Read Biete 2 RÊNGHEI 7 Bible Online

2 RÊNGHEI 7 - Biete bible

2 RÊNGHEI 7

¹Elisa khan, “PUMAPA thu hih ringai rei; naktûk hingka zoro tenah hin chu Samaria kulpui kôlah khan ibaidi ṭha chi her ithumkah kha tangka khatkan neh barli her irukkah kha tangka khatkan richoh thei tâng nin ti,” a ti a.

²Sipai ruaitu, rêng hong iṭhuitu khan Elisa khah a sâm a, “Pathian ngêiin rua a zuk însûr zel rang khom ni sela khangkan chu ni thei tlak no nih,” a ti a. Elisa khan, “Ringai roh, kha thil itlung kha ni mit ngêiin mûng ni ta; khannisela, ifah chu fah tlak no tin e,” a ti a.

³Samaria khua kulpui lûtna kotbâi kôlah iphâr ilikah an om a, anni khan, “Îtho rang im ithi ngâk ringota ei îṭhung ṭian hi?

⁴Kho sungah lei lût rei u, ti rang ei la, kho sung an ṭâm a, voniṭâmin ei va ithi ngêt rang a nit a. Hin iṭhung ṭian lak ei la, ei ithi ngir rang a nit a. Khasikin, tho ta u; Suria sipaihei riabuk tiang fêng ei ti u, an ne zua le chu ring ei ta, an ne that le chu ei ithi nîng a ti,” itin an risôn a.

⁵Khanchu, Suriahei riabuka fe rangah khan zân zîngbupin an rithok tâk a; khannisela, Suriahei riabuk tongtîr an va tlungin chu tute lei omak a.

⁶PUMAPA khan Suria sipaihei kha tâli rîhei, sakor irîhei, sipai itam tak irîhei ân riat a; khanchu, “Ringai ta u, Israel rêng hin Hit rêng hei, Aigupta rêng hei hi ne hong idoi rangin a îruai a nit hih,” an ti a.

⁷Khanchu, an thoi a, zân zîngbupah khan lâizâm an tho tâk a, an puan in hei, an sakor hei, an sakuartung hei neh an riabuk kha a om ngai ngaiin an mâk rak a, lâizâm an itho riai a nit.

⁸Kha iphâr pasal ilikahei khan riabuk tongtîr an va tlungin chu puan in khatka tah hin an va lût a, an fâkin an in a, khantaka tangkarua neh rângkachak hei, silbomhei kha an lâk a, an va thup a, an va kîr nôk a, puan in dangah an va lût nôk a, khantaka thil khom kha an lâk a, an va thup a.

⁹Nakanah chu, “Ei ithon dik tlak ino a nit; vuani hi thurchi lômom ithlun nî a nit, ei dâirek a, khovâr ei ngâkin chu kuttum ei ituang rang a nit; khasikin, tho rei, rêng insungkuahei la va ril rei u,” an ti a.

¹⁰Khanchu, Suriahei riabuk kha an mâk a, Samaria an fe a, kho kul kotbâi vêngtuhei kha an va sam a, “Suriahei riabukah kin va fe a, tute lei omak a, miriam rihu rêng rêng khom omak a, sakorhei neh sakuartunghei bang a lei rithlung a, puan inhei khom kha a om ngai ngaiin a lei om ṭian,” itin an iril a.

¹¹Kotbâi vêngtuhei khan kha thu khah an inpuang a, rêng insungmihei an va ril a.

¹²Rêng kha zânah khan a thoi a, a milianhei ziangah khan, “Suriahei thil tum hi nangni lei iril hi rong. Ei ṭâmzia hi an riat a; khasikin, khopui ata hi ifah rang izonga an hong suakin chu an iringin lei man ei ta, khosungah ei lût a rang, itin ramah ribih rangin an riabuk an imâk a nit hih,” a ti a.

¹³A milian khatkah khan a sâm a, “Khopuia sakor om isun ringakah hi tuhei manin ṭhui sela, thil omdân va en rêng rêng riseh. Hingkan khom khopuia mihei hi armang vang rang ei nit a, mi thi pial tâk angkah ei nit a,” a ti a.

¹⁴Mi ṭhenkah an rithlang a, rêng khan sakor tâli inikah a pêk a, “Suriahei riabuk kha va en ta u, ingkam ai nit rêng rêng,” itin ân fe tâk a.

¹⁵Jordan dung idênin an va fe a, Suria sipaihei an rimot sika an ipai silbomhei neh riamreihei kha lam thluanin an mu a. Khanungchu, an mi tirhei kha an hong kîr nôk a, rêng kha an hong iril a.

¹⁶Samaria mipuihei kha an va suak a, Suriahei riabuk kha an va rok vang tâk a. Khanchu, PUMAPA thu angkah ngêiin ibaidi ṭha chi her ithumkah kha tangka khatkan neh barli her irukkah kha tangka khatkan an zuar tâk a.

¹⁷Rêng hong iṭhuitu sipai ruaitu kha rêngin kotbâi vêngtun a phun a. Mipuihei khan kotbâi kôlah khan ani khah an sirpol a, Pathian mi khan a ziangah rêng a zuang lâia a lei iti pêk angkah khan a thi tâk a.

¹⁸Elisa khan rêng ziangah, “Naktûk hingka tik vêlah hin Samaria kul kotbâi kôlah barli her irukkah kha tangka khatkan, ibaidi ṭha chi her ithumkah kha tangka khatkan zuar an ti,” a lei ti pêk a.

¹⁹Sipai ruaitu khan Pathian mi kha a sâm a, “PUMAPA ngêiin rua zuk insûr zel rang khom sela, khangkan chu ni thei tlak no nih,” a ti a. Khanchu, Elisa khan, “Ringai roh, kha thil itlung khah ni mit ngêiin mûng ni ta, khannisela ifah chu fah tlak no tin e,” a lei itipêk a nit khah.

²⁰Khangkah chiaah khan a chungah a zuang itlung tâk a nit, mipuiin kul kotbâi kôlah khan an chîlpol a, ai thi tâk a nit.