Read Biete 2 RÊNGHEI 23 Bible Online

2 RÊNGHEI 23 - Biete bible

2 RÊNGHEI 23

¹Rêng khan mihei a tir a, Judai ram neh Jerusalem khopuia ruaituhei murdi a ziangah an koibûm riai a.

²Judai ram neh Jerusalema om thiampuhei neh zânthlahei, mipui murdi, mi richonghei neh mi inrianghei neh an rêngkanPUMAPA inah khan an hang fe a. PUMAPA Tempila an lekhabu mu Thuthlung Bua chuang murdi kha an riatah rêng khan a tep a.

³Rêng kha chopui ridînah khan â ding a, PUMAPA nung izuia, a thupêkhei izôm a, a thu inriathei, a thu inkunghei ipom rangin PUMAPA makungah khan thu a thlung a. Rithla neh lungrila tititaka thuthlung thu lekhabua chuanghei ipom rangin ṭong ân kung a, mipui murdi khom khan idingin thuthlung kha ipom an inkung a.

⁴Khanungchu, rêng khan Thiampu Laltak Hilkia hei, a thuaia thiampuhei, Tempil kotbâi vêngtuhei kha PUMAPA Tempil insunga Baal hei, Aseri rilim hei neh rivân ârsi an biakna thil mangrua murdi ranga siam bûrbêlhei murdi kha ân lâk suak riai a, Jerusalem putiang Kidron phâiah a hâl a, arvâmhei kha Bethelah a fepui a.

⁵Judai ram khopuihei neh Jerusalem kôlvêla nam dang pathian biakna bôlkuanga ribôlna lantu rang Juda rênghein thiampu an lei phun a, Baal ziangah hei, inî neh ithla ziangah hei, ârsi neh rivâna thil iomhei murdi ziang heia ribôlna lan ngaitu murdi kha an sin ân mâk a.

⁶PUMAPA Tempil sunga pathiannu Aseri rilim an iphun kha a lâk suak a, Jerusalem putiang Kidron phâiah a chôi a, a hâl a, arvâm kha a suk indi a, vântlâng thlânmualah khan an rithe dar a.

⁷Khante, PUMAPA Tempila nochizuarhei omna inhei kha a ṭhet isiat a. Kha inah khan Aseri chubai ûnnaa an imang ngai zakorfual kha nupanghein an ikhông ngai a nit.

⁸Juda khopuihei ata kha thiampuhei murdi kha Jerusalemah an hong ṭhui a, ram pumpuia ribôlna an lei lanna ngai bôlkuanghei kha borinnimin a siam pêk riai a. Khopui kotbâi lûtna voitiang panga, khopui optu Josua isiam kotbâi kôla sanong bôlkuang khoripui an biakna khom â siat pêk chit a.

⁹Kha bôlkuang thiampuhei kha Jerusalema PUMAPA mâichâma sin itho rangin iphal ni mak a; khannisela, an thiampu champuihei dongtuma inran chol pol ino bairiam kha chu an ifâk sa thei a nit.

¹⁰Rêng Josia khan tutên an naipa manih, an nainu manih pathian Moleka ziangah hâlrivâm thillanna meiah an lan khâi nona rangin Hinom phâia sanong bôlkuang Tofet kha borinnimin a siam pêk a.

¹¹Juda rênghein inî zianga lan rang sakor an ipêkhei kha a khâi pai a, tâli an ikâi ngaihei kha a hâl a. Kha sakorhei neh tâlihei kha PUMAPA Tempil tual kotbâi kôl, rêng miliantak Nathan Meleka omna ina rithoka inâi tengah an isia ngai a nit.

¹²Rêng Ahaza in chuanchunga Juda rênghein mâichâm an isiamhei neh rêng Manasean PUMAPA Tempil rikul sung tolâi inika mâichâm ai siamhei kha rêng khan â sim a, â tôk inrinôi chit a, Kidron vadungah a pai a.

¹³Jerusalem sua tiang pang oliv tlâng sim tiang panga Sidonhei pathian porinche tak Astarothi ta ranghei, Moabhei pathian porinche tak Khemosa ta rang hei, Amona richihei pathian porinche tak Milkoma ta rang heia sanong bôlkuang rêng Solomona isiamhei kha rêng Josia khan borinnimin a siam pêk a.

¹⁴Lungphunhei kha â tôk inrinôi riai a, pathiannu Aseri rilim, an thingtum phunhei kha arkit a; kha munheiah khan miriam ru a sia a.

¹⁵Khabanah khan Josia khan Israelhei ṭhui insualtu Nebata naipa Jeroboaman Bethel khuaa pathian biakna ranga mâichâm neh bôlkuang ai siam kha a siat chit a. Mâichâm kha â sim a, a lunghei kha a suk ikhoi a, â tôk inrinôi chit a; Aseri rilim khom kha a hâl vang a.

¹⁶Khanungchu, Josia khan a hang thlîr vêl a, itlângah khan ithlânhei a hang mu a; khanchu, ithlâna ruhei kha a vân lâk a, mâichâmah khan a hâl a, borinnimin a siam pêk a. Khangkan a nit rang kha tianlâia, kût an mang ṭuma rêng Jeroboaman mâichâma thil a lan lâia zânthlan a lei înpuang PUMAPA thu angkah takin mâichâm kha borinnimin ai siam a nit. Khante, rêng Josia khan a en vêlin chu kha thu lei inpuangtu zânthla thlân kha a hei mu a.

