Read Biete 2 RÊNGHEI 2 Bible Online

2 RÊNGHEI 2 - Biete bible

2 RÊNGHEI 2

¹PUMAPA khan Elija chu thlisima rivânah a ṭhui rang zoro a hong tlung tâk a. Elija neh Elisa kha Gilgala rithokin an suak a.

²Lampuia an lôn lâiah khan Elija khan Elisa ziangah, “Hin lei om roh dua; PUMAPA khan Bethel idêna fe rangin a ne itir a nit,” a ti a. Elisa khan, “PUMAPA ringna neh ni ringna chingin kî ti a nit, nang ithla tlak no ning e,” a ti a. Khanchu, Bethela khan munkan an fe tâk a.

³Bethela om zânthla lômhei[2] kha Elisa ziangah an hong a, a ziangah, “Vuanah hin PUMAPA khan ni pu hi nang ai lâk pêk rang a nit iti ni riat im?” an ti a. Elisa khan a sâm a, “O ki riat; khannisela, hi thu hi chu isîr no min u,” a ti a.

⁴Khanungchu, Elija khan Elisa ziangah, “Elisa, hin lei om roh dua; PUMAPA khan Jerikoa fe rangin a ne itir a nit,” a ti a. Khannisela, Elisa khan, “PUMAPA ringna neh ni ringna chingin kî ti a nit, nang ithla tlak no ning e,” a ti a. Khanchu, Jerikoah khan munkan an fe tâk a.

⁵Jerikoa om zânthla lômhei khan Elisa an va nâi a, a ziangah, “Vuanah hin PUMAPA khan ni pu hih nang ai lâk pêk rang a nit iti ni riat im?” an ti a. Elisa khan a sâm a, “O ki riat; khannisela, hi thu hi chu isîr no min u,” a ti a.

⁶Khanungchu, Elija khan Elisa ziangah, “Hin lei om roh dua; PUMAPA khan Jordana fe rangin a ne itir a nit,” a ti a. Khannisela, Elisa khan Elija ziangah, “PUMAPA ringna neh ni ringna chingin kî ti a nit, nang ithla tlak no ning e,” a ti a. Khanchu, an ruaikan munkan an fe tâk a.

⁷Zânthla lôm mi sômringakan an zui sa a, ilah ianka rithokin an thlîr a. Elija neh Elisa kha Jordan vadung rikamah khan an iding a.

⁸Khanungchu, Elija khan a puansil khah a lâk a, â zuat itêla tui kha a zuk itôk a, kiangtiang kiangtiang tui kha a hong inṭhen a; khanchu, an ruaikah khan rinêng ichârah an rikan tâk a.

⁹An rikan zoiin chu Elija khan Elisa ziangah, “Ni ziang ata lâkpaia ki om maah hin im nang ki tho pêk rang ne nih roh,” a ti a. Elisa khan a sâm a, “Ner thla dong bâk inika[3] dong ki nuam,” a ti a.

¹⁰Elija khan, “Thil ikhir tak nî ngên a nit hih; khir man sela ni ziang ata lâkpaia ki om lâi ni ne mun chu dong ni ta, ni ne mun non chu dong no tin e,” a ti a.

¹¹Munka an fe a, an risôn tlik lâiin voikazelin mei tâli, mei sakorhei ikâi hi an ruaika kârah a zuang itlân a, a ṭhenphat tâk a; Elija chu thlisimin rivânah a fepui tâk a.

¹²Elisa khan amakhah a mu a, “Epa, epa, Israelhei ihoitu inthang, nî fe tâk na?” a ti a. Elija kha mu nôk khâi mak a. Ngaiinsian Elisa khan ama puan kha lek inikan a sân thlêr a.

¹³Khanungchu, Elija puan zuang itla khah a chôi a, a kîr nôk tâk a, Jordan vadung rikamah khan â ding a.

¹⁴Elija puanah khan tui kha a hang itôk a, “Elija Pathian PUMAPA kha taktiang im ai om?” a ti a. Khanungchu, tui kha â tôk nôk a; khanchu, tui kha kiangtiang kiangtiang a hong inṭhen a, Elisa kha varâl a kâi tâk a.

¹⁵Jeriko khuaa zânthla lômhei khan ani kha an lei mun chu, “Elija sinthotheina kha Elisa chungah a om tâk hi te,” an ti a. Amah isôn rangin an va fe a, a makungah khan rinêng isikin chibai an bûk a.

¹⁶Anni khan a ziangah, “En ta, mi sômringakah sar, râtlâi inzen kin om a. Ni pu zong rangin lei fe rong ung ba. PUMAPA rithla khan a ṭhui tâk a, khan taktiang tlânga manih, taktiang phâia manih a mâkrak tâk khom a nit duai thei,” an ti a. Elisa khan a sâm a, “Fe no tin u,” a ti a.

¹⁷Khannisela, ife ngêt rangin an ngên ngit a; khanchu, ân fe tâk a. Mi sômringakahei khan sûn thumka sung Elija kha an zong a; khannisela, mu khâi mak a.

¹⁸Khanungchu, Jeriko khuaa lei ichâm mai Elisa ziangah an kîr nôk a, Elisa khan an ziangah, “Fe loi rangin nangni kî ti thlâm ni mak im a?” a ti a.

¹⁹Jeriko khuaa mi ṭhenkahei kha Elisa ziangah an fe a, a ziangah, “Epu, nî riat angkan hi kin khua hih khua hoi tak a nit a; khanniseh, tui hi a ṭhat no sikin nai hi a irpai mai ngai a nit,” an ti a.

²⁰Ani khan, “Tui ûm itharah ichi tlâk unla, ne hong peh rei,” a ti a. Khanchu, an hong lâk pêk a.

²¹Khanchu, tuikuangheiah khan a va fe a, ichi kha tuiah khan a phul a, “PUMAPA khan hingka hin a ti, ‘Hi tui hih ken rithiang tâk e, atûn ata chu thina neh nai siapaina ithlun khâi no nih,’ a ti,” a ti a.

²²Elisa ti lam angkah takin atûn tenan tui kha a irthiang tâk a nit.

²³Elisa kha Jeriko ata Bethela fe rangin arthok a, lampuiah a fe lâiah khan khua ata ipate lôm an hong suak a, ani kha an hong phenêng a, “Lukolpa, hi mun ata hi roh pai roh,” itin an ipâi a.

²⁴Elisa kha arhêl a, anni kha a en ngit a, PUMAPA rimingin vâni a sâm a. Khanungchu, ramnuai ata ivompui inikah an hong suak a, ipate lôm sômilika inikahei kha an hong sê that riai tâk a.

²⁵Elisa kha Karmel tlângah a fe a, nungah chu Samariah a zuang kîr nôk tâk a.