Read Biete 2 RÊNGHEI 18 Bible Online

2 RÊNGHEI 18 - Biete bible

2 RÊNGHEI 18

¹Ela naipa Israel rêng Hosea inlal kum ithumna kumah khan Juda rêng Ahaza naipa Hezekia kha a hong inlal a.

²A hong inlal phutah khan kum sôminika kum ringaka mi a nit a; Jerusalemah khan kum sôminikah kum ikuakkah a înlal a nit. A nu riming kha Abijai a nit a, Zakaria nainu a nit.

³A pu Davida thiltho murdi ithon PUMAPA mitmuah thil iṭha tak a tho ngai a.

⁴Nam dang pathian biakna bôlkuanghei â siat inrimang a, lungphunhei â sim a, pathiannu Aseri rilimhei arkit chit a; Mosia dâr irûl siam Nehustan an iti ngai kha â tôk inrinôi chit a, kha lâi zoro dênah khan Israela richihein dâr irûl rilim ziangah namhoi an ihâl ngai a nit.

⁵Hezekia khan PUMAPA Israelhei Pathian kha a iam a; Juda rêng, ama angkana hi tute lei om ngai mak a, iom khom om nôk khâi mak e.

⁶PUMAPA kha â tûk ngit a; tiklâi khomin a thu zôm loiin om tlak ngai mak a, Mosia zianga PUMAPA thupêkhei kha iṭha takkan a zôm a.

⁷Khasikin, PUMAPA kha a ziangah a om a, a sinthona kipah thluan a tlung mai a. Asuria rêng chungah arhel a, a thu zôm nuam khâi mak a.

⁸Filistiahei kha â nê a, Gaza khua neh a kôlvêl ramhei murdi, khopuia rithoka khote dênin â rok riai a.

⁹Rêng Hezekia inlal kum ilina kum, Israel rêng Hosea inlal kum sarina kumah khan Asuria rêng Salmanesera khan Israel ram a hong rûn a, Samaria khua a hong hual khap a.

¹⁰Khante, kum ithumkah a hual tenan chu Samaria kha a lâk tâk a, Hezekia inlal kum irukna kum, Israel rêng Hosea inlal kum ikuakna kumin a nit Samaria khua kha an ilâk a nit.

¹¹Asuria rêng khan Israelhei kha suakin Asuria ramah a ṭhui a, mi ṭhenkah Hala khopuia ân om a, mi ṭhenkah Gozan bial Habor vadung rikamah ân om a, mi ṭhenkah Mediahei khuaheia an în-om tâk a nit.

¹²Israelhei khan PUMAPA an Pathian thu an zôm nuam no sikin Samaria khua kha an ilâk pêk a nit; an zianga a thuthlung kha an isiat a, PUMAPA som Mosia dân khatkah khom zôm nuam mak. Ngaisak nuam mak a, an izôm nuam ino a nit.

¹³Rêng Hezekia inlal kum sômleiilina kumah khan Asuria rêng Senakeriba khan Judai rama kulpui inei khua murdi a hong doi a, a lâk tâk a.

¹⁴Juda rêng Hezekia khan Lakis khuaa om Asuria rêng Senakeriba ziangah khan, “Thil kî thonsual tâk a nit, ner kiang pêk nôk ta roh, ni ne ti lam tak kha la peh ta rong,” itin thu a thon a. Asuria rêng khan Hezekia kha tangkarua her sîngkah neh rângkachak her sângkah hong peh roh itin bituk a siam pêk a.

¹⁵Khanchu, Hezekia khan Tempil neh rêng richon bûmna tangkarua om murdi kha a thon a.

¹⁶Khabanah kha ṭum ngirah khan Hezekia khan Tempil kotkhâra rângkachak inluan neh amah ngêiin kotbâi ngula rângkachak a înluanhei kha a khok riai a, an rêngkan Asuria rêng Senakeriba kha ai thon a nit.

¹⁷Asuria rêng khan Lakish khua rithokin Jerusalema rêng Hezekia kha idoi rangin sipai itam takkah a tir a, a sipai ruaitu ithumkah Tartana, Rabsaria neh Rabsakea hei khan an irui a. Jerusalem an hang tlungin chu puan risuhtu mun panna lampui, dîl sak ita ual tuilâkna kôlah khan an om a.

¹⁸Khanungchu, rêng Hezekia kha an hang koi a, a milian ithumka hei; rêng in enkoltu Hilkia naipa Eliakima hei, lekhaziaktu Sebna hei, Asafa naipa thurchi riziaktu Joa hei kha anmani rimupui rangin an va suak a.

¹⁹Rabsakea khan an ziangah, “Hezekia hi hang iril rei, tûm a iamna ringatna ai nit, hingka taka a ir-iam pam hi? Asuria rêng roinpui khan â ria ai nuam a nit.

