Read Biete 2 RÊNGHEI 19 Bible Online

2 RÊNGHEI 19 - Biete bible

2 RÊNGHEI 19

¹Rêng Hezekia khan kha thu khah a riat kaneh chu a silbomhei kha â potthlêr a, borapuan a sil a, PUMAPA inah a lût tâk a.

²Rêng insungkua enkoltu Eliakima hei, ziaktu Sebna hei neh thiampu lâia ulianhei kha borapuan isilin Amoza naipa zânthla Isaia ziangah a tir a.

³Rêng Hezekia khan Isaia ziangah, “Vuani hi lungzîngna nî a nit; musitna neh mualphoina tuang nî a nit. Nupang nai nei rangto a nu rizal rai tâk, nai inei ranga râtna om khâi ino angkah hi kin nit.

⁴Asuria rêng khan Pathian iring isîrinseh rangin a milianhei lâia uliantak a tir a. PUMAPA ni Pathian khan hi sîrinsiatna thuhei murdi hi reh sela, sîrinsiatna thu riltu hi kuttum tho riseh. Khasikah khan ei mi a la om isunhei ta rangin Pathian ziangah ṭongṭai pêk roh,” mi a vân ti a.

⁵Isaia khan rêng Hezekia thucha kha a lei riatin chu

⁶an ziangah, “PUMAPA khan hingka hin a ti, ‘Asuria rêng mihein an ne sîr insiatna thu nî riat kha ṭi no roh.

⁷Ringai roh, a lungril indôpin siam pêk ki ta; khanchu, thuthang riang a ta, ama ramah kîr nôk a ta, ama ram ngêiah khan khandaiin that an ti,’ itin nin pu ziangah va sîr rei,” a ti a.

⁸Rabsakea khan Asuria rêng kha Lakis khua ata a suak a, Libna khua a lei doi iti a riat a; khanchu, kha munah khan amah risônpui rangin a fe tâk a.

⁹Asuriahei khan anmani doi rangin Aigupta sipaihei kha Ethiopia rêng Tirhaka hong îruaiin an hong iti an lei riat a. Kha thu khah rêngin a lei riatin chu Juda rêng Hezekia ziangah hingka hin lekha a thon a.

¹⁰“Judai ram rêng Hezekia ziangah, ‘Ni rinpui nin Pathian khan Asuria rêng kutah Jerusalem khua kha peh no nih itin ilêmin om no roh.

¹¹Asuria rêngin iseh rang ai tum ram chungah a tho ngai tlia khah ni riat a. Nang khom izôk bîk rang ni irtûng mani?

¹²Ki puhein an lei înrimang khopui Gozan hei, Haran hei, Rezep hei neh Telasara om Beth-Eden mihei kha an pathianhein a lei înzôk tute zel an iom ino a nit.

¹³Hamath rêng hei, Arpad rêng hei, Sefarvaim rêng hei, Hena rêng hei, Ava rêng hei kha taktiang im an iom zoi tâk?’ va ti roh,” a ti a.

¹⁴Hezekia khan a mi tirhei kut ata lekha kha a lâk a, a tep a; khanungchu, Hezekia kha PUMAPA inah khan a hang fe a, lekha kha PUMAPA makungah khan a hang phar a,

¹⁵PUMAPA ziangah a ṭongṭai a “O PUMAPA Cherubhei chunga rêngṭhungmuna ṭhung, nangmah bang hi leilung pumpui chunga Pathian ni nit. Rinêng neh rivân hi nangma isiam a nit.

¹⁶Atûnah hin PUMAPA kin chunga thil itlunghei hi en inla, nangmah Pathian iring sîrinseh ranga Senakeriban thu a hong îsîr hih ringai roh.

¹⁷O PUMAPA, Asuria rênghei hin nam tin an doi a, an ramhei kha an isiat pêk ngai iti kin iriat a nit.

¹⁸An pathianhei kha meiah an hâl pêk ngai a, khahei kha chu pathian an init ino pial a nit a, miriam kuta siam thing neh lung ringot an nit. Khasikin, an inrimang rang pial khom a nit.

¹⁹Atûnah hin PUMAPA kin Pathian, nangmah bang hi PUMAPA Pathian ni nit iti rammual pumpuia nam murdihei hin an riat theina rangin Asuriahei kut ata hih nen zôk roh,” a ti a.

