Read Biete 2 RÊNGHEI 8 Bible Online

2 RÊNGHEI 8 - Biete bible

2 RÊNGHEI 8

¹PUMAPA khan kum sarika sung Israel ramah khan iṭâm a îthul rang a nit iti Elisa khan Sonam khuaa om a naipa a îndam pêk nupangnu khah â ril a, an insungkuaka mun danga rithon rangin â ril a.

²Pathian mi thu khah a zôm a, an insungkua kan Filistia ramah an fe a, kum sarikah an va om tâk a.

³Kum sarikah a hong vun tenan chu kha nupang khah Filistiahei ram ata a hong kîr nôk a; a in neh loi ipeh kîr nôk ranga ngên rangin rêng ziangah a va fe a.

⁴Rêng khan Elisa som Gehazia kha, “Elisa sinrikhêl tho murdi ne ril ta,” itin a lei ridon lâi tak a nit a.

⁵Gehazia khan Elisan mi khatkah â thi tâk ân ring nôk thu rêng a lei iril lâi takah khan a naipa a înring pêk nôk nupang khah rêng makung a hong tlung a. Gehazia khan, “O rêng inthang, Epu, ki lei îsîr nupangnu khah amah hi a nit; Elisan a înring pêk nôk a naipa khom kha amah hi a nit,” a ti a.

⁶Rêngin nupangnu kha a hang ridonin chu â ril tâk a. Khanungchu, rêng khan ruaitu khatkah a koi a, “A ta murdi peh kîr inla, a om no sunga a rama rithoka thil ivâng murdi man isûtin pêk rang zâk chu peh roh,” a ti a.

⁷Suria rêng Benhadada dam no lâiah khan Elisa kha Damaska khuaah a fe thap a. Rêng kha Elisa hin a om iti an irilin chu,

⁸rêng khan Hazaela ziangah, “Loman thilpêk chôi inla, zânthla sôn rangin va fen la, ki natna hi ki lai dam suak nôk thei rang manih PUMAPA ne lei isôn pêk riseh,” a ti a.

⁹Khanchu, Hazaela khan loman rang Damaska khuaa thil iṭha tinrêng, saringsei sômilikah ân pêl a, Elisa ziangah a fe tâk a. Hazaela khan a va mu tenan chu a ziangah, “Ne som rêng Benhadada khan, ‘Ki natna hi la dam suak nôk ki tîm?’ iti rangin ni ziangah hin a ne hong itir a nit,” a ti a.

¹⁰Elisa khan a ziangah, “Fe nôk tan la, a ziangah, ‘Dam suak nôk ngêt ni ti, a ti,’ ti roh. Khannisela, ai thi ngêt rang a nit iti chu PUMAPA khan a ne înriat a nit,” a ti a.

¹¹Khanungchu, Hazaela kha mâi imôk rakkan Elisa khan a mît ngit a. Voikazelin Elisa mitrithli a zuang suak ngûi ngûi a.

¹²Hazaela khan, “Epu, ithôm nî ṭap tâk,” a ti a. Ani khan a sâm a, “Israela richihei chunga ni thil ṭhano tho rang kî mu a nit; an kulpuihei hâl pêk ni ta, an tlangvâlhei khandaiin la that ni ta, an naitehei rinêng ichârah la toh that ni ta, an nupang nai vonglâihei kha an phûng la âtthlêr pêk ni ti,” a ti a.

¹³Hazaela khan, “Keimah îte khom nino hin, khangkah dôr dôran ingkam sinthotheina ki nei rang a?” a ti a. Elisa khan a sâm a, “Suriahei chungah ni la înlal rang a nit iti PUMAPA khan a ne înriat a nit,” a ti a.

¹⁴Khanchu, Hazaela kha Elisa ziang ata a suak a, a pu Benhadada ziang tiangah khan a fe tâk a, ani khan, “Elisa khan im nang a lei iril?” a ti a. Hazaela khan, “Dam suak nôk ngêt a ti, itin a ne ril,” a ti a.

¹⁵Khannisela, atûkah khan Hazaela khan samul puan isa tak a lâk a, tuiah a nôk a; amakhan rêng mâi a hup pêk a, a thi tâk a. Hazaela kha Benhadada rithûlin Suria ramah khan a hong inlal tâk a.

¹⁶Israel Rêng Ahaba naipa Jorama inlal kum ringana kumah khan Juda Rêng Jehosafata naipa Jehorama kha a hong inlal a.

¹⁷Ân lal phut lâiah khan kum sômithumkah kum inika mi a nit a, Jerusalem khuaah khan kum iriatkah roi a rêl a.

¹⁸A nupui kha Ahaba nainu a nit a, Ahaba insungkua angkan, Israel rênghei lampui ṭhano zui khah a zui sa tâk a. PUMAPA mitmua thil ṭhano tak a tho ngai a.

¹⁹Khannisela, PUMAPA khan â som Davida zianga archihei idênin roi hong rêl mai an ti itia a ṭonginkung sikah khan Judai ram khah iseh nuam mak a.

²⁰Jehorama inlal lâiah khan Edomhei kha Judahei chungah an rihel a, an khâtin rêng an nei tâk a.

²¹Khanchu, Jehoramah kha Zair khuaah khan a tâli murdihei neh a va fe a, amakhan Edom sipaihei khan an hong hual a. Zânah khan amah neh a tâli chunga ruaituhei khan an inêr thleng a, an zôk tâk a, an sipaihei chu an inheiah lâizâm an tho riai tâk a.

²²Khangkan Edomhei kha atûn tenan Judahei chungah an irhel mai tâk a nit; kha lâi ngirah khan Libna khua khom an hong rihel tâk a.

²³Jehorama thurchi danghei neh a thiltho murdihei kha Juda Rênghei Thurchi Riziakna Bu-ah ai chuang riai a nit.

²⁴Jehorama kha a thi a, Davida khopuia rênghei thlânah khan an phûm tâk a, a naipa Ahazia kha arthûlin a hong inlal tâk a.

²⁵Israel Rêng Ahaba naipa Jorama inlal kum sômleiinikna kumah khan Juda Rêng Jehorama naipa Ahazia kha a hong inlal a.

²⁶Ahazia khan roi a rêl phut lâiah khan kum sôminikah kum inikah mi a nit a. Jerusalem khuaah khan kumkah roi ai rêl a. A nu riming kha Athali, Israel Rêng Omria tûnu a nit.

²⁷Ahaba insungkua mâkpa a nit sikin Ahaba insungkuahei lampui zui kha a zui sa a, Ahaba insungkuahei angkan PUMAPA mitmuah thil ṭhano tak a tho ngai a.

²⁸Rêng Ahazia neh Israel Rêng Jorama khan Suria Rêng Hazaela doi rangin an inrual a. Gilead biala Ramot khuaah khan an ridoi a, Suriahei khan Jorama kha an lei iphop a.

²⁹Rêng Jorama kha a sâbe indam rangin Jezreel khuaah a hong kîr nôk a, kha munah khan Ahazia khan Jorama kha a zu thlo a.