Read Biete 2 RÊNGHEI 15 Bible Online

2 RÊNGHEI 15 - Biete bible

2 RÊNGHEI 15

¹Israel Rêng Jeroboama nikna inlal kum sôminika sarina kumah khan Juda Rêng Amazia naipa Uzia kha a hong inlal a.

²A hong inlal phut lâiah khan kum sômlei kum irukka mi a nit a; Jerusalemah khan kum sômringakah kum inikah a înlal a nit.

³A pa Amazia thiltho murdi ithon PUMAPA mitmuah thil iṭha tak a tho ngai a, a nu kha Jerusalem kho mi Jekoli a nit.

⁴Khannisela, nam dang pathian biakna bôlkuanghei kha chu paih inrimang ual mak a, kha munheiah khan mihei kha an la irbôl maiin, namhoi an lai hâl mai ngai a nit.

⁵PUMAPA khan Uzia kha kuttum a tho a, ân phâr a, khangkan a thi nî dênin a hong phâr a, in dangah a om tâk a. A naipa Jothama khan rêng insungkua kha â rui a, Judai ram kha a op pêk a.

⁶Rêng Uzia thurchi danghei, a thiltho murdihei kha Juda Rênghei Thurchi Riziakna Bu-ah inchuang riai a nit.

⁷Uzia kha a thi a, Davida khopuia rênghei thlânah khan an phûm tâk a. Khanchu, a naipa Jothama kha arthûlin a hong inlal tâk a.

⁸Juda Rêng Uzia inlal kum sômithumkah iriatka kumah khan Jeroboama nikna naipa Zakaria kha Israelhei chungah Samaria khuaah thla rukkah a hong inlal a.

⁹A matona rêng danghei angkah ngirin PUMAPA mitmuah thil ṭhano tak a tho ngai a, Israelhei suala ṭhui lûttu rêng Jeroboama sualna kha mah viat nuam mak a.

¹⁰Jabesa naipa Saluma khan Rêng Zakaria kha a phiarrûk a, Ibleamah khan a that a, arthûlin a hong inlal tâk a.

¹¹Zakaria thurchi danghei kha Israel Rênghei Thurchi Riziakna Bu-ah inchuang riai a nit.

¹²Amakha Jehua zianga PUMAPA thusîr, “Ner chihei kha rikhûk ilika dênin Israelhei rêngṭhungmunah iṭhung an ti,” iti a îsîr kha a hong itlung idik tâk a nit.

¹³Juda Rêng Uzia inlal kum sômithumkah kuakna kumah khan Jabesa naipa Saluma kha a hong inlal a; Samaria khuaah thlakah a înlal a nit.

¹⁴Gadia naipa Menahema kha Tirza khuaa rithokin Samaria khuaah a hang fe a, Saluma kha a hang that a, arthûlin a hong inlal tâk a.

¹⁵Saluma thurchi danghei, a phiarrûkna thuhei kha Israel Rênghei Thurchi Riziakna Bu-ah inchuang riai a nit.

¹⁶Menahema khan Tirzaa rithoka a hongin Tapua khua kha a ziangah an ripêk nuam no sikin a rûn isiat chit a, a sunga om murdihei neh a kôlvêl rama mihei kha a that a, nupang nai vonglâihei khom kha an phûng a phorthlêr pêk a.

¹⁷Juda Rêng Uzia inlal kum sômithumka ikuakna kumah khan Gadia naipa Menahema kha Israelhei chungah a hong inlal a. Samaria khuaah khan kum sômkah a înlal a nit.

¹⁸PUMAPA mitmuah thil ṭhano tak a tho ngai a; Nebata naipa Jeroboama thil isual tho, Israelhei suala ṭhui lûtna sual kha a dam sungin mah viat nuam mak a.

¹⁹Asuria rêng Tiglat Pilesera khan Israel ram a hong rûn a, Menahema khan tangkarua her sîngithumkah sângilikah a lei pêk a, Israel ram chungah idet nôk uala rênga ṭhung ranga a thlopna a dong theina rangin ai pêk a nit.

