Read Biete 2 RÊNGHEI 6 Bible Online

2 RÊNGHEI 6 - Biete bible

2 RÊNGHEI 6

¹Sûnkah chu zânthla lôm Elisa zianga om ngaihei kha an hong a, Elisa ziangah, “En ta, ei omna ngai hi ai chîn rai tâk kêng.

²Jordan dungah zu fêng kin ta, thing la zu tuk rong ung; khanchu, ei omna rang in ilian ual kan ei sina rang,” an ti a. Elisa khan a sâm a, “A ṭhat, fe rei,” a ti a.

³An lâia khatkah khan, “Ne zu fepui sa roh,” a ti a. Elisa khom khan ân bei a.

⁴Khanchu, an rêngkan an fe tâk a. Jordan an tlungin chu thing ituk kha an phut zel a.

⁵Khatkah hin thing a hang iphûr lâiah khan a reipui kha tuiah â ṭhul pat tâk a. Ani khan, “Epu, ingkam ki tho rang tâk? Mi ta kî mang pêk kêng?” a ti a.

⁶Elisa khan, “Tak mun takah hin im ai ṭul?” a ti a. Ani khan, a ṭulna mun khah ân mu a; khanchu, Elisa khan thingtuai a hang sât a, tuiah khan a zuk ikhô lût a, rei kha a hong rilâm tâk a.

⁷Ani khan, “Rût ta roh,” a ti a; khanchu, a zuk iban a, a rût tâk a.

⁸Suria rêng kha Israelhei neh an ridoi a. Ani khan a milianhei khah â sôn a, ṭangmun khuarna rang mun arthlang a.

⁹Khannisela, Elisa khan Israel rêng ziangah, “Kha munheiah khan fe no roh, amakhan Suriahein ruang nang an lei ichuan a nit,” itin â ril mai ngai a.

¹⁰Khanchu, Israel rêng khan zânthlan â rilna muna omhei kha a lei iril a, an lei rivêng a, an izôk mai ngai a nit. Khangkah khan voi itam takkah an tho tâk a.

¹¹Khanchu, kha thu-ah khan Suria rêng lungril kha a zîng ok tâk a; a sipai ulianhei kha a koi a, an ziangah, “Ei lâia mi, a tu tak hîm Israel rêng tianga ṭang nin init,” a ti a.

¹²A milianhei lâia mi khatkah khan, “O rêng inthang, tute ṭang mang ung e. Israel rama om zânthla Elisa hin ni chontan sungrila ni îsîrhei khom hi Israel rêng a îril riai ngai kêng ai nit,” a ti a.

¹³Rêng khan, “Taktiang im ai om, va zong ta u, mi tir ki ta, va man riseh,” a ti a. Elisa kha Dothan khuaah a om iti an irilin chu,

¹⁴sakorhei, tâlihei neh sipai itam takkah kha munah khan a tir a. Kha khua kha zânah an va tlung a, an hual tâk a.

¹⁵Elisa som kha atûk zîng taka a thoi a, tual a va suakin chu Suria sipaihei khan sakorhei neh tâli neh khua kha an lei hual khap a mu a. Isom kha Elisa ziangah a kîr nôk a, a ziangah, “Epu armang ei nit tâk. Ingkan im ei tho rang tâk?” a ti a.

¹⁶Elisa khan, “Ṭi no roh dua; an tianga ṭang nêkan chu ei tianga ṭang an itam ual a nit,” a ti a.

¹⁷Khanungchu, Elisa khah a ṭongṭai a, “O PUMAPA, a mu theina rangin a mit hi inmeng roh,” a ti a. PUMAPA khan a ṭongṭaina khah a sâm a; khanchu, Elisa som khan a hang en a, Elisa omna vêla tlâng kha mei tâli neh sakor lei idâp khap kha a mu tâk a.

¹⁸Suriahein an hong doi tenan chu Elisa kha PUMAPA ziangah a ṭongṭai a, “O PUMAPA, hi mihei hi an mit inzîng pêk roh,” a ti a. PUMAPA khan a ṭongṭaina khah a sâm a, an mit a zuang inzîng pêk tâk a.

