Read Biete 2 RÊNGHEI 5 Bible Online

2 RÊNGHEI 5 - Biete bible

2 RÊNGHEI 5

¹Suria sipai ruaitu tak Naamana mangin PUMAPA khan Suria sipaihei nêna a pêk ngai sikin Naamana kha Suria rêng khan iṭha takkan a irngai inlutin ai marit a nit. Ani khah sipai ihâi a nit a; khannisela, iphâr rî rivoi a nit a.

²Ṭumkah chu Suria sipaihei khan Israelhei an va rûn a. Israel rama rithokin nupangte hi an man a, an hong ṭhui a; ani kha Naamana nupui suakin a om a.

³Sûnkah chu ani khan a pi ziangah, “Ki pu hi Samari khuaa zânthla ziangah va fe sela, ki ti tlia chu, a natna hi lei indam pêk zel a ti,” a ti a.

⁴Naamana khan kha thu khah a riatin chu, rêng ziangah a fe a, Israel nupangte thusîr khah â ril a.

⁵Rêng khan, “Va fe roh, Israel rêng ziangah lekha thon ki ti,” a ti a. Khanchu, Naamana kha arthok tâk a, tangkarua lûm sîngithumkah neh rângkachak lûm sângirukkah neh silbom rithlengna sômkah a chôi a.

⁶Israel rêng ziangah lekhathon kha a pêk a, kha lekha thonah khan hingkan riziak a nit, “Hi lekhathon hong ichôitu hi ki milian Naamana a nit a, ani hi a phâr a, ni lei indam pêk rangin ni ziangah ki hong itir a nit,” iti a chuang a.

⁷Israel rêngin kha lekha a zuk tepin chu lunginzîngin a puan â potthlêr a, “Mihei ithat thei a, inring nôk thei ngai Pathian im ki nit a, Suria rêng hin hi mi phâr indam pêk ranga ki ziangah a hong itir ringot hi? Ringai unla, ki chungah zoron ṭum ai zong a nit iti a îlang ian a nit,” a ti a.

⁸Zânthla Elisa khan Israel rêngin a puan â potthlêr iti a lei riatin chu rêng ziangah khan mi a tir a, “Îtho sik im ni puan ni îpotthlêr? Kha mi kha ki ziangah hong tir roh; khanchu, Israel ramah hin zânthla a om iti riang a ti,” a ti a.

⁹Khanchu, Naamana kha a sakorhei neh a tâlihei neh khan a va fe a, Elisa inkotbâi kôl a va tlung a.

¹⁰Elisa khan, “Jordan dungah voi sarikah risil inla, ni taksa ngaingir ripuh nôk ni ta, hong rithiang ni ti,” itia Naamana ril rangin â som a tir a.

¹¹Khannisela, Naamana kha a ning a thik ok a, a rot tâk a, “Amah ngêi kha ki ziangah hong suak a ta, PUMAPA a Pathian ziangah ṭongṭai a ta, a natna mun chungah hin a kut ringat a ta, a ne îndam rang manih ki sôn a.

¹²Khabanah, Damaska khua kôla vadung Abana hei, Pharpar hei kha Israel ram vadung murdihei nêka khan ai ṭhat ual ino mani? Khaheiah khan risilin ki irthiang thei inôm ai nit?” a ti a.

¹³A zianga fe â somhei khan a ziangah, “Epu, zânthla khan thil ikhir tak nang intho ngân khom sela, ni tho rang ni mak im a? Atûnah hin, ‘Var sil inla, var thiang roh,’ ni zianga ai ti kha itho rang tâk ai nit ni mak im?” an ti a.

¹⁴Khanchu, Naamana kha Jordan dungah a zu fe a, Elisa ti lam angkah khan voi sarikah a zur phûm a. A taksa kha naisen taksa angkah dôr a hong nit nôk a, a hong rithiang tâk a.

¹⁵Amah neh a lômahei murdi neh khan Elisa ziangah an hong kîr nôk a, a ziangah, “Ringai ta, Israel Pathian ti no chu pathian dang omak e, iti ki riat tak; khasikin, epu ringaiihoi takkan keimaa rithokin loman thilpêk hi iham roh,” a ti a.

¹⁶Khannisela, Elisa khan a sâm a, “A sin kî tho ngai PUMAPA ringna chingin kî ti a nit, îte lah no ning e,” a ti a. Naamana khan ilah rangin â thlêm ngit a; khannisela, nuam ngit mak a.

¹⁷Khanchu, Naamana khan, “A nit non chu, sakuartung inika pêl inrup rinêng nen choih roh; atûna rithokin chu PUMAPA ziangah ringot ti no chu hâlrivâm thillan neh ribôlna rêng rêng hi pathian danghei ziangah lan tlak khâi no ning e.

¹⁸Khannisela, Suria pathian Rimona chubai iûn ranga ki pu a fe zoron â nung ki zui a nang ngai a; khangkana Rimona Tempilah ki fe a, Rimona chubai iûn a ker khûk ki dil khomin PUMAPA khan ne ngaidam a ti kî tûng a nit. A nit, PUMAPA khan ne ngaidam ngêt a ti na,” a ti a.

¹⁹Elisa khan, “Thlangam takkan fe roh,” a ti a. Khanchu, Naamana kha a fe tâk a. Ilah zankah a fe phâk tâk a.

²⁰Elisa som Gehazia khan a lungrilin, “Ki pu hin Suria mi Naamana hi a thil hong chôihei lah pêk viat loiin ân fe nôk a. PUMAPA ringna chingin kî ti a nit, var zûl ki ta, imanih te lua chu la va lah pêk rong,” a ti a.

²¹Khanchu, Gehazia khan Naamana kha arzûl tâk a. Naamana khan tu manin a hong rizûl iti a mun chu, lei isôn itumin tâli ata khah a ṭum a, “Îthu tâk im ai nit?” a ti a.

²²Gehazia khan, “Îte ual bâk chu ni mak e. Khannisela, ki pu khan, ‘Efraim tlângrama rithokin zânthla lômhei lâia tlangvâl inikan an ne hong ithlo thut a, anni kha tangka sângithumka neh silbom rithlengna inikah peh roh,’ a ti, itia nang hong iril rangin a ne hong itir a nit,” a ti a.

²³Naamana khan, “Sângirukkah lah roh,” a ti a. Khanchu, ilah rangin â thlêm ngit a, tangka sângirukkah khah cholipuiin â fûn pêk a, silbom rithlengna inikah neh khan â somhei inikah ân pêl pêk a, Gehazia matonah khan an fe tâk a.

²⁴Elisa omna tlâng an va tlungin chu Gehazia khan tangka cholipui inikahei khah a lâk a, insungah a va sia a. Khanungchu, Naamana somhei khah ân fe nôk tâk a.

²⁵Insungah a va lût nôkin chu Elisa khan a ziangah, “Taktiang im nî fe kha, Gehazi?” a ti a. Ani khan, “Epu, tak te fe mang e,” a ti a.

²⁶Khannisela, Elisa khan a ziangah, “Nang isôn ranga a tâli ata a zuang ṭumah khan rithlan kha munah khan kî om sa ni mak im a kha? Tangka hei, silbom hei, oliv bil hei, grep rikul hei, bera hei, ran hei neh bôi hei hi a lâk zoro ni mak e.

²⁷Atûnah hin Naamana phâr rî khan nang kâi a ta, kumkhuakan nangmah neh ner chihei khan kha rî khah rivoi mai tâng nin ti,” a ti a. Khanchu, Gehazia kha Elisa ziang ata kha a vun ivur angkana ṭeka phârin a suak tâk a.