Read Biete 2 RÊNGHEI 13 Bible Online

2 RÊNGHEI 13 - Biete bible

2 RÊNGHEI 13

¹Juda Rêng Ahazia naipa Joasa inlal kum sôminika ithumka kumah khan Jehua naipa Jehoahaza kha Israelhei chungah Samaria khuaah a hong inlal a, kum sômleisarikah a înlal a nit.

²A matona Rêng Jeroboama angkan PUMAPA mitmuah thil ṭhano tak a tho ngai a, Israelhei kha sualah a ṭhui a, a sual lampui kha mah tlak mak a.

³Khanchu, PUMAPA kha Israelhei chungah khan a ning a thik tâk a, Suria Rêng Hazaela neh a naipa Benhadada khan Israelhei kha an înê mai kha ai phal ngai a nit.

⁴Khanungchu, Jehoahaza khan PUMAPA ziangah a ṭongṭai a, Suria rêngin Israelhei a sirde natinsat tlia kha PUMAPA khan a mu a, a ṭongṭaina a sâm tâk a.

⁵Khanchu, PUMAPA khan Israelhei kha ruaitu a tir pêk ngai a, anni khan Suriahei kut ata an inzôk a; khanchu, matona angkan Israelhei kha râlringamin an iom nôk ngai a nit.

⁶Khannisela, Rêng Jeroboaman Israelhei a ṭhui insualna sual kha la mah mak a, an la tho mai a, Samaria khuaah khan Aseri rilim khom kha a lai om mai a nit.

⁷Jehoahaza khan sakor chungchuang mi sômringakah neh tâli sômkah neh sipai sîngkah ti no chu nei khâi mak a; Suria rêng khan a dang kha chu a that pêk riai a, kea chîlpol vâivut indi angkah dôrkan ai siam a nit.

⁸Jehoahaza thurchi danghei, a thiltho murdihei, a thiltho theiziahei kha Israel Rênghei Thurchi Riziakna Bu-ah inchuang riai a nit.

⁹Jehoahaza kha a thi a, Samaria khuaah khan an phûm a; khante, a naipa Jehoasa kha arthûlin a hong inlal tâk a.

¹⁰Juda Rêng Joasa inlal kum sômithumka sarina kumah khan Jehoahaza naipa Jehoasa kha Israelhei chungah Samaria khuaah a hong inlal tâk a, kum sômlei kum irukka a înlal a nit.

¹¹PUMAPA mitmuah thil ṭhano tak a tho ngai a, Israelhei suala ṭhui lûttu rêng Jeroboama sualna murdihei kha mah mak a; ai zui mai a nit.

¹²Jehoasa thurchi danghei, a thiltho murdihei, Juda Rêng Amazia a doi lâia a thiltho theizia kha Israel Rênghei Thurchi Riziakna Bu-ah inchuang riai a nit.

¹³Jehoasa kha a thi a, Samaria khuaa rênghei thlânah an phûm a; a naipa Jeroboama nikna kha a rêngṭhungmunah a hong iṭhung tâk a.

¹⁴Khante, Zânthla Elisa kha natnan rik takin a hong nat tâk a; zâlmunah a om lâiah khan Israel rêng Jehoasa kha a ziangah a zu fe a, iṭap pumin, “Epa, Epa, Israelhei rung inzôktu roinpui tak ni lei nit,” a ti a.

¹⁵Elisa khan a ziangah, “Phel neh thalhei hong chôi ta,” a ti a. Jehoasa khan phel neh thalhei kha a hong chôi a.

¹⁶Khanchu, Elisa khan Israelhei rêng ziangah khan, “Thal ikâp ranga rifo diamkan phel kha itu roh,” a ti a. Rêng khan â tûka; khanchu, Elisa khan rêng kut chungah a kut arngat a.

¹⁷Khanungchu, ani khan, “Sak tiang tukver hang iong ta,” a ti a. Rêng khan Suria ram isong tukver kha a hang iong a. Elisa khan, “Kâp roh,” a ti a. Rêng khan a hang kâp kaneh chu Elisa khan, “Suriahei inêna rang PUMAPA thal ni nit; Suriahei neh Afek khuaah khan ridoi nin ta, anni chu inê vang ni ti,” a ti a.

¹⁸Khanungchu, Elisa khan rêng ziangah, “Thalhei kha hang rût roh,” a ti nôk a; khanchu, a hang rût a. Rêng ziangah khan, “Kha thalheiah khan rinêng zuk sun roh,” a ti a. Rêng khan voi thumkah a zuk sun a, a bâng zel tâk a.

¹⁹Khanchu, Elisa kha a chungah a ning a thik tâk a, “Voi ringakah, voi rukka ten ni sun rang kêng ai nit; khanchu, Suriahei kha rimang phar rakkan ni înê rang a nit a. Khannisela, Suriahei kha voi thumkah bang ni înê rang a nit tâk hih,” a ti a.

²⁰Elisa kha a thi a, an phûm tâk a. Kum tin Moabhei khan Israel ram kha an hong rûn ngai a.

²¹Voikah chu mi khatkah an phûm rang lâi takin Moab nam pôl khatkah an mu a; khanchu, ruak kha Elisa thlânah khan an pai lût rak a, lâizâm an tho tâk a. Kha ruak khan Elisa ruhei a zuk del kaneh, kha mi khah a hong ring nôk a, a hong iding zel tâk a.

²²Suria rêng Hazaela khan Jehoahaza inlal sung kârkah Israelhei kha a sirde mai a.

²³Nikhomsela, PUMAPA khan Abrahama, Isaka neh Jakoba hei zianga thu a thlung sikin anni kha lung ân kham a, a kan a, a uksak a, anmani kha inrimang nuam mak a. A mihei kha tiklâi khomin ringil ngai mak a.

²⁴Suria rêng Hazaela kha a thi a, a naipa Benhadada kha arthûlin, a hong inlal tâk a.

²⁵Jehoahaza naipa Jehoasa khan Hazaela naipa Benhadada kut ata, a pa Jehoahaza a rûn a, khua a lei ilâk pêkhei kha a sut nôk a. Jehoasa khan voithumkah Suria rêng Benhadada kha a înê a nit.