²⁰Ṭong thiamna ringotin sipai râtna neh ridoi thiamna nî ngam thei rang mani? Tûm rinpuia nî nei a, Asuria rêng chunga ni irhel tâk ai nit hi?

²¹Ringai roh, Aigupta hin nang a hong isan rang nî sabei mani? Ani kha mîn lâiluang irol a ṭhun a, â kiak thleka, a kut ai sun ngai angkah nîng a ti. Aigupta rêng Faroa chu ama chunga ringattuhei ta rangin khangkah kha ai nit ngai a nit.

²²“A nit no le, PUMAPA Pathian kha kin rinpui a nit nî ti mani? Judahei neh Jerusalem mihei kha Jerusalem khuaa hi mâichâm bangah hin PUMAPA kha nin biak rang a nit, itin mun danga bôlkuanghei neh PUMAPA mâichâmhei isehtu kha Hezekia hi a nit.

²³Atûnah hin ki pu Asuria rêng neh thu rikhit rei; khanchu, a chunga chuang ranghei ni mu thei rang ngânin chu sakor sânginikah nang pêng ki ti:

²⁴Asuria mihei lâia ruaitu chîntak ilua khom hi tluk mak che a, khan khoma tâlihei neh sakor chungchuang mihei kha Aiguptahein nang ithon rangin nî tûng pam na?

²⁵Ni ram ki hong rûn a, ki hong ilâk hi PUMAPA thu ni loia ki hong idoi a, ki hong îsiat nî sôn mani? PUMAPA ngêi khan ki ziangah, ‘Kha ram khah hang doi inla, hang iseh roh,’ ai ti a nit,” a ti a.

²⁶Khanungchu, Eliakima hei, Sebna hei, Joa hei khan Rabsake ziangah, “Ringaiihoi takkan ne somhei hi Aramaik ṭongin ne sôn roh, kin iriat thei a nit. Hebrai ṭongin chu ne sôn no roh, mi murdin kulpui chungah khan an ne irngai ṭian a nit,” an ti a.

²⁷Khannisela, Rabsake khan an ziangah, “Ki pu khan nin pu ziangah neh nangmani ziang bangah hi thu hi isîr rangin a ne iti nin isôn mani? Kulpui chunga ṭhunghei nangmani angkana mahni êk la fah rang neh mahni zun la in ranghei ziangah khom a ne itir sa a nit,” a ti a.

²⁸Khanungchu, Rabsake kha â ding a, Hebrai ṭongin rôl iring takkan â khêk a, “Rêng roinpui tak Asuria rêng thu hi ringai rei.

²⁹Rêng khan hingka hin a ti, ‘Hezekia ilêmin om no rei; ani khan nangni inzôk thei no nih.

³⁰Hezekia khan PUMAPA khan nen zôk ngêt a ta; hi khopui hih Asuria rêng kutah ipe ni no nih, itin PUMAPA khah nangni in-iam no riseh.

³¹Hezekia thu kha ipom no rei. Asuria Rêng khan hingka hin ai ti a nit: khopui ata hong suak unla, ki kutah hong ripeh rei. Khanchu, nangmani ram angkana bu neh uain ram, ibai neh grep rikul ram, oliv neh khuaitui ramah nangni ki hong ṭhui mâkah chu mi tinin mahni grep ruia mi neh mahni theipui kunga mi ifah chit rangin neh mi tinin mahni tuikuanga tui chit iin iphal nîng nin ti, ki thu angkan nin thon chu thi no tin ua, ring nin ti. Hezekian PUMAPA khan nen zôk a ti, itia nangni â thlêm khomin ipom no rei.

³³Asuria rêng kut ata an ram inzôk thei pathian inei nam an om tâk ngai im a?

³⁴Hamath neh Arpad pathianhei kha taktiang im an iom tâk? Sefarvaim pathianhei, Hena neh Ava pathianhei khom kha taktiang im an iom tâk? Samaria khua inzôk thei an om im a?

³⁵Hi ram murdi pathianhei hin tiklâiah khan im an ram kha an inzôk tâk ngai a? PUMAPA khomin Jerusalem khua hi ki kut ata inzôk thei bîk a ti nin isabei hi?’ a ti,” a ti a.

³⁶Mipuihei kha an dâirek a, rêng Hezekia khan, “Anni kha sâm no rei,” itia he ai be angkan bâikah khomin sâm mak a.

³⁷Khanungchu, Eliakima, Sebna neh Joa hei khan ringai isian an silbomhei an potthlêr a, rêng Hezekia ziangah khan an fe a, Rabsakea thusîrhei kha an iril a.