Read Biete 2 RÊNGHEI 9 Bible Online

2 RÊNGHEI 9 - Biete bible

2 RÊNGHEI 9

¹Kha lâi ngirah khan zânthla Elisan zânthla tlangvâl lômhei lâia khatkah hi a koi a, a ziangah, “Risiam inla, hi riak ûm hi chôi inla, Ramot-Gilead khuaah va fe roh.

²Ni va tlungin chu Nimsia nai Jehosafata naipa Jehua va zong suak roh. A rualhei lâi ata chontan sungrilah a khâtin ṭhui inla,

³hi oliv riak hi a luah inrithun la, a ziangah, ‘PUMAPA khan hingka hin a ti, Israelhei chunga rêng rangin riak nang ki înrithu a nit, a ti,’ ti roh; khanchu, inkhâr iong inla, irang takkan itlân suak roh,” a ti a.

⁴Khanchu, zânthla tlangvâl kha Ramot khuaah a fe tâk a;

⁵a va tlungin chu sipai ruaituhei an lei iṭhung khôm a. Ani khan, “Epu, ni ziangah thucha isîr rang kî nei a nit,” a ti a. Jehua khan, “A tu tak hîm ni îsôn nuam?” a ti a. Ani khan, “Epu, nangmah nang ki îsôn nuam a nit,” a ti a.

⁶Khanungchu, an ruaikan insungah an lût a, zânthla tlangvâl khan Jehua lu-ah khan oliv riak kha a bun a, a ziangah, “PUMAPA Israelhei Pathianin hingka hin a ti; ‘PUMAPA mi, Israelhei chunga rêng rangin riak nang ki înrithu a nit.

⁷Ki zânthlahei neh ke som danghei thisen phuba kha Jezebeli chungah ki lâk theina rangin ni pu Ahaba insungkuahei hi ni that rang a nit.

⁸Ahaba insungkuahei neh archihei murdi an thi riai rang a nit; Ahaba insungkuaa ipa naipang neh ulian an rêngkan ki înrimang riai rang a nit.

⁹Ahaba insungkuahei kha Nebata naipa Jeroboama insungkuahei neh Ahija naipa Baasa insungkuahei angkan kî siam rang a nit.

¹⁰Jezebeli kha iphûm ni no nia, a ruak kha uihein Jezreel khuaa kulpui kôlah fâng an ti,’ a ti,” a ti a. Kha thu khah a ti zoiin chu zânthla tlangvâl kha chontan ata a suak a, lâizâm a tho tâk a.

¹¹Khanchu, Jehua kha a mal sipai ruaituhei ziangah a fe nôk a; khatkah khan a ziangah, “Iṭha tiang thu chu a nit im? Kha mi invêtpa khah ingka sika ni zianga hong im ai nit?” a ti a. Jehua khan a sâm a, “Nin iriat mi a nit a, a thusîr khom kha nin riat kha te,” a ti a.

¹²Anni khan, “Reh viat mang ung e, im ai ti ne ril ta,” an ti a. Ani khan, “Hingka takah hin a ne iti a nit; ‘PUMAPA khan hingka hin a ti; Israelhei chunga rêng rangin riak nang ki înrithu a nit,’ a ti,” a ti a.

¹³Voikazelin Jehua mal sipai ruaituhei khan an puanhei an lîp a, kalbi chungah Jehua dingna rangin an dâp pêk a, bekul an tum a, “Jehua rêng a nit tâk,” an ti a.

¹⁴Khanungchu, Jehua khan Rêng Jorama kha a phiarrûk tâk a. Rêng Jorama kha Suria rêng Hazaela neh an ridoinaah sâbe a tong a, Jezreel khuaah indam rangin a fe a, amakhan ai om a nit. Khanchu, Jehua khan a mal sipai ruaituhei ziangah khan, “Ki tianga ṭang nin nitin chu tute rêng rêng Jezreel khuaah hi thu hih isîr rangin Ramot khua ata hi isua viat no rei,” a ti a.

¹⁶Khanungchu, Jehua kha tâliah a chuang a, Jezreel khuaah a fe a, Jorama kha a sâbe la dam ngir mak a, amakhan a om a, Juda rêng Ahazia khom Jorama thlo rangin a lei izuang a nit.

¹⁷Jezreel kulpuia râlvêngtu khan Jehua neh a lômahei ihong kha a hei mua, “Sakor chunga chuang mi itam takka hong ki mu,” a ti a. Jorama khan, “Irâl an nit neh nit no reh rangin sakor chungchuang mi khatkah tir ta u,” a ti a.

¹⁸An mi tir kha Jehua ziang a va tlung a, a ziangah, “Rêngin mal ṭha angkana hong ni nit neh ni nit no â ria ai nuam a nit,” a ti a. Jehua khan, “Nangma lei buaipui rang îte nang mak, ke nungah va lôn roh,” a ti a. Râlvêngtu khan, “Ei mi tir khan an ziang chu a va tlung ngêt a; khannisela, hong kîr nôk khâi mak e,” itin â ril a.

