Read Biete 2 RÊNGHEI 22 Bible Online

2 RÊNGHEI 22 - Biete bible

2 RÊNGHEI 22

¹Josia kha Juda rêng a hong changah khan kum iriatkah mi a nit a, Jerusalemah khan kum sômithumkah neh kumkah a înlal a nit. A nu riming kha Jedidi a nit a, Bozkat khuaa Adaia nainu a nit.

²PUMAPA mitmuah thil ifel tak a tho ngai a, a pu Davida lampui zui murdi khah a zui a, Pathian dânhei kha iṭha takkan a zôm ngai a, changtiang manih voitiang manih pêt mak a.

³Rêng Josia inlal kum sômleiiriatna kumin rêng khan ziaktu Sefana, Azalia naipa, Mesulama tupa kha thupêk ichôiin PUMAPA Tempilah a tir a.

⁴“Thiampu Laltak Hilkia ziangah hang fen la, Tempil kotbâia mipui tholôm thiampuhein an lei idong ngai kha izâkâm a nit hang ridon inla

⁵PUMAPA Tempil siam inṭha ranga ruaituhei kutah khan peh riseh.

⁶Anni khan thing isintuhei, in isintuhei neh lung isuktuhei peh sela; khabanah, Tempil siamṭhatna rang thinghei neh lunghei richoh nan an mang sa rang a nit.

⁷In isintu ruaituhei kha mi dik tak tak an nit a; khasikin, an kutah sum ipea om kha en zuipui nang no nih,” a ti a.

⁸Lekhaziaktu Sefana khan rêng thupêk kha Hilkia ziangah a hang ithlun a, Hilkia khan ziaktu Sefana ziangah, PUMAPA Tempilah Dân Lekhabu kha a mu tâk iti a lei iril a. Khanchu, Hilkia khan lekhabu kha Sefana a pêk a, ani khan a tep tâk a.

⁹Khanungchu, Sefana kha rêng ziangah a kîr nôk a, “Ni suakhei khan Tempila sum iom kha an lâk a, PUMAPA Tempil isintu ruaituhei kutah an pêk riai tâk,” a ti a.

¹⁰Sefana ngir khan, “Thiampu Hilkia khan hi lekhabu hih a ne lei ipêk a nit,” a ti a. Sefana khan rêng riat rangah khan a tep tâk a.

¹¹Rêngin Dân Lekhabu thuhei kha a riatin chu a puanhei â potthlêr tâk a.

¹²Khanchu, rêng khan thiampu Hilkia hei, Sefana naipa Ahikama hei, Milkaia naipa Akbora hei, lekhaziaktu Sefana hei, rêng enkoltu Asaia hei ziangah khan,

¹³“Keimah neh Juda mipui murdi ta rangin hi lekhabua thu chuang inriseina chungchângah hin PUMAPA ne va sôn pêk ta u. Ei zôm ngêt ranga hi lekhabua riziak murdi hih ei pi neh ei puhei khan an lei zôm no sikin ei chungah hin PUMAPA ningthikna chu ai chok mai a nit hih,” itin thu a pêk a.

¹⁴Khanungchu, thiampu Hilkia, Ahikama, Akbora, Sefana, Asaia hei kha zânthla nupang Huldaii, Jerusalem bung ithara om ziangah an fe a, an va sôn a. Huldaii pasal Saluma kha Tempil silbom enkoltu a nit a; Tikva naipa, Harhasa tûpa a nit. Anni khan thil hong itlunghei kha an iril a.

¹⁵Khante, ani khan rêng ziangah kîr nôk unla, PUMAPA ata thucha hi va ril rei:

¹⁶“PUMAPA khan Juda rêngin ai tep lekhabua thu chuang angkah khan Jerusalem neh a sunga mi om murdihei chungah hin thil ṭhano tak ki zuang îthlun rang a nit.

¹⁷Anni khan an ne mâk a, pathian danghei ziangah ribôlna an lan a, an thiltho murdi khan ki ningthik an închok suak a nit. Jerusalem chungah hin ki ningthik a chok natinsat tâk sikin ṭuai pai khâi no nih.

¹⁸Khannisela, PUMAPA sôn ranga nangni hong itirtu Juda rêng ziangah khan chu hingka hin ti rei, ‘PUMAPA Pathian khan, lekhabua riziaka omhei kha ner ngai a,

¹⁹Jerusalem neh a sunga mi omhei kuttum ki tho rang dân kha ni lei riatin a nat ni ti a, PUMAPA makungah ner bil riam a, ner let a, ni puanhei ne potthlêr a, ki makungah ni ṭap a. En inkhôk tak neh vânisal pharna rang khopa mang rangin Jerusalem khopui kha denginthei rang kî ti a nit a; khanniseh, ni ṭongṭaina kha ki lei riat a,

²⁰khasikah khan Jerusalem chunga thil ṭhano tak ki zuang ithlun rang kha ni thi mâkah chu zuang ithlun no ning a, ni mitin mu tlak no tin e. Nang chu thlangam takkan ni pi neh puhei ziangah nang ṭhui ki ta, ne thlânah thlangam takka ṭhuiin om ni ti,’ a ti, ti rei,” a ti a. Khanchu, kha mihei khan thu kha rêng Josia ziangah an hong ithlun nôk a.