khom kha â khop sa a; Tempil neh rêng in sum bôma rângkachak kha a lâk riai a, a rêngkan Suria Rêng Hazaela kha loman thilpêkin a pêk a. Khanchu, Hazaela khan Jerusalem ata a sipaihei kha a ṭhui ikhîr nôk tâk a.

¹⁹Rêng Joasa thurchi danghei, a thiltho murdihei kha Juda Rênghei Thurchi Riziakna Bu-ah inchuang riai a nit.

²⁰Khante, Rêng Joasa kha a milianhei inikan an phiarrûk a, Beth-Milo an iti Silla zuk panna lampui Jerusalem sua tiang pang rinêng an inêl insipa in an isinah khan an that a. Â thattuhei kha Simeatha naipa Jozakara neh Somera naipa Jehozabada an nit. Khanchu, Joasa kha Davida khopuia rênghei thlânah khan an phûm a; a naipa Amazia kha arthûlin ân lal tâk a.