¹⁹Khanchu, mi khatkah an tir nôk a, kha mi khom khan an ziang a va tlung a, “Mal angkana hong im nin init iti rêngin â ria ai nuam a nit,” a ti a. Khante, Jehua khan, “Nangma lei buaipui îte nang mak, ke nungah va lôn roh,” a ti a.

²⁰Â tharin râlvêngtu khan, “Ani khomin an ziang chu a va tlung ngêt a; khannisela, hong kîr nôk khâi mak e. An ruaitu khan a tâli kha invêt intlânin kêng ân tlânin ki mu; Nimsia naipa Jehua intlân dân chia a nit,” a ti a.

²¹Jorama khan, “Ki tâli inrifûk ta u,” a ti a. A tâli kha an inrifûk pêk a, amah neh Juda rêng Ahazia kha anmani tâli seng sengah an chuang a, Jehua ritongpui rangin an fe a. Nabotha rikulah ani khah an va tong a.

²²Jorama khan Jehua a hang mun chu, “Iṭha tiang thua hong chu ni nit im?” a ti a. Jehua khan a lei sâm a, “Ni nu Jezebeli lei isong mirmil biakna neh dôi hi ei la dôn kârkah chu ingkan im iṭha thu a om thei rang a?” a ti a.

²³Jorama khan a tâli a kâi inrihêl a, “Rilêmna ai om a nit, Ahazia,” a ti a, lâizâm a tho tâk a.

²⁴Jehua khan a phel kha a thei dôrkan a sân a, a dâr neh a dâr kârah a kâp a, thal kha â lungah a len thal a, a tâliah arbil rup tâk a.

²⁵Khanchu, Jehua khan a sipai ruaitu Bidkara ziangah, “A ruak hi chôi inla, Jezreel mi Nabotha rikulah va paih roh. Matona ei ruaika rêng Joramapa Ahaba nung izuia munka sakora ei chuang lâia Ahaba chungchâng thu PUMAPA îsîr kha remai roh.

²⁶‘Mizânah khan Nabotha thisen neh a naipahei thisen kha kî mu ṭian a nit. Hi mun ngirah hin nang kî thung rang a nit,’ ai ti kha remai roh. Khasikin, Jorama ruak hi chôi inla, PUMAPA thu angkan Nabotha rikul mun ngêiah hin paih roh,” a ti a.

²⁷Juda Rêng Ahazia khan amakha a mun chu Beth-Hagan khua tiang a tâliah khan lâizâm a tho tâk a. Jehua khan arzûl thal a, “Ani khom kha that sa rei,” itin a mihei thu a pêk a. Khanchu, Ibleam kho kôl, Gur fena lampuia a tâli chunga â tlân lâiah khan an iphop tâk a. Khannisela, Megido khuaah â tlan lût a, amakhan a thi tâk a.

²⁸A mihei khan tâlin a ruak kha Jerusalemah an fepui a, Davida khopuia rênghei thlânah khan an phûm tâk a.

²⁹Israel rêng Ahaba naipa Jorama inlal kum sômleikhatna kumin Ahazia kha Judahei chungah a hong înlal a nit.

³⁰Jehua kha Jezreel khua a va tlungin chu, Jezebeli khan thil om dân a lei riat riai tâk a; khanchu, a mit kôlhei a lei inôt indum a, a samhei a lei khui dak a, rêng in tukvera rithokin lampui tiang a zuk thlîr a.

³¹Jehua kul kotbâi a hong lût lâi takin; “Nangmah mahni puhei ithattu, Zimri,[5] îtho rang im hin nî hong?” a ti a.

³²Jehua khan tukver tiang a hang ngat a, “Tûm ki tianga ṭang chei u? Tuhei im?” a hang ti a. Rêng ina milianhei pasal inik pasal ithumka manih tukvera rithokin a tiang an hong thlîr a.

³³Jehua khan an ziangah, “Khâmnu kha zuk nam iṭhul rei,” a ti a. Khanchu, Jezebeli kha an zuk nam iṭhul a; a thisen khan bang neh sakorhei kha a khian suai a. Jehua khan a sakorhei neh a tâlihei a lei inchîl pol a.

³⁴Khanchu, rêng in a lût a, bu a nêk a. Khanungchu, “Vânisal nainu kha va lah unla, va phûm rei, îkhom ni seh, rêng nainu kêng a nit a,” a ti a.

³⁵Khannisela, a va phûm ranga fehei khan a luru hei, a kutru hei, a keru hei ringot ti no chu va mu khâi mak a.

³⁶Khanchu, an hong kîr nôk a, an hong iril nôkin chu, Jehua khan, “Amahih PUMAPA khan â som Tibse mi Elija manga, ‘Jezreel kul kôlah uihein Jezebeli ruak kha la fâng an ta;

³⁷an fâk bân kha tu ruak im ai nit iti riat thei loi rang rakkan ipil kârah rithek indar a ti,’ ai ti kha a hong itlung tâk a nit hih,” a ti a.