Read Biete 2 RÊNGHEI 25 Bible Online

2 RÊNGHEI 25 - Biete bible

2 RÊNGHEI 25

¹Zedekia kha Babilon rêng Nebukadnezara chungah khan arhel tâk a. Khanchu, Zedekia inlal kum ikuakna, thla sômna, sûn sômnî takin Nebukadnezara kha a sipaihei neh an hong a, Jerusalem kha an hong doi a. Khopui putiang riabuk an khuar a, bang an sung khap a.

²Rêng Zedekia inlal kum sômleikhatna dênin khua khah an hual a.

³Kha kum ngir, a thla lîna, a sûn ikuak nî-ah khan kha khua khah an ṭâm tak tak tâk a, khantaka mihei ranga khan ifah rang rêng rêng om khâi mak a.

⁴Babilon mihei khan khopui khah an ihual khap chu a nit a, khan khopui rikul kha an iver a, a sunga sipai murdihei neh rêng kha idâirek kan zânah an irel riai a. Rêng rikul kôlah an fe a, kulpui bang inika kâra kotbâiah khan an suak a, Jordan dung rikamah lâizâm an tho riai a.

⁵Khannisela, Babilon sipaihei khan rêng Zedekia kha an rizûl a, Jeriko kôl phâiah an môk a, a sipaihei khan an mâka lâizâm an tho vang tâk a.

⁶Zedekia kha an man a, rêng Nebukadnezara ziangah Ribla khuaah an ṭhui a, Nebukadnezara khan a chungchâng thu a rêl a.

⁷Khante, Zedekia mu chung ngêiah a naipahei kha Nebukadnezara khan a that pêk a, Zedekia mitru khom an ikhel suak pêk a; kol an inbuna, Babilonah an fepui tâk a.

⁸Babilon rêng Nebukadnezara inlal kum ikuakna, thla ringana, sûn sarinî-ah khan Babilon rêng sipai ruaitu Nebuzaradana kha Jerusalemah a lût a.

⁹PUMAPA Tempil kha a hâl a, rêng inhei neh Jerusalema milianhei in murdi khom a hâl riai a.

¹⁰A sipaihei murdi khan khopui kulpui murdi kha an isiat riai a.

¹¹Khanungchu, Nebuzaradana khan khopui sunga mi la omhei kha Babilonah a ṭhui a, kutithiam mi la omhei neh Babilonhei kuta lei ripeh tâkhei murdi kha Nebuzaradana khan Babilonah suakin a ṭhui a.

¹²Khannisela, mi inriangte tehei, neinun pathang khom nei inohei kha chu grep rikulhei neh loiheia sin itho rangin Judai ramah khan a mâk a.

¹³Khante, PUMAPA Tempila dâr chopui hei, dâr tâli hei, dâr tuipang hei kha Babilonhei khan an ikhoi chit a, a dâr murdi kha Babilonah an chôi riai a.

¹⁴Mâichâma vutluakhei, vutsiahei, meiser ichokna mangrua hei, thillan thisen ridôlna tâbor hei, namhoi hâlna berbu hei neh dâr bûrbêl murdi Tempil ribôlnaa an imang ngaihei kha an lâk a.

¹⁵Rângkachak neh tangkarua siam rêng rêng chu, berbu chînte hei neh mei lâknahei ten khom an chôi riai a.

¹⁶Solomonan PUMAPA Tempil ranga ai siam dâr chopui inikahei, tâlihei, dâr tuipanghei kha var thei loi rakka rik a nit.

¹⁷Chopui inikahei kha ar-ang bang a nit a, mûk sômlei mûk iriatka risâng seng seng a nit. A sîpah khan dâr lubôk ipo a om a, kha lubôk ipo risâng dân kha mûk ithumkah a nit a; lubôk ipo vêlah khan inriziak rivo neh theisen rilim a chuang a, dâr koronga siam a nit, a chopui dang khom kha ri-ang bangka siam a nit.

¹⁸Khante, sipai ruaitu Nebuzaradana khan Thiampu Laltak Seraia hei, a thuaia zel thiampu Zefania hei neh Tempila ruaitu lian ithumkah a man a, Babilonah a ṭhui a.

¹⁹Sipai ridoi mihei chunga ruaitu khatkah neh rêng roiisakpui ngai khopui sunga la om ringaka neh, sipai ruaitu thuai zela sipaihei chungchâng riziak ngaitu khatkah neh kha rama mi poimo sômirukkah kha khopui sung ata an man sa a.

²⁰Nebuzaradana khan anni kha a ṭhui a, Babilon rêng ziangah Ribla khuaah a fepui a.

²¹Babilon rêng khan Hamath bial, Ribla khuaah khan a lei that a. Khanchu, Judai rama mihei kha an ram ata bôia ṭhuiin an om tâk a.

²²Babilon rêng Nebukadnezara khan Sefana nai Ahikama naipa Gedalia kha Judai ram optu rangin a siam a, Babilona an iṭhui ino Judai rama la omhei optu rangin a sia a.

²³Juda milianhei neh sipai ruaituhei, Babilonhei kuta ripe nohei khan Babilon rêngin Gedalia kha Judai ram optu rangin a siam iti an riatin chu Mizpa khuaah Gedalia ziangah an fe a. Khahei kha Nethania naipa Ismaela, Karea naipa Johanana, Netofa kho mi Tanhumeta naipa Seraia, Maaka kho mi Jezania hei an nit.

²⁴Gedalia khan an ziangah, “Babilon milianhei kha îte iṭi rang omak, hi ramah hin om mai unla, Babilon rêng thunuaiah om unla; khanchu, tinrêngah nin ta rangin ṭhâng a ti,” a ti a.

²⁵Khannisela, kha kum a thla sarinaah khan rêng richi, Elisama nai Nethania naipa Ismaela kha mi sômka ṭhuiin Mizpa khuaah an fe a, Gedalia kha Mizpa khuaa Judahei neh Babilon mi a zianga omhei kha an zu doi a, an zu that riai a.

²⁶Khanungchu, Israelhei murdi inriang richong an rêngkan sipai ruaituhei neh an suak a, Babilonhei an ṭi sikin Aigupta ramah an fe tâk a.

²⁷Khante Evilmerodaka kha Babilonah a hong inlal kumah khan Juda rêng Jehoiakina kha lung ân kham a, Jehoiakina tâng kum sômithumka neh kum sarina, thla sômlei thla nikna, sûn sôminika sûn sarina nî-ah khan Evilmerodaka khan Jehoiakina kha tâng in ata kha â sua a,

²⁸a chungah lungkham takkan sin a tho a, Babilona rênghei suaka tânga om sahei nêka dingmun inchung ualah a sia risâng bîk a.

²⁹Khanchu, Jehoiakina kha a tâng in silbomhei ithleng rang neh a damsung kârkah rêng zianga khalai rikhîl sa mai rangin iphal a nit tâk a.

³⁰Khapenah, ai nang murdi inrup rang nîn tin a damsung kârkah rêngin dongtum a pêk mai ngai a.