²⁰Menahema khan Asuria rêng ipeh rang Israel richonghei murdi ata kha zâlrâtin tangka lûm sômringakah chit arfuang a. Khanchu, Asuria rêng kha ama ramah khan a kîr nôk tâk a.

²¹Menahema thurchi danghei, a thiltho murdihei kha Israel Rênghei Thurchi Riziakna Bu-ah inchuang riai a nit.

²²Menahema kha a thi a, an phûm a. Khanchu, a naipa Pekahia kha arthûlin a hong inlal tâk a.

²³Juda Rêng Uzia inlal kum sômringana kumah khan Menahema naipa Pehakia kha Israelhei chungah Samaria khuaah a hong inlal a, kum inikah a înlal a nit.

²⁴PUMAPA mitmuah thil ṭhano tak a tho ngai a, Nebata naipa Jeroboama thilsual tho, Israelhei a ṭhui insualna sual kha mah nuam viat mak a.

²⁵A sipai ruaitu Remalia naipa Peka khan Gilead mi sômringakahei neh inrualin ani khah a phiarrûk a, Samaria khuaa rêng in sungtiang kulpui Arkoh neh Avia kôlah khan Pekahia kha a that a; khanchu, arthûlin a hong inlal tâk a.

²⁶Pekahia thurchi danghei, a thiltho murdihei kha Israel Rênghei Thurchi Riziakna Bu-ah inchuang riai a nit.

²⁷Juda Rêng Uzia inlal kum sômringaka nikna kumah khan Remalia naipa Peka kha Israelhei chungah Samaria khuaah a hong inlal a, kum sôminikah a înlal a nit.

²⁸PUMAPA mitmuah thil ṭhano tak a tho ngai a, Nebata naipa Jeroboama thilsual tho, Israelhei a ṭhui insualna sual kha mah viat mak a.

²⁹Israel Rêng Peka inlal lâiin Asuria rêng Tiglat Pilesera khan Ijon hei, Abel Beth Maaka hei, Janoa hei, Kades hei neh Hazor khuahei kha a lâk a; Gilead ram hei, Galili ram hei neh Naftali ram hei khom kha a lâk a. Mihei kha Asuria ramah suakin ai ṭhui a nit.

³⁰Juda rêng Uzia naipa Jothama inlal kum sôminikna kumah khan Ela naipa Hosea khan rêng Peka kha a phiarrûk a, a that tâk a; khanchu, arthûlin a hong inlal tâk a.

³¹Peka thurchi danghei, a thiltho murdihei kha Israel Rênghei Thurchi Riziakna Bu-ah inchuang riai a nit.

³²Remalia naipa Peka kha Israel rêng kum inikah a nit kumah khan Juda rêng Uzia naipa Jothama kha a hong inlal a.

³³A hong inlal phut lâiah khan kum sôminikah kum ringaka mi a nit a. Jerusalemah khan kum sômleiirukkah a înlal a nit. A nu riming kha Jerusi a nit a, Zadoka nainu a nit.

³⁴A pa Uzia thiltho angkah murdi itho maiin PUMAPA mitmuah thil iṭha tak a tho ngai a.

³⁵Khannisela, nam dang pathian biakna bôlkuanghei kha chu paih inrimang ual mak a; amakhan mihei kha an la irbôl maiin, namhoi an lai hâl mai ngai a nit. Jothama khan PUMAPA Tempil Mar Kotbâi kha ai siam a nit.

³⁶Jothama thurchi danghei, a thiltho murdihei kha Juda Rênghei Thurchi Riziakna Bu-ah inchuang riai a nit.

³⁷Jothama rêng chang lâiah khan a nit, Suria rêng Rezina neh Israel rêng Peka kha Judahei idoi rangin PUMAPA khan a hong itir a nit.

³⁸Jothama kha a thi a, Davida khopuia rênghei thlânah khan an phûm tâk a. Khanchu, a naipa Ahaza kha arthûlin a hong inlal tâk a.