Read Biete 2 RÊNGHEI 20 Bible Online

2 RÊNGHEI 20 - Biete bible

2 RÊNGHEI 20

¹Kha lâi zoroah khan rêng Hezekia kha dam mak a; ithi lôk lôk kan a om a. Khanchu, Amoza naipa zânthla Isaia khan a hong pan a, a ziangah, “PUMAPA khan, ‘Ni insungkua omdân rang tinrêng infel ta roh. Dam suak khâi no tin e, nî thi ngêt rang a nit,’ a ti,” a ti a.

²Hezekia kha bang tiang ingatin arhêl a, PUMAPA ziangah,

³“O PUMAPA, ni makungah thutak neh lungril iṭha rikip riputa ki om ngai zia neh ni mitmuah thil iṭha ki tho ngai zia kha ringaiihoi takkan remai roh” itin a ṭongṭai a. Khanchu, a ṭap ngûi ngûi tâk a.

⁴Isaia khan rêng khah a mâk a; khannisela, rêng in tualzôl inlâina tak khom kha a tlung man PUMAPA thu a ziangah a zuang tlung a,

⁵“Kîr nôk inla, ki mihei chunga ruaitu Hezekia ziangah isîr roh, ‘PUMAPA, ni pu Davida Pathian khan hingka hin a ti, ni ṭongṭaina kha ki riat a, ni mitrithli ṭul khom kha kî mu a nit. Nang indam ki ta, sûn thumka tenan chu PUMAPA inah fe thei tâng ni ti.

⁶Khante, ni dam sung kumhei hi kum sômlei kum ringakah nang insei pêk ki ta, nangmah neh hi khopui hih Asuria rêng ata inzôk ki ti. Keima sik neh ke som Davida sikin hi khopui hih kî rung rang a nit,’ va ti roh,” a ti a.

⁷Khanungchu, Isaia khan isomhei ziangah khan, “Theipui irâ min ilûm hong chôi unla, a hong dam nôkna rangin a sakhuaiah khan inôt pêk rei,” a ti a. An inôt pêk a, a hong dam tâk a.

⁸Hezekia khan Isaia ziangah, “PUMAPA khan nen dam a ta, PUMAPA inah sûn thumka tenan chu fe tâng ki ti, iti risinsiana im ai nit rang?” a ti a.

⁹Isaia khan, “PUMAPA khan a thil ti hi ai tho ngêt rang a nit iti amahih ni ta ranga PUMAPA ata risinsiana rang chu nîng a ti. Rilîm kha theibi sômka dêna matianga a hang irthîn im ni nuam, theibi sômka tena nungtianga a irthîn im?” a ti a.

¹⁰Hezekia khan a sâm a, “Rilîm kha theibi sômka dêna matianga hang rithîn chu a ol a, amakhah chu ni no sela, rilîm kha theibi sômka dênin nungtiang rithîn riseh,” a ti a.

¹¹Khanungchu, zânthla Isaia khan PUMAPA ziangah a ṭongṭai a; khanchu, rêng Ahaza theibi siama rilîm kha PUMAPA khan theibi sômka dênin â khîr nôk tâk a.

¹²Kha lâiah khan Baladana naipa Merodak Baladana, Babilon rêng khan rêng Hezekia dam mak iti a lei riat a; khanchu, lekhathonhei neh thilpêkhei a hong thon a.

¹³Hezekia khan kha palâihei kha a lei lôm a, a thil ilu siana in murdihei ân en a, a tangkarua neh rângkachak hei, a namhoi hei, riak ilu tak hei, râlthluk siana inhei neh a ram sung mun dang danga richon ai sia murdihei kha ân en riai a. A ina thil neh a ramsunga thil a în-en ino zel omak a.

¹⁴Khanungchu, zânthla Isaia kha rêng Hezekia ziangah a fe a, a ziangah, “Kha mihei kha taka rithoka hong im an init, im an hong iti?” a ti a. Hezekia khan a sâm a, “Ram ilah tak, Babilona rithoka hong an nit,” a ti a.

¹⁵Khanchu, ani khan, “Rêng inah hin im an imu?” a ti a. Hezekia khan, “Ki insunga om murdi chu an mu riai a, ker chon murdi ki înmu no rêng rêng omak e,” itin a sâm a.

¹⁶Khanungchu, Isaia khan Hezekia ziangah, “PUMAPA thu hi ringai roh,

¹⁷Ni insunga om murdi neh vuani tena ni pi neh puhein an lei ibûmhei kha Babilon khuaah an rotpui rang zoro a hong itlung tâk a nit. Îte rêng rêng mah viat no nih.

¹⁸Ne rila râ, ni naipahei ngêi khom ṭhui an ta, Babilon rêng ina sin itho rangin thâinuzelin siam an ti,” a ti a.

¹⁹Rêng Hezekia khan a lungrilin a damsung kârkah chu ringei irkan om an ta, izôkriamkan an iom rang tina angkan arngai a; khanchu, Isaia ziangah, “PUMAPA thu ni hong îthlun kha ai ṭhat a nit,” a ti a.

²⁰Rêng Hezekia thurchi danghei, a thiltho theizia murdihei, dîl neh tuilâkna a siam a, khopui sunga tui ai lâk lût thuhei kha Juda Rênghei Thurchi Riziakna Bu-ah inchuang riai a nit.

²¹Hezekia kha a thi tâk a, a naipa Manasea kha arthûlin a hong inlal tâk a.