Read Biete 2 RÊNGHEI 14 Bible Online

2 RÊNGHEI 14 - Biete bible

2 RÊNGHEI 14

¹Israel Rêng Jehoahaza naipa Jehoasa inlal kum inikna kumah khan Juda Rêng Joasa naipa Amazia kha a hong inlal a.

²Ân lal phutah khan kum sôminika kum ringaka mi a nit a, Jerusalemah khan kum sôminikah kum ikuakkah a înlal a nit. A nu riming kha Jehoadini a nit a, Jerusalem mi a nit.

³Rêng Amazia khan PUMAPA mitmuah thil ifel tak a tho ngai a, a pu Davida kha chu tluk mak a, a pa Joasa thiltho angkah murdi kha ai tho ngai a nit.

⁴Ani khom khan nam dang pathian an biakna bôlkuang kha chu iseh ual mak a, kha munah khan mihei kha an la irbôl maiin namhoi an lai hâl mai ngai a nit.

⁵Amazia khan thuneina a hang itûk indet kaneh chu a pa lei ithattuhei khah a that a.

⁶Khannisela, kha mithattu naihei kha chu that mak e; Mosia Dân bua, “Naihei sual sikin pahei ithat rang ni mak a; pahei sual sikin naihei ithat rang ni mak e, mi tin mahni sual sikin an ithi rang a nit,” iti a PUMAPA thupêk dân kha ai zôm a nit.

⁷Amazia khan Edomhei kha Ichi Phâiah sîngkah a that a; Sela khua a doi a, a lâk a, armingah khan Joktheel a be a, atûn tenan kha riming kha a la irput mai a nit.

⁸Khanungchu, Amazia khan Israel rêng Jehoasa risual a ot a.

⁹Khannisela, Rêng Jehoasa khan Rêng Amazia ziangah, “Voikah chu Lebanon tlângah riling kungin Lebanon tlânga sidar thing ziangah, ‘Ni nainu kha ki naipa nupuiin innei roh,’ a ti a. Khante, Lebanon tlânga ramsa an hong a, riling kung kha an hong chîl inlîr chit a.

¹⁰Atûnah hin Amazia, Edomhei chu ne nê tâk a, ni lungril a hong irpâk tâk a nit hih. Ner ming inthangna khan ne lung intluk inla, inah khan om ṭian roh. Nangmah neh Juda ram mipuihei siatna rangin îte ichok suak no roh?” itin mi a tir a.

¹¹Khannisela, Amazia khan lei ringai nuam mak a. Khanchu, Rêng Jehoasa kha a mihei neh a hang fe a, Juda Rêng Amazia neh khan Judai ram Beth-Semes khuaah mâi ritongin an risual tâk a.

¹²Amazia sipaihei kha Israelhei kutah khan an tlôm tâk a; mi tin mahni in tiang lâizâm an tho tâk a.

¹³Israel Rêng Jehoasa khan Juda Rêng Amazia kha Beth-Semesah khan a man a, Jerusalem khua tiang a pan a, Jerusalem kulpui kha Efraim Kotbâia rithoka Kul Kôina Kotbâi idênin mûk rizalikah sar â sim a.

¹⁴Khante, PUMAPA Tempil neh rêng ina richon sia bûmna ata rângkachak neh tangka neh bûrbêl murdi kha a lâk a, Samaria khuaah a chôi a. Tângirên rang mihei khom a ṭhui sa a.

¹⁵Jehoasa thiltho thurchi danghei, a thiltho theiziahei, Juda Rêng Amazia a doi thuhei kha Israel Rênghei Thurchi Riziakna Bu-ah inchuang riai a nit.

¹⁶Jehoasa kha a thi a, Samaria khuaah Israel rênghei thlânah khan an phûm tâk a. A naipa Jeroboama nikna kha arthûlin a hong inlal tâk a.

¹⁷Juda Rêng Amazia kha Israel Rêng Jehoasa thi nungin kum sômlei kum ringakah a la dam a.

¹⁸Amazia thurchi danghei kha Juda Rênghei Thurchi Riziakna Bu-ah inchuang riai a nit.

¹⁹Jerusalem khuaah khan Amazia that rangin phiarrûkna a om a; khanchu, Lakis khuaah lâizâm a tho a; nikhomsela, Lakis khuaah khan â râlhein an rizûl thal a, amakhan an that tâk a.

²⁰A ruak kha sakorin Jerusalem khuaah an fepui a, Davida khopui rênghei thlânah khan an phûm tâk a.

²¹Khanungchu, Juda mipuihei khan a naipa kum sômlei kum irukkah mi, Uzia kha a pa Amazia rithûlin rêngin an siam tâk a.

²²A pa thi nungah khan Uzia khan Elath khua kha a lâk kîr a, a siam inṭhat nôk a.

²³Juda Rêng Joasa naipa Amazia inlal kum sômlei ringana kumah khan Israel Jehoasa naipa Jeroboama nikna kha Samaria khuaah a hong inlal a, kum sômilika khatkah a înlal a nit.

²⁴PUMAPA mitmuah thil ṭhano tak a tho ngai a; Israelhei suala ṭhui lûttu Nebata naipa rêng Jeroboama sualnahei kha mah viat nuam mak a.

²⁵Israel ram lei inih ngai murdi Hamath lûtna mâr tianga rithokin sim tiang Tuipui Ithi dênin Israel ramah a lâk nôk riai a. Amakha PUMAPA, Israelhei Pathianin â som Gath Hefer mi Amitaia naipa zânthla Jona manga thu a lei îsîr kha a nit.

²⁶PUMAPA khan Israelhei dengtheizia kha a natinsat tak tak iti a mu a; ṭangpuitu rang tute omak a.

²⁷Khannisela, PUMAPA khan Israelhei riming hi vânnuaiah hin inrimang vang kha a thiltum ni mak a; khasikin, Jeroboama nikna mangin PUMAPA khan anni chu a înzôk tâk a nit.

²⁸Jeroboama nikna thurchi danghei, a thiltho murdihei, a thiltho theiziahei, a râl doi thuhei, matona Juda ram dong lei inih ngai Damaska neh Hamath khua Israelhei ta ranga a lei lâk kîr nôk tâk thuhei kha Israel Rênghei Thurchi Riziakna Bu-ah inchuang riai a nit.

²⁹Jeroboama nikna kha a thi a, rênghei thlânah an phûm a; khanchu, a naipa Zakaria kha arthûlin a hong inlal tâk a.