²⁰Amoza naipa Isaia khan Hezekia ziangah mi a tir a, “A zianga ni ṭongṭaina chungchâng neh Asuria rêng Senakeriba chungchânga

²¹PUMAPA Israelhei Pathian thusîr chu hingka hin a nit; Senakeriba, Zion nainu khan nang ai musitin, nang a înui a nit; Jerusalem nainu khan ni lâizâm tho kha a lu nang a îthing khum a nit.

²²Tûm riming isia nî sak a, ni îsîrin siat? Tu chungâm ni rôl ûm ni înlian a, nî mît ngit? Israelhei Pathian rithiang chungah kêng ai nit.

²³Ni mi tirhei imangin Rêngpa riming ne siat a, ‘Ki tâli itam takkah neh Lebanon ram ril tlâng risânghei ki tlung tâk a; khantaka sidar thing inzâitakhei neh ifâr thing iṭha ṭhahei kha ker kit a, a ram ril tak taka thingpui bilhei khom ki lût a.

²⁴Tuisunsuahei ki choih a, ram dang tui ki in a, ki kepha nuaiah hin Aigupta tui murdi chu ki înkang riai a nit,’ itin ner song a.

²⁵“Keiman tianlâi ata khahei murdi kha ki lei înrifûk thlâm a nit iti nî riat ino mani? Khua kulpui ineihei inchim a, khorama siam rangin ritha nang kî pêk a nit.

²⁶Khasikah khan a sunga omhei kha râtna nei loiin an om a, rilônthing neh lunginzîngin an iom a nit. Anni chu phûl loisûl angkan neh inchunga loisûl iṭoi ithli lumin ai sêm inthêm ngai angkah an init tâk a nit.

²⁷“Khannisela, keiman chu ne ṭhunghei, ni lût neh ni suakhei, ki chunga ner song tliahei kî riat a nit.

²⁸Ki chunga ner songtlia neh ni lârripâk ṭong kha ke beng a hong lût tâk sikah hin nârvit kha ni nârah ikhop ki ta, lâkam ni bâiah nang inpet ki ta, ni hongna lampui ngirah khan nang kâi ikhîr nôk ki ti,” itin.

²⁹Khante, Isaia khan rêng Hezekia ziangah, “Amahi ni ta ranga risinsiana nîng a ti. Vuankum neh nakum sung chu farli bang rin nin ta; khannisela, a kum ithumnaah khan chu buhei tu thei nin ta, ât thei nin ti, grep rikulhei siam nin ta, â râhei fah thei tâng nin ti.

³⁰Khanchu, Judai rama a la dam isunhei kha chu thingkung, inthûk takka rizung itla a, irâ sua ngai angkan vângsak inṭumin om an ti.

³¹Jerusalemah neh Zion tlângah khan a la dam suak an iom ngêt rang a nit. PUMAPA ṭhatnemringaina khan khahei khah ai tho ngêt rang a nit.

³²“Amahih PUMAPA khan Asuria rêng chungchâng thu a îsîr chu a nit, ‘Hi khopui hih hong tlung no ni a, thal khatka lua khom kâp no nih. Ipho chôi sipai khomin khopui hi hong nâi tlak no ni a, a khua vêlah khom rinêng inpông tlak no nih.

³³Khopui hong lût loiin a hongna lampui ngirah khan kîr nôk a ti.

³⁴Keima sik neh ki suak Davida sikin hi kulpui hih inzôk rangin kî rung rang a nit. Keimah, PUMAPA hin kî ti a nit,’ a ti” itin mi a tir a.

³⁵Khante, kha zânah khan PUMAPA vântirtôn kha Asuriahei riabukah a fe a, sipai nuaikah neh sîngiriatkah neh sângringakah a that tâk a. Atûk zîngah an hong thoiin chu mithi ruak ringot a lei itâl dûl tâk a.

³⁶Khanungchu, Asuria rêng Senakeriba kha a suak a, a kîr nôk a Ninevi khuaah a om tâk a.

³⁷Sûnkah chu a pathian Nisroka Tempilah khan amah chubai a ûn lâiin a naipahei ruai Adrammeleka neh Sarezera hei khan khandaiin an that a; khanchu, anni khah Ararat ramah lâizâm an tho tâk a. Khante, a naipa dang, Esarhadona kha arthûlin ân lal tâk a.