Read Biete 2 RÊNGHEI 4 Bible Online

2 RÊNGHEI 4 - Biete bible

2 RÊNGHEI 4

¹Zânthla lômhei lâia mi khatka nupui, numei ichang tâk hin Elisa ziangah, “Epu, ki pasal kha a thi tâk a. Nî riat angkan ani kha Pathian iṭi mi a nit a; atûnah hin ki pasal lâkai ritângna pu khan ki naipahei ruai bôia ṭhui rangin ai hong a nit,” itin a lungzîng thu â sîr a.

²Elisa khan a ziangah, “Im nang ki tho pêk rang? Ne ril ta, inah im nî nei?” a ti a. Ani khan, “Ne somnu hin îte nei mang e, oliv riak bûrtekah bang hi kî nei chu a nit,” a ti a.

³Elisa khan, “Fen la, ni bungtualbômhei bêl irong ni mu thei dôrkah va bûm roh.

⁴Khanungchu, nangmah neh ni naipahei kha insungah lût unla, inkhâr khap unla, kha bêl murdiah khan siriak kha sung unla, â sipkah a ranin khâi thar thar rei,” a ti a.

⁵Khanchu, nupangnu kha a naipahei neh insungah an lût a, in an khâr khap a, a naipahein bêlhei an hong ichôipêkah khan ani khan siriak kha a lei sung mai a.

⁶Bêlhei kha an insip riai tenan chu a naipahei ziangah, “A dang a la om im?” a ti a. A naipa khatkah khan a ziangah, “Bêl irong om khâi mak e,” a ti a. Khanchu, siriak kha a mong tâk a.

⁷Zânthla Elisa ziangah a fe nôk a, ani khan, “Fen la, siriak kha va zuar tan la, ni lâkai kha va tuak inla, a bân la chuangah khan nangmah neh ni naipahei kha var enkol rei,” a ti a.

⁸Sûnkah chu Elisa kha Sonem khuaah a vân zin a, amakhan nupang richongnu a om a, ani khan bu ne a lei koi a. Khanungchu, Sonemah a fe fengin khâmnu inah khan bu ne rangin ai lût ngai a nit.

⁹Khâmnu khan a pasal ziangah, “Ringai ta, hi mi ne hong ithlo mai ngaitu hih Pathian mi rithiang a nit ngêt iti ki riat.

¹⁰Tho inchungah khin chontante lei siam pêk rei, zâlmun hei, docham hei, ṭhungmun hei, meiser siana hei, seh pêk ei ta; khanchu, ei ziangah a hong fengin amakhan la om ngai riseh,” a ti a.

¹¹Sûnkah chu Elisa kha Sonem khuaah a va fe nôk a, chontanah khan a lût a, a zâl a.

¹²Â som Gehazi ziangah, “Fen la, Sonem nupangnu kha zu koi roh,” a ti a. Nupangnu kha a hongin chu

¹³Elisa khan â som Gehazi ziangah, “En ta, hi nupangnu hin iduam takkan a ne enkol a, eimanin teh im ei tho pêk rang tâk? Rêng manih, sipai ruaitu manih isôn pêk a nuam im ridon ta?” a ti a. Nupangnu khan a sâm a, “Mahni chipuihei lâia om ki nit a, kî nang murdi chu ki nei,” a ti a.

¹⁴Elisa khan Gehazi ziangah, “Îngân tak im ei tho pêk rang tâk na?” a ti a. Gehazi khan a sâm a, “Naipa chu nei mak e, a pasal lak chu a tar tâk a,” a ti a.

¹⁵Elisa khan, “Hin va koi ta” a ti a. A va koi zoiin chu khâmnu kha a hong a, kotbâiah a hong iding a.

¹⁶Elisa khan a ziangah, “Nakum hingka tik zoro a hong tlungin chu naiipa ipom tâng ni ti,” a ti a. Nupangnu khan, “Epu, ringaiihoi takkan ne lêm no roh. Nang chu Pathian mi kêng ni nit a,” a ti a.

¹⁷Khannisela, Elisa khan a ziangah a ti pêk lam angkah takah khan a kum nôk khangkah zoro a hong tlung tenan chu naiipa a nei tâk a.

¹⁸Kum isôt ianka nungah chu naipang khom kha a hong lian ual tâk a, bu ât zoroah hin sûnkah chu a pa ziangah bu âttuhei neh bu an âtna mun loiah khan a va fe a.

¹⁹Voikazelin a pa ziangah khan, “Ki lu a nat, ki lu a nat,” a ti a. A pa khan â som ziangah, “A nu ziangah ṭhui roh,” a ti a.

²⁰Isom khan naipang kha a nu ziangah a ṭhui tâk a. A nu ziang a tlungin chu sûnlâi idênin a nu khan â pom a; khanchu, a thi tâk a.

²¹Elisa chontanah khan â pom a, zâlmunah ân zâl a, in a khâr a, a suak tâk a.

²²Khanungchu, a pasal khah a koi a, a ziangah, “Isom khatka khôk neh sakuartung khatkah ne hong tir pêk roh. Zânthla Elisa zianga va fe vak kî nang a nit, hong kîr nôk zel ki ti,” a ti a.

²³A pasal khan, “Îtho rang im vuani khera a zianga fe nî tum? Thla thar ruaiṭhe manih, sabatnî manih lak ni mak a,” a ti a. Khâmnu khan, “Ife ai nang ngêt a nit,” a ti a.

