Read Biete 2 RÊNGHEI 3 Bible Online

2 RÊNGHEI 3 - Biete bible

2 RÊNGHEI 3

¹Juda rêng Jehosafata inlal kum sômlei iriatna kumah khan Ahaba naipa Jorama kha Israelhei chungah Samari khuaah a hong inlal a, kum sômleiinikah a înlal a nit.

²PUMAPA mitmuah thil ṭhano tak a tho ngai a; khannisela, a nu Jezebeli neh a pa Ahaba angkah takin chu isual mak e. Â pa mirmil, Baala chubai ûnna muna ai siahei kha â siat pêk a.

³Nikhomsela, a matona mi Nebata naipa rêng Jeroboama angkan Israelhei kha sualah a ṭhui inlût a, a irlet nuam tlak ino a nit.

⁴Moab rêng Mesa khan bera a vâi ngai a, ani khan Israel rêng ziangah kum tin berate nuaikah neh bera nuaika mul kha siachôinan ai pêk ngai a nit.

⁵Khannisela, Israel rêng Ahaba a thi nung tenan chu Moab rêng Mesa kha Israel rêng chungah a hong rihel tâk a.

⁶Voikazelin rêng Jorama kha Samari khua ata a suak a, a sipaihei murdi a bûm a.

⁷Juda rêng Jehosafata ziangah, “Moab rêng ki chungah arhel a, Moabhei ne hong idoipui nuam ni tîm?” itin mi a tir a. Rêng Jehosafata khan, “Nang hang doipui ki ti, keimah neh nangmah, ki mihei neh ni mihei chu pumkah ei nit a, ki sakorhei neh ni sakorhei khom pumkah an nit.

⁸Taktiang lampuia rithokin im ifen ei doi rang?” a ti a. Jorama khan a sâm a, “Lampui rivêlna, Edom ramchâr tiang lampuia fen doi ei ti,” a ti a.

⁹Khanchu, Rêng Jorama hei, Juda rêng neh Edom rêng hei kha an rithok suak a. Sûn sarikah an fe tenan chu sipaihei neh an ran ṭhuihei in rang tui nei khâi mak a.

¹⁰Israel Rêng Jorama khan, “Ingkana tâk im na; PUMAPA khan rêng ithumkahei hi Moabhei kuta peh rangin a ne iṭhui bûm titak a nit hi te,” a ti a.

¹¹Khannisela, Rêng Jehosafata khan, “Amahin PUMAPA ne sôn pêk rang zânthla tute an iom ino mani?” a ti a. Rêng Jorama sipaihei ruaitu khatkah hin a sâm a, “Elija risanpuitu Safata naipa Elisa chu hin a om,” a ti a.

¹²Jehosafata khan, “Ani kha zânthla diktak a nit,” a ti a. Khanchu, rêng ithumkahei kha Elisa ziangah an fe tâk a.

¹³Elisa khan Israel rêng ziangah khan, “Îtho rang im nang kî san rang? Fen la, ni pa neh ni nu zânthlahei kha va sôn roh,” a ti a. Israel Rêng Jorama khan a ziangah, “Fe no ning e; rêng ithumkahei hi Moabhei kuta peh rangin PUMAPA khan a ne iṭhui bûm a nit hih,” a ti a.

¹⁴Elisa khan a sâm a, “A sin kî tho ngai PUMAPA ringna chingin kî ti a nit, Juda rêng Jehosafata hih marit non lang chu nangmah hih chu ni tiang khom mâi ingatin, imuh khom nang kî mu nuam viat ino rang a nit.

¹⁵Îkhom ni sela, irîhoi tum ithiam ne hong koi pêk rei,” a ti a. Irîhoi tum ithiam khan a ṭingṭang a tum lâiah khan PUMAPA ritha kha Elisa chungah a zuang tlung tâk a.

¹⁶Khanchu, Elisa khan, “PUMAPA khan hingka hin a ti; ‘Hi phâizôl murdiah hin khur choih riai rei.

¹⁷Ithli rêng rêng neh rua rêng rêng mu viat no khom unla, hi phâizôl hih tui sip riai a ti; nangmani neh nin ran lômhei neh nin sahei hin in nin ti,’ a ti.

¹⁸Ama tho khah PUMAPA ta rangin chu thil intak ni viat mak e, nin kutah Moabhei khom hi nangni pêng a ti.

¹⁹Kulpui inei khuahei murdi neh khopui ihoi murdi kha isiang nin ta, an theikung murdi iphûr pêk nin ta, an tuikuang murdi kha nêl insip nin ta, an loimun iṭha murdi kha lung dêng inbit pêk nin ti,” a ti a.

²⁰Atûk zîng hâlrivâm thillan an lan ngai zoro vêlah khan Edom ram tianga rithokin tui a zuang luang zut zut a, phâizôl kha tuiin a zuang sip tâk a.

²¹Moabhei khan anmani doi rangin rêng ithumkahei kha an hong iti an lei riatin chu ipa riamrei ilek thei ten murdi chu, naipang ata itar idênin an rikoi bûm a, an ramrî-ah khan an lei iruang a.

²²Atûk zîng khua a hong vâr a, inî a hong suakin chu tui kha a zuk el a, tui kha thisen angkana sen pumin an zuk mu a.

²³“Thisen a nit soh, rênghei kha anmani neh anmani an ridoi a, anmani neh anmani an irthat a nit ngêt soh. Tho rei, an riabuk la va rok rei u,” an ti a.

²⁴Khannisela, riabuk kha an va tlungin chu Israelhei khan anni kha an lei doi a, an hong rizûl a. Israelhei khan an hong rizûl mai a, Moabhei kha rizûl thiai pumin itam takkah an ithat a nit.

²⁵Khuahei kha an isiat a, loimun iṭha murdi kha Israelhei khan lungin an dêng a, lungin a sip riai tâk a; tuikuang murdi an nêl insip a, theikung murdi an iphûr a. A nungkhôn takah chu an khopui tak Kir Heres bang kha a om tâk a, kha khom khah vailungdênga deng ngaihei khan an hual a, an doi a.

²⁶Moab rêng khan â râlhei kha a înê no rang a nit iti a riatin chu khandai ichôi mi sipai rizasarikah a ṭhui suak a, â râlhei inêr thleng a, Suria rêng zianga lâizâm itho a tum a; khanniseh thei mak a.

²⁷Khanchu, a naipa uliantak, arthûla lân lal rang kha, a man a, khopui kulpui sîpah khan hâlrivâm thillanin Moab pathian ziangah a lan tâk a. Israelhei khan amakhah an mu a, an ṭi tak tak a, khopui ata kha an rikiang a, an ram tiang an kîr nôk tâk a.