¹⁷Khanchu, ani khan, “Ama soh tu thlân im ai nit?” a ti a. Khante, Bethel khua mihei khan, “Pathian mi, Judai rama rithoka hong, Bethela mâichâm chunga ni thiltho tâk lei inpuang thlâmtu zânthla thlân a nit,” an ti a.

¹⁸Josia khan, “Inchâng viat no rei, a ruhei kha thon viat no rei,” itin thu a pêk a. Khanchu, tutên a ruhei kha tôn viat mak a, Samaria rama rithoka zânthla hong ruhei khom kha itôn ni mak e.

¹⁹Israel ram kho tinah Israel rênghein nam dang pathian biakna bôlkuang an lei isiamhei kha â siat a, kha rênghei khan PUMAPA ningthikna kha an îchok thoi ngai a nit. Bethel khuaa a tho lam angkah takin kha muna mâichâmhei khom khah a îtôk indi chit a nit.

²⁰Sanong thiampuhei murdi kha an sinthona mâichâm chitah khan a that riai a, kha mâichâmheiah khan miriam ruhei a hâl a. Khanungchu, Jerusalemah a kîr nôk tâk a.

²¹Thuthlung Bua riziak angkan PUMAPA Pathian chôiinrisâng nan mipuihei kha Kalkan Kût imang rangin rêng Josia khan a ti a.

²²Hi ṭuma Kalkan Kût roinpui angkana rêng rêng hi Israelhei chunga roirêltuhein roi an rêla rithoka, Israel rênghei manih, Juda rênghei manih khomin Kalkan Kût mang roinpui kha la om ngai mak.

²³Khangkah khan rêng Josia inlal kum sômleiiriatna kumah khan kha Kalkan Kût kha Jerusalem khuaah PUMAPA ta rangin an imang tâk a nit.

²⁴Thiampu Laltak Hilkian Tempila Dân bu ai mua chuang Dânhei kha idet takka an zôm theina rangin Josia khan Jerusalem khua neh Judai ram ata kha mithi sôn thiamhei, dôithiamhei kha a ûm isua a, insungkua pathian an ibiakhei, mirmilhei neh sanonghein pathiana an ibiak ngai rêng rêng kha ân paih vang a.

²⁵Mosia dân murdi izôm a, lungril murdi neh rithla murdi neh râtna murdia PUMAPA pom, ama angkana rêng rêng a matonah rêng tute la om ngai mak a; â nungah khom ama angkana kha tute om nôk khâi no nih.

²⁶Khannisela, rêng Manasea thil thohei sikah khan Judahei chungah PUMAPA ning kha ân thik pêk a, atûn tenan khom a ningthik a lai dâi ino a nit.

²⁷PUMAPA khan, “Israelhei chunga kî tho angkah khan Judahei chungah khom kî tho rang a nit, Judahei chu ki mu phâk nona rangah kî thon inrimang rang a nit. Hi ki khopui, ki irthlang Jerusalem ngêi hi nôl ki ta, keimah chubai an ne ûn ngaina ranga ki înkung Tempil khom hi kî mâk rang a nit,” ai ti a nit.

²⁸Josia thurchi danghei, a thiltho murdihei kha Juda Rênghei Thurchi Riziakna Bu-ah inchuang riai a nit.

²⁹Josia inlal lâiah khan Aigupta rêng Nekoa kha Asuria rêng hang isan rangin Eufratis vadungah a hang fe a. Rêng Josia khan Aigupta sipaihei kha Megido munah lei hang doi inringam rangin a fe a, kha ridoina munah khan ani chu ithatin ai om tâk a nit.

³⁰Khante, a mihei khan Megidoa rithokah khan a ruak kha tâliah an bâng a, Jerusalemah an chôi a, rênghei thlânah khan an phûm tâk a. Khanchu, Juda mipuihei khan Josia naipa Joahaza kha an ṭhui a, riak an inrithu a, a pa rithûlin rêngin an phun tâk a.

³¹Joahaza kha Juda rêng a hong changah khan kum sôminikah kum ithumka mi a nit a, Jerusalemah khan thla thumkah a înlal a nit. A nu riming kha Hamutali a nit a, Libna khuaa Jeremia nainu a nit.

³²A puhei angkah ngirin PUMAPA mitmuah thil ṭhano tak a tho ngai a.

³³Aigupta rêng Nekoa khan Hamath bial Ribla munah suakin a khum khap a, ân lalna kha a mong tâk a. Aigupta rêng khan Judahei kha tangkarua her sângithumkah her rizalikah neh rângkachak her sômithumkah her ilikah siaa chôi ngai rangin bituk ai siam pêk a nit.

³⁴Rêng Nekoa khan Josia nai Eliakima kha a pa Josia rithûlah khan rêngin a phun a, arming kha Jehoiakima itin ai thleng pêk a nit. Joahaza kha chu rêng Nekoa khan Aigupta ramah a ṭhui thal a, amakhan ai thi tâk a nit.

³⁵Aigupta rêng Nekoa bituk siam pêk lam angkana siaa chôi rang tangkarua neh rângkachak a nei theina rangin Jehoiakima khan a ram sunga mi tin an thilnei neh ritlukin sia a dôl nôk chit a.

³⁶Jehoiakima kha Judai ram rêng a hong changah khan kum sôminikah kum ringaka mi a nit a, Jerusalemah khan kum sômleikhatkah a înlal a nit. A nu riming kha Zebidi a nit a, Ruma khuaa Pedaia nainu a nit.

³⁷Khante, a puhei angkah ngirin PUMAPA mitmuah thil ṭhano tak a tho ngai a.