Read Biete 2 RÊNGHEI 16 Bible Online

2 RÊNGHEI 16 - Biete bible

2 RÊNGHEI 16

¹Remalia naipa Peka kha Israel rêng kum sômleisarikah a chang kumah khan Juda Rêng Jothama naipa Ahaza kha a hong inlal a.

²A hong inlal phutah khan Ahaza kha kum sôminika mi a nit a. Jerusalema khan kum sômlei kum irukkah a inlal a nit. A pu Davida lampui iṭha zui kha zui mak a, kha nêkan chu,

³Israel rênghei lampui zui kha a zui a, PUMAPA a Pathian mitmuah thil ṭhano tak kha a tho ngai a. Israela richihei matiang an pan thiai lâia PUMAPA iûmisua tâk namhein thil porinche tak an itho ngai angkah khan thil a tho a, ama naipa ngêi khom khatkah chu hâlrivâm thillan rangin a that a, mirmil zianga ribôlnan ai lan a nit.

⁴Nam dang pathian biakna bôlkuang, itlângheiah neh thingkung thuaiheiah ribôlna thillan a lan a, namhoi ai hâl ngai a nit.

⁵Suria rêng Rezina neh Israel rêng Peka khan Jerusalem an hong doi a, an hual a; nikhomsela, Ahaza kha inê thei mak a.

⁶Kha lâi ngirah khan Edom rêng khan Elath khua kha a lâk nôk a, kha khua om Judahei kha a ûmisua a, Edomhei khan Elath khua kha an va lua a, atûn tenan an lai om a nit.

⁷Ahaza khan Asuria rêng Tiglat Pilesera ziangah, “Ne som iamom tak ki nit. Ne doi ranga hong rithok Suria rêng neh Israel rêng kut ata hi ne hong inzôk roh,” itin mi a tir a.

⁸Ahaza khan PUMAPA Tempil neh rêng richon siana in ata tangka neh rângkachak kha a lâk a, Asuria rêng ziangah lomanin a thon a.

⁹Asuria rêng khan Ahaza thu sîr khah a lei ipom a; khanchu, Asuria rêng khan Damaska khua kha a hang doi a, a lâk a; Rezina kha a that a, a mihei kha Kir ramah suakin a ṭhui tâk a.

¹⁰Rêng Ahaza kha Asuria rêng Tiglat Pilesera rimupui rangin Damaska khuaah a fe a, Damaska khuaa mâichâm kha a va mu a; khanchu, rêng Ahaza khan Thiampu Uria a koi a, kha mâichâm an siam dân kha iṭha taka eninchial rangin â ril a.

¹¹Khanchu, thiampu Uria khan Damaska khuaa mâichâm angkah chian mâichâm a siam a; Damaska khuaa rithoka rêng Ahaza hong kîr nôk ma ngêiin a lei siam zoi diam a.

¹²Damaska khua ata a hong tlungin chu rêng Ahaza khan mâichâm kha a hong mu a.

¹³Khanchu, rêng khan mâichâmah khan hâlrivâm thillan hei, bubâl thillan hei a lan a, uain thillan hei a buak a, ringeina thillan thisenhei kha mâichâmah khan arthe a.

¹⁴Dâr mâichâm, PUMAPA zianga ilan tâk kha mâichâm ithar neh Tempil kârah om a nit a; khanchu, kha dâr mâichâm kha mâichâm ithar mâr tiang pangah khan a thon tâk a.

¹⁵Khanungchu, rêng Ahaza khan, “Hi ki mâichâm ilianpa a hin zîng hâlrivâm thillan neh kholoi hâlrivâm thillanhei hâl nan mang inla, rêng neh mipui tuma hâlrivâm neh bubâl thillanhei khom hâl ngai inla, mipui uain thillanhei kha buak ngai roh. Hâlrivâm rang neh thil dang ranga ran thisen kha hi mâichâmah hin rithe ngai roh. Khannisela, Dâr mâichâm hih chu PUMAPA ke sônna rang bîk ni riseh,” itin thiampu Uria kha thu a pêk a.

¹⁶Thiampu Uria khan rêng Ahaza thupêk angkah takah khan a tho tâk a.

¹⁷Rêng Ahaza khan Tempila an imang ngai dâr tâlihei kha â siat a, a sunga risilna bêl kha a khâi pai a; khabanah, dâr serâtchal sômleiinika chunga ṭhung dâr tuipang kha a lâk a, lung inrichuan chungah an ṭhung a.

¹⁸Asuria Rêng lung ibôlna rangin Ahaza khan Tempila rithokin rêngṭhungmun inṭhungna docham khom kha a khâi pai a, Tempila rêng lûtna rang bîka siam kotbâi khom kha a khâr a.

¹⁹Rêng Ahaza thiltho thurchi danghei kha Juda Rênghei Thurchi Riziakna Bu-ah inchuang riai a nit.

²⁰Ahaza kha a thi a, Davida khopui rênghei thlânah khan an phûm tâk a. Khanchu, a naipa Hezekia kha arthûlin a hong inlal tâk a.