¹⁹Khanungchu, Elisa kha an ziangah a fe a, “Amahih lampui ni mak e, nin mi zong omna khua khom ni mak e. Ne zui rei, nin mi zong ziangah khan nangni ṭhui ki ti,” a ti a. Khanchu, Samaria khuaah a ṭhui tâk a.

²⁰Samaria kho sung an lût kaneh chu Elisa khan PUMAPA ziangah a ṭongṭai a, “O PUMAPA, hihei hin an mu theina rangin an mit inmeng roh,” a ti a. PUMAPA khan a ṭongṭaina khah a sâm a, an mu thei nôk tâk a, Samaria kho sungah khan an iom tâk a nit iti an mu a.

²¹Israel rêng khan Suriahei kha a mun chu Elisa ziangah, “Epu, kî that rang im? Kî that rang im?” a ti a.

²²Elisa khan a sâm a, “That no tin e. Ni khandai neh ni thalngula sipai nî manhei ilua that ni tîm a? Ibai neh tui pen la, fah sela, in sela, an rêng ziangah kîr nôk riseh,” a ti a.

²³Khanchu, Israel rêng khan an ta rangin khalai roinpui ân rifûk pêk a, anni khan an fâk a, an in zoiin chu Suria rêng ziangah an fe nôk tâk a. Khanung ata chu Suriahei khan Israel ram irok kha an irngam tâk a nit.

²⁴Zoro sôt ianka nungah khan Suria rêng Benhadada khan a sipai murdi a bûm a, Samaria khua kha a hang hual a.

²⁵Isôt takkah an hual khap sikin Samaria khuaah khan iṭâm a natinsat tak tak a, sakuartung lu hi tangka sômiriatkan an zuar a, vaṭhu êk[4] hi kilâtkan tangka ringakan an izuar a nit.

²⁶Israel rêng kha kulpui rifanga a lôn lâiin nupang khatkah hin, “O rêng inthang, ne san roh,” itin a lei isam a.

²⁷Ani khan, “PUMAPA khan nang a ṭangpui noa a nitin teh keiman taktiang ata ngân im nang ki ṭangpui rang tâk na? Bu manih, uain manih lak nei khâi mang a.

²⁸Im nen takna ai nit?” a ti a. Nupangnu khan a sâm a, “Hi nupang hin ki ziangah, ‘Vuanah hin ni naipa hi fâng ei ta, naktûkah ki naipa hi la fah rei,’ a ti a.

²⁹Khanchu, ki naipa kha kin suang a, kin fâk tâk a. Atûkah khan keiman a ziangah, ‘Ni naipa kha lei fah ta rei,’ ki ti a. Khannisela, a naipa kha ai thup khap tâk a nit,” a ti a.

³⁰Rêngin kha nupang thusîr khah a riatin chu a puanhei â potthlêr tâk a, kulpui inâia om mipuihei khan a puan nuaiah khan borapuan a lei isil mai a nit iti an hang mu a.

³¹Khanchu, ani khan, “Vuanah hin Elisa lu tan a nit noa a nitin chu Pathianin ai lo lo ne lo sela, kha nêka natinsat khomin ne tho riseh,” a ti a.

³²Elisa va ṭhui rangin mi a tir tâk a. Kha lâi takah khan Elisa kha a ina lei hong ilêng upahei neh a inah a lei iṭhung a. Rêng mi tir kha a hong tlung man Elisa khan upahei ziangah khan, “Kha mithat isongpa khan ki lu lah rang mi a hong tir iti nin riat im? Atûnah hin a mi tir kha a hong tlung kaneh in lei khâr pêk unla, insung inlût no rei. Rêng khan â nung a hong izui thal rang a nit,” a ti a.

³³Khangkana anmani a la sôn mai lâiah khan rêng kha a hong tlung zel tâk a. Rêng khan, “Hingka dôrka lungzîng ne sak chu PUMAPA a nit hih. Îtho rang im PUMAPA thu kha ki lai ngâk mai rêk rang a?” a ti a.