Read Biete 2 RÊNGHEI 24 Bible Online

2 RÊNGHEI 24 - Biete bible

2 RÊNGHEI 24

¹Jehoiakima ân lal lâiah khan Babilon rêng Nebukadnezara khan Judai ram a hong rûn a, kum ithumka sung chu Jehoiakima kha a thunuaiah ân om a; khanungchu, Jehoiakima kha arhel tâk a.

²PUMAPA khan Babilon sipaihei, Suria sipaihei, Moab sipaihei, Amon sipaihei kha Jehoiakima doi a, Judai ram isian rimang rangin a tir a. Hingkana a tho rang hih PUMAPA khan a zânthlahei imangin a lei îsîr thlâm tâk a nit.

³Rêng Manasea thiltho murdi, a thil thonsual neh mi ningsiat sin ino thisen â sua a, Jerusalem kha mi ningsiat sin ino thisen ân sip sikin Juda mipuihei kha PUMAPA mu phâk nona rangah thon inrimang an nit theina rangin kha thilhei murdi khah Judahei chungah PUMAPA thun a zuang itlung a nit. PUMAPA khan Manasea thiltho kha a îzâ thei tlak ino a nit.

⁵Jehoiakima thurchi danghei neh a thiltho murdihei kha Juda Rênghei Thurchi Riziakna Bu-ah inchuang riai a nit.

⁶Jehoiakima kha a thi tâk a, a naipa Jehoiakina kha arthûlin a hong inlal tâk a.

⁷Eufratis vadunga rithoka Aigupta ram mâr tiang ramrî dênin Babilon rêng thunuaiah a om tâk sikin Aigupta rêng neh a sipaihei kha an hong irthok suak nôk tlak khâi ino a nit.

⁸Jehoiakina kha ân lal phut lâiah khan kum sômlei kum iriatka mi a nit a, Jerusalemah khan thla thumkah a înlal a nit. A nu riming kha Nehusti a nit a, Jerusalem khuaa Elnathana nainu a nit.

⁹Khante, Jehoiakina khan a pa angkah ngirin PUMAPA mitmuah thil ṭhano tak a tho ngai a.

¹⁰Kha ân lal lâiah khan Babilon rêng Nebukadnezara sipaihei khan Jerusalema khua kha an hong hual a.

¹¹Khangkana an hual lâiah khan rêng Nebukadnezara ngêi kha Jerusalemah a hang fe a.

¹²Khanchu, Juda rêng Jehoiakina kha a nu hei, a nai hei, a sipai hei neh a milianhei neh khan Babilon rêng kutah an lei ripêk tâk a. Nebukadnezara inlal kum iriatnaah khan Jehoiakina kha suakin a man a.

¹³Tempil richon murdi neh rêng ina richon murdi kha Babilon khuaah a chôi riai a. PUMAPA lei înpuang angkah khan rêng Solomonan PUMAPA biak ina mangrua rang rângkachak bûrbêl ai siam murdi kha Nebukadnezara khan â tôk khoi riai a.

¹⁴Nebukadnezara khan Jerusalem kho mi, rêng insungkua murdihei, milian murdihei, an rêngkan mi sîngkah a man a, suakin a ṭhui a. Khabanah, kutithiam murdihei, thîr isuk ngaihei murdi khom kha an ṭhui sa riai a; mi inriangtehei bang kha Judai ramah khan ai mâk a nit.

¹⁵Nebukadnezara khan Jehoiakina kha a nu hei, a nupui hei, a milian hei neh Judai rama mi rât ihâi hei murdi khah Jerusalema rithokin Babilona suakin a ṭhui a.

¹⁶Nebukadnezara khan pasalṭha sipai ichangthei murdi kha Babilonah a ṭhui riai a; an rêngkan mi sângsarikah an nit a, kutithiamhei neh thîr isuk ngaihei kha mi sângkah, annihei kha Babilonah suakin ai ṭhui a nit.

¹⁷Nebukadnezara khan Jehoiakina pangâk Matana kha Juda rêngin a siam a, arming khom kha Zedekia itin a thleng pêk a.

¹⁸Zedekia kha ân lal phutah khan kum sôminikah khatka mi a nit a, Jerusalemah khan kum sômlei kumkah a înlal a nit. A nu riming kha Hamutali a nit a, Libna khuaa Jeremia nainu a nit.

¹⁹Rêng Jehoiakina angkah ngirin rêng Zedekia khom khan PUMAPA mitmuah thil ṭhano tak a tho ngai a.

²⁰PUMAPA kha Jerusalem neh Judai ram mihei chungah a ning a thik tak tak a; khanchu, a mu phâk nonaah ai ûmisua tâk a nit.