Read Biete 1 RICHISUINA 11 Bible Online

1 RICHISUINA 11 - Biete bible

1 RICHISUINA 11

¹Israel mihei murdi kha Hebron khuaa Davida ziangah an fe a, “Ni thisen rizompui kin nit a.

²Matona Saula ân lal lâi khomah khan Israelhei kha râltuk bualah an ma ne ruai ngai a, PUMAPA ni Pathian khomin ni ziangah, ‘Ki mi Israelhei kha an ma ruai pêkin, an chungah ruaitu ni chang pêk rang a nit,’ nang ai ti nit,” an ti a.

³Khanchu, Israelhei ruaitu murdi kha Hebronah rêng Davida ziangah khan an hong a. Davida khan Hebron khuaah khan PUMAPA maah an ziangah thu a thlung a, PUMAPA khan Samuela manga a îsîr angkah khan Davida chu Israelhei rêng rangin riak an inrithu tâk a.

⁴Rêng Davida neh Israelhei murdi kha an fe a, Jerusalem kha an va doi a. Amakhah matonah chu Jebus a nit a, kha munah khan kha ram mi, Jebushei kha an iom mai a nit.

⁵Khante, Jebus mihei khan Davida ziangah, “Khopui sung kha hong lût thei tlak no tin e,” an ti a. Nikhomsela, Davida khan Zion kulpui kha a lâk tâk a, amakhah Davida khopui iti a hong nit tâk.

⁶Davida khan, “Tu khom Jebus mi that masa tak chu sipai ruaitu tak chang a ti,” a ti a. Khanchu, Zeruii naipa Joaba khan khua doi rangah khan ma â ruai a, sipai ruaitu takin a om tâk a.

⁷Davida kha kulpui sungah a hang om tâk sikin Davida khopui an iti tâk a nit.

⁸Khopui kulpui kha Milo an iti itlâng sak tiang phâihor an nêlna rithokin a siaminṭhat a; Joaban khopui sung a dang murdi kha a siaminṭhat a.

⁹Khanchu, Davida kha Tinrêngthothei PUMAPA ziangah a om sikin a hong roinpui tîr tîr tâk a.

¹⁰Hihei hi Davida sipai riming inthanghei chu an nit. Israel mihei murdi neh rithlopin PUMAPA ṭonginkung lam angkah takin Davida khah rêng inthangin an siam a, a ram khom roinpuin an isiam a nit.

¹¹Pasalṭha ithumkah an iti lâia â khatna ân lâr tak chu Hakmon panama mi Jasobeama kha a nit. Ani khan â feiin mi rizathumkah a doi a, ṭumkatah an rêngkan ai that riai a nit.

¹²Pasalṭha ithumkahei lâia ân thang nôk chu Ahoa panama mi Dodoa naipa Eleazara kha a nit.

¹³Ani khan Davida tianga ṭangin Filistia mihei kha Pas-Damimah khan a doi a. Israelhei kha Filistiahei maah lâizâm an tho lâiah khan ani chu barli loimunah khan a om a.

¹⁴Khanchu, amah neh a lômahei kha loimun inlâinaah khan an iding khap a, Filistia mihei kha an doi a. PUMAPA khan nêna roinpui tak ai pêk a nit.

¹⁵Sûnkah chu sipai ihâi sômithumkahei lâia â hâibîk Pasal ithumkah kha Adulam ipûk kôla Davida lei omna lungpuiah khan an fe a, Filistia sipaihei khan Refaim phâiah ṭangmun an khuar a.

¹⁶Kha mun ningbei omna muna Davida a om lâiah khan, Filistia sipai lômkahei khan Bethlehem kha an lua khap a.

¹⁷Davida khan a insung arngai tak tak a, “Bethlehema kul kotbâi kôla tuikuang tui kha iin ranga ne va chôi pêk om sela chu o,” a ti a.

¹⁸Pasalṭha ithumkahei khan Filistia sipaihei kha an inêr thleng a, tuikuang tui kha an thâl a, Davida ziangah an hong chôi a. Khannisela, Davida khan lei in nuam mak a, PUMAPA ziangah thillanin a bun suak a,

¹⁹“Amahih in thei tlak no ning e. Hi ithi huama ripehei thisen iin angkah ai nit rang a nit. An ringna phala an hong ichôi kêng a nit a,” a ti a. Khanchu, in nuam khâi mak a. Khahei khah Pasalṭha Ithumkah an itihei thiltho chu a nit.

²⁰Joaba inzirpuipa Abisaia kha “Pasalṭha sômithumkah” an itihei lâia ruaitu tak a nit. Ani khan â feiin mi rizathumkah a doi a, an rêngkan a that a, Pasalṭha sômithumkahei lâia riming inthang tak a hong init tâk a nit.

²¹“Pasalṭha sômithumkahei,” lâia riming inthang tak a nit a, an ruaitu tak a nit; nikhomsela, “Pasalṭha Ithumkahei” dôrkah chu arming inthang mak e.

²²Kabzeel mi Jehoiada naipa Benaia khom kha sipai riming inthang a nit, ani khan Moab mi râlpa inikahei kha a that a. Voika chu ivur tlâk zoro lâiin ipûka sakeibaknei ikual ai that a nit.

²³Aigupta mi, milianpa, mûk ringaka risâng a that sa a. Kha milianpa khan ifei ngul pheirâi tiaka lian a chôi a, Benaia khan tôkmol neh a zu doi a, Aigupta mi fei khah a sut pai a, kha feiah khan ani kha ai that a nit.

²⁴“Pasalṭha sômithumkahei” lâia khatkah Benaia khan khahei kha ai tho a nit.

²⁵“Pasalṭha sômithumkahei” lâiah khan chu arming ân lâr a; khannisela, “Pasalṭha Ithumkahei” dôrkah chu arming inthang mak e. Davida khan ama vêngtu pôl ruaitun a sia a.

²⁶Pasalṭha danghei chu hihei hi an nit: Joaba unaipa Asahela, Bethlehem mi Dodoa naipa Elhanana, Haroth mi Samota, Pelet mi Heleza, Tekoa mi Ikesa naipa Irâ, Anathot mi Abiezera, Husa mi Sibekaia, Aho mi Ilaia, Netofa mi Maharaia, Netofa mi Baana naipa Heleda, Benjamina richi Gibea khuaa mi Ribaia naipa Ithaia, Pirathon mi Benaia, Gaas vadung kôl phâia mi Huraia, Arba mi Abiela, Bahurum mi Azmaveta, Saalbon mi Eliaba, Gizon mi Hasema, Harar mi Sagea naipa Jonathana, Harar mi Sakara naipa Ahiama, Ura naipa Elifala, Mekera mi Hefera, Pelon mi Ahija, Karmel mi Hezroa, Ezbaia naipa Naaraia, Nathana unaipa Joela, Hagria naipa Mibhara, Amon mi Zeleka, Zeruii naipa Joaba râlthluk ichôitu Berot mi Naharaia, Jatir mi Irâ neh Gareba, Hit mi Uria, Ahlaia naipa Zabada, Siza naipa Adina (Reu(...)