Read Biete 2 RÊNGHEI 17 Bible Online

2 RÊNGHEI 17 - Biete bible

2 RÊNGHEI 17

¹Juda rêng Ahaza inlal kum sômleiinikna kumah khan Ela naipa Hosea kha Israelhei chungah Samaria khuaah a hong inlal a, kum ikuakkah a înlal a nit.

²PUMAPA mitmuah thil ṭhano tak a tho ngai a; khannisela, a matona Israel rênghei angkah dôrkah chu ni mak e.

³Asuria rêng Salmanesera khan a hong rûn a, Hosea kha Salmanesera kutah a lei ripêk tâk a, kum tin sia a chôi ngai a.

⁴Khannisela, kumkah chu Hosea khan amah hong isan ranga ngên rangin Aigupta rêng Soa ziangah mi a tir a; kum tina sia ai pêk ngai kha Asuria rêng kha peh khâi mak a. Khanchu, Salmanesera khan amakha a lei riatin chu Hosea kha a man a, tâng inah a khum tâk a.

⁵Khanungchu, Salmanesera khan Israel ram pumpui kha a rûn a, Samaria khua kha kum ithumkah a hual khap a.

⁶Hosea inlal kum ikuakna kumah khan Asuria rêng khan Samaria khua kha a lâk a, Israelhei kha Asuria ramah suakin a ṭhui a, a ṭhen Hala khopuiah hei, a ṭhen Gozan rama Habor vadung kôlah hei, a ṭhen Mediahei khuaheiah ân om a.

⁷Khangkana Samaria khua a hong omna san chu Israela richihei khan Aigupta rêng Faroa kut ata inzôka, Aigupta ram ata ṭhui suaktu PUMAPA an Pathian chungah thil an thonsual sika a nit. Pathian danghei chubai an ûn a,

⁸PUMAPA Pathianin Israela richihei maa a lei iûmisua tâk namhei omdân kha an lâk a, Israel rênghein balam ṭhano tak an isiam suakhei kha an zui a.

⁹Israela richihei khan PUMAPA an Pathian chungah khan thil ṭhano tak an tho ngai a, an khua murdiah, khopuia rithoka khote dênin nam dang pathian biakna bôlkuanghei an siam a.

¹⁰Tlâng risâng tinah neh thingkung thuai tinah lungphunhei iphunin, Aseri rilimhei an siam a.

¹¹Kha ram ata PUMAPA khan an matona a lei iûmsuak namhei tho dân angkah khan nam dang pathian biakna bôlkuangheiah khan namhoihei an hâl ngai a. An thilsual thohei khan PUMAPA ning kha an inthik a.

¹²PUMAPA thupêk, mirmil beh loi rang ai ti kha zôm nuam mak a.

¹³PUMAPA khan Israelhei neh Judahei iril rangin a tirtônhei neh zânthlahei a tir ngai a, “Nin omdân isual tâk hi mah unla, nin chibulhei zianga ki dân pêk riziakna bua chuang, ke som zânthlahei imanga nangni ki înriat, ki thupêkhei neh ki dânhei kha zom rei,” itin ân riat ngai a.

¹⁴Khannisela, khangkah dôrkan khom zôm nuam mak a, an pi neh pu hei angkan an tuklullian an isua a, PUMAPA an Pathian kha iam nuam tlak mak a.

¹⁵A thupêkhei kha an nôl a, an chibulhei zianga a thuthlung kha an isiat a, a rilna rêng rêng khatkah khom ngaisak nuam mak a. Mirmil chanlamboihei chubai an ûn a, an khâtin chanlamboi an hong chang tâk a; PUMAPA khan, “Anmani omdân lah no rei,” a lei iti, an kôlvêla nam danghei omdân kha an lâk a.

¹⁶PUMAPA an Pathian thupêk murdihei kha nung an song a, chubai iûn rangin serâtte rilim inluan inikah an siam a, pathiannu Aseri rilim an siam sa a, rivâna ârsihei chubai an ûn a, Baala sin an tho ngai a.

¹⁷An naipahei neh an nainuhei kha sanong pathianhei ziangah hâlrivâm ribôlna thillanin meiah an lan a, thlasân thiamhei neh dôithiamhei ipun an song a, PUMAPA mitmuah thil ṭhano tak itho rangin an ripêk thlep a, khangkan PUMAPA ning kha an inthik a.

¹⁸Khasikah khan PUMAPA kha Israelhei chungah a ning a thik tak tak tâk a; a mitmu phâk banah a ûm inrimang tâk a; Judahei bang kha an iom tâk a nit.

¹⁹Khannisela, Judahei khom khan PUMAPA an Pathian dânhei kha zôm mak a; Israelhei tho dân kha anni khomin an lâk mai tâk a.

