Read Biete 2 RÊNGHEI 21 Bible Online

2 RÊNGHEI 21 - Biete bible

2 RÊNGHEI 21

¹Manasea kha Juda rêng a hong chang a khan kum sômlei kum inika mi a nit a; Jerusalemah khan kum sômringakah ringakah a înlal a nit. A nu riming chu Hefzibi a nit.

²PUMAPA khan Israela richihei matona ai ûm isua tâk namhein thil porinche tak an itho ngai angkan PUMAPA mitmuah thil ṭhano takhei kha Manasea khan a tho ngai a.

³A pa Hezekian a lei îsiat tâk nam dang pathian biakna bôlkuanghei kha ân ding nôk a, Israel rêng Ahaba tho lam angkan Baala mâichâmhei ân ding a, Aseri rilimhei a siam a. Manasea khan rivâna ârsihei khom khi chubai a ûn sa a.

⁴PUMAPA khan, “Jerusalemah ker ming in-om ki ti,” a tina PUMAPA inah khan sanong mâichâmhei a siam a.

⁵PUMAPA Tempil rikul sung tualzôl inikah khan rivâna ârsihei chubai ûnna rang mâichâmhei a siam a.

⁶Khante, a naipa khatkah kha hâlrivâm ribôlna thillanin meiah a lan a. Thlasân a song a, dôihei a mang a, ramrili dôithiamhei neh mithi sôn thiamhei â ruai ngai a. PUMAPA mitmuah thil ṭhano natinsat tak isinin, PUMAPA ning kha ân thik ngai a.

⁷Davida neh a naipa Solomona ziangah PUMAPA khan, “Hi Jerusalem khuaa Tempil mun hi Israel richi nam sômlei nam inikahei ram murdi lâia chubai nin ne ûnna mun ranga ki irthlang a nit, ker ming chu kumkhuakan ki în-om rang a nit.

⁸Ki thupêkhei murdi neh ki suak Mosian dân ai pêk murdi kha Israel mihein an zôm ngânin chu an pi neh puhei ki lei ipêk tâk ram ata hi ûmisuaa an om rang phal tlak no ning e,” a lei iti tâk mun PUMAPA Tempil ngêiah khan Aseri rilim kha a sia a.

⁹Juda mihei khan PUMAPA thu khah zôm mak a, PUMAPA khan Israela richihei matona a lei iûmisua tâk namhei itho nêk khoma natinsat ual, thil thonsual rangin Manasea khan mihei kha a ṭhui inpêt tâk a.

¹⁰PUMAPA khan â som zânthlahei imangin hingkan thu â sîr a,

¹¹“Juda rêng Manasea hin hi thil porinche takhei hi a tho a, Kanan mihei lei itho nêk khomin thil a thonsual natinsat ual a, a mirmil siamhein Juda mihei kha sualah ai ṭhui inlût a nit.

¹²Khasikah khan Keimah, PUMAPA Israel Pathian ngêiin Jerusalem neh Juda chungah hin â ria murdihei kuar kiang ruaika ṭhông rang thil ṭhano ki zuang îthlun rang a nit.

¹³Samaria khua kuttum ki tho lam angkan Jerusalem khom kuttum thông ki ta; a nit, Israel rêng Ahaba neh a insungkuahei kuttum ki tho lam angkah khan kuttum thông ki ti. Mîn mâirâng khêng a rûk infâi vang a, a îkhup ngai angkah dôran Jerusalem khom a sunga omhei kha kî rûk infâi rang a nit.

¹⁴Ki mi, la om isunhei khom kha marak ki ta, an irâlhei kutah pêng ki ta, annihei khan an nuam nuamin an ram kha irok pêk an ta, denginthei an ti.

¹⁵An pi neh puhei Aigupta ram ata an hong suaka rithokah khan vuani tenah hin ki mitmuah thil ṭhano tak an tho a, ki ning an inthik ngai sikin ki mihei chungah hingka hin kuttum ki îlek rang a nit,” a ti a.

¹⁶Judahei mirmil biakna tianga ṭhui a, PUMAPA mitmuah thil ṭhano tak ân thona sualna tep loiin; Manasea khan mi ningsiat sin inohei itam takkah a that a, Jerusalem kotsua tin kha thisenin ai luang ngai a nit.

¹⁷Manasea thurchi danghei, a thiltho murdihei, a thil thonsualhei kha Juda Rênghei Thurchi Riziakna Bu-ah inchuang riai a nit.

¹⁸Khante, Manasea kha a thi a, rêng rikul, rêng Uza rikulah khan an phûm tâk a. Khanchu, a naipa Amona kha arthûlin a hong inlal tâk a.

¹⁹Amona kha Juda rêng a hong changah khan kum sôminikah kum inika mi a nit a, Jerusalemah khan kum inikah a înlal a nit. A nu riming kha Mesulemethi a nit a, Jotba khuaa Haruza nainu a nit.

²⁰Khante, a pa Manasea angkah ngirin PUMAPA mitmuah thil ṭhano tak a tho ngai a.

²¹A pa lampui zui murdi kha a zui sa a, a pan mirmil chubai ai ûn ngaihei kha chubai a ûn a.

²²An chibulhei Pathian PUMAPA kha a mâk a, PUMAPA thupêkhei kha zôm mak a.

²³A milianhei khan ani kha an phiarrûk a, ama rêng in ngêiah khan an that tâk a.

²⁴Khannisela, Judahei khan rêng Amona thattuhei murdi kha an that riai a; khanchu, a naipa Josia kha arthûlin rêngin an siam tâk a.

²⁵Amona thiltho danghei kha Juda Rênghei Thurchi Riziakna Bu-ah inchuang riai a nit.

²⁶Khante, Amona kha Uza rikula thlânah khan an phûm a, a naipa Josia kha arthûlin a hong inlal tâk a.