²⁴Khanungchu, sakuartung kha an inrifûk zoiin chu â som ziangah, “Sakuartung hi a rât thei dôrka râtin intlân roh; thu nang ki pêk non chu nen dôk rang ni mak,” a ti a.

²⁵Khanchu, Elisa omna Karmel tlâng ipanin an fe tâk a. Ilah takkah an la om lâiah khan Elisa khan a lei mu a, â som Gehazia ziangah, “En ta, Sonem nupangnu khah ai hong a nit.

²⁶Ama don rangin va tlân inla, a ziangah, ‘Ni dam im? Ni pasal a dam im? Naipang kha a dam im?’ Lei va ti roh,” a ti a. Nupangnu khan a lei sâm a, “O ki dam,” a ti a.

²⁷Khannisela, Elisa ziang a hong tlungin chu a makungah â bok a, a ke a hang itûk khap a. Khante, hong nam inrikiang itumin Gehazia khan a hong pan a; khannisela, Elisa khan, “Îte lo no roh, a lungril a sôl tak tak iti nî mu no mani? PUMAPA khan hi chungchâng hi ki ziangah a la thup khap a, ne la ril hi mak e,” a ti a.

²⁸Nupangnu khan a ziangah, “Epu naipa nang ki nî ngân ima kha? ‘Ne lêm no roh,’ nang kî ti ni mak im a kha?” a ti a.

²⁹Khanchu, Elisa kha Gehazia tiang arhêl a, a ziangah, “Rimot takkan, ke rol hih chôi inla, va fe roh. Mi ni irtongpui rêng rêng chibai ituh no roh; chibai nang an itûk khomin sâm no roh. Inah khan fe thal inla, ke rol hi naipang chungah var ngat roh,” a ti a.

³⁰Nupangnu khan Elisa ziangah, “PUMAPA ringna neh ni ringna chingin kî ti a nit, nang ki îthla tlak ino rang a nit,” a ti a. Khanchu, an ruaikan munkan an fe tâk a.

³¹Gehazia kha an matona a lei fe a, Elisa rol kha naipang chungah khan a lei ringat a; khannisela, irî manih, rithuak manih, îte omak a. Khanchu, Elisa sôn rangin a hong kîr nôk a, “Naipang kha har viat mak e,” a ti a.

³²Elisa kha a hong tlungin chu a khâtin chontanah khan a fe a, a zâlmuna naipang ithi lei izâl kha a mu a.

³³Khanchu, a va lût a, in a khâr a, PUMAPA ziangah a ṭongṭai a.

³⁴Khanungchu, naipang chungah khan â bok a, a mûr neh a mûr, a mit neh a mit, a kut neh a kut ân ritôn a. Khangkana naipang chungah a zuk ibok lâiah khan, naipang taksa kha a hong lum tîr tîr tâk a.

³⁵Elisa kha a thoi a, chontan sungah khan arlong a; khanungchu, a fe nôk a, naipang chungah khan a hang ibok nôk a. Khanchu, naipang kha voisarika â sim a; khanungchu, a hong meng tâk a.

³⁶Elisa khan Gehazia a koi a, “Naipangte nu hi zu koi roh,” a ti a. Nupangnu kha a hong lûtin chu, Elisa khan a ziangah, “Ni naipa hi ipom roh,” a ti a.

³⁷Khanchu, Nupangnu kha Elisa ke bulah a mâia rinêng isikin â bok a; khanungchu, a naipa kha â pom a, a suak tâk a.

³⁸Ṭumkah, ram pumpuiah iṭâm a tlâk lâiin Elisa kha Gilgalah a kîr nôk a. Zânthla lômhei ân risei lâiin â som ziangah, “Bêl iliantak kha ichuan inla, zânthla lômhei rang fâipui siam roh,” a ti a.

³⁹An lâia khatkah kha thil itlâk rang izongin ramah a va fe a, vaâkûm râng a va mu a, â râ khah a puan keng dôrkah a hong ifûn a, a hong chôi a. Im ai nit îte reh loiin archan a, bêla fâipuiah khan a tlâk tâk a.

⁴⁰Khanungchu, kha mihei fâk rangah khan an hang thur a; khannisela, fâipui kha an hang fâkin chu, Elisa ziangah, “Uai, tûr kêng ai nit,” an ti a; fah thei khâi mak a.

⁴¹Elisa khan, “Ibaidi hong chôi tah u,” a ti a. Amakha bêlah khan an zuk tlâk a, “Thur ta rei, ifah thei a nit tâk,” a ti a. Khanchu, bêlah khan iṭiom îte om khâi mak a.

⁴²Zoro dang nôkah khan, Baal Salisa rithokin mi khatkah a hong a, Elisa kha bu thar ibai thliam sôminikah neh buvui a hong chôi pêk a. Elisa khan â som ziangah khan, “Hi mihei hi infah roh,” a ti a.

⁴³Khannisela, â som khan, “Hi zâk têkah bang hi mi rizaka fâk khop rang inrup no nih?” a ti a. Elisa khan a sâm a, “Hi mihei fâk ranga hin peh roh; PUMAPA khan hingka hin a ti, ‘Fâng an ta, an fâk bân om a ti,’ a ti,” a ti a.

⁴⁴Khanchu, isom khan an makungah khalai a hong do a, an rêngkan an fâk a, PUMAPA ti lam angkah khan an fâk bân kha a lai om a nit.