²⁰PUMAPA khan Israela richihei rêng rêng kha ai nôl tâk a nit, deng ân thei a, irâl nunsia tak takhei kutah a pêk a, a mitmu phâk no rangah ai thon inrimang tâk a nit.

²¹PUMAPA khan Israelhei kha Judaheia rithokin a khâi paih nungah khan Israelhei khan Nebata naipa Jeroboama kha rêngin an siam a. Jeroboama khan Israelhein PUMAPA an izui kha a ṭhui inpêt a, thil isual natinsat tak ân tho tâk a.

²²Israelhei khan Jeroboama nung an zui a, a thiltho sual murdi kha an tho tâk a, PUMAPA khan a zânthlahei imanga a lei îsîr tâk angkana a mu phâk nona rangah ai thon inrimang tâk a nit. Khanchu, Israelhei kha Asuria ramah suakin an ṭhui tâk a, atûn tenan an lai om mai a nit.

²⁴Asuria rêngin Babilon khuaa mihei, Kuth khuaa mihei, Ava khuaa mihei, Hamath khuaa mihei neh Sefarvaim khuaa mihei kha a ṭhui a, Samaria ramah khan ân om a; kha khuahei kha an lua a, an iom mai tâk a nit.

²⁵Kha munah an hong om phutah khan PUMAPA chubai ûn nachâng reh mak a; khasikin, PUMAPA khan sakeibaknei a tir a; mi ṭhenkahei kha a sê that a.

²⁶Asuria rêng kha, “Samaria ram khua ni înluahei khan kha ram pathian dân khah reh mak a; khasikah khan kha pathian khan an lâiah sakeibakneihei a tir pêk a, anni kha ai sê that ngai a nit,” iti an iril a.

²⁷Khanchu, Asuria rêng khan, “Suaka ei zuang iṭhuihei lâia mi thiampu khatkah ṭhui unla, amakhan om sela, ani khan kha ram pathian dân kha inrisei riseh,” itin thu a pêk a.

²⁸Khanchu, Samaria ram ata ai ṭhuihei lâia thiampu khatkah kha a fe a, Bethela a va om a, mihei kha PUMAPA chubai ûn rang dân ân risei tâk a.

²⁹Khannisela, Samaria ram hang iluahei khan an pathian rilim chit an siam mai a, Israelhein Pathian biakna mun an lei isiamheiah khan an sia a. Lôm dang danghei khan mahni omna khua chitah mirmil kha an siam chit mai a.

³⁰Babilon mihei khan Sokot Benoth pathian rilim kha an siam a, Kuth mihei khan Nergala rilim an siam a, Hamath mihei khan Asima rilim an siam a.

³¹Ava mihei khan Nibhaza rilim neh Tartaka rilim an siam a; Sefarvaim mihei khan an pathian Adrammelek neh Anamelek rilim maah khan an naihei kha hâlrivâm thillanin meiah an ilan ngai a nit.

³²Khaangkan kha mihei khan PUMAPA khom chubai an ûn a; khabanah an lâia mi tukhom thiampun an phun a, nam dang pathian biakna bôlkuangheiah thiampu sin an intho a, an ribôlna thillanhei an lei ilan pêk ngai a nit.

³³Anni khan PUMAPA kha an biak a; khannisela, an hong rithokna rama mihei tho dân angkan anmani pathianhei sin khom an itho ngir a nit.

³⁴An balam ilui kha atûn tenan an lah îtûk khap a nit. PUMAPA kha chubai ûn tak tak mak a, a dân neh thupêk, Jakoba richi, Israel itia riming ai be tâkhei zianga ai pêk kha zôm mak a.

³⁵PUMAPA khan Jakoba richihei neh thu a thlung a, an ziangah, “Pathian danghei chubai ûn no unla, anmani kha ikhûn no unla, an sin tho no unla, an ziangah ribôlna lan no rei.

³⁶PUMAPA sinthotheina natinsat tak neh ritha lian taka Aigupta ram ata nangni ṭhui suaktu keima thu bang zôm unla, keima ziang bangah ikhûn unla, keima ziang bangah ribôlna lan rei.

³⁷Nangmani ranga ki lei irziak tâk thupêkhei neh dânhei kha nin zôm mai rang a nit. Pathian danghei kha chubai nin ûn rang ni mak,

³⁸nin zianga ki Thuthlung kha nin ringil tlak rang ni mak e.

³⁹Keimah PUMAPA nin Pathian thu bang hi nin zôm rang a nit; khanchu, nin irâl murdihei kut ata kha nangni san isuang ki ti,” a ti a.

⁴⁰Khannisela, kha mihei khan ipom nuam mak a, an balam ilui kha an zui ngit a.

⁴¹Kha namhei khan PUMAPA chu an biak a; khannisela, an mirmil siamhei khom kha chubai an iûn sa mai a nit; khangkah khan an richi suanpârhei khomin atûn tenah hin an pi neh puhei tho lam angkan an lai tho mai a nit.