Read Biete 1 RICHISUINA 12 Bible Online

1 RICHISUINA 12 - Biete bible

1 RICHISUINA 12

¹Rêng Saula kut ata zôk ranga Davida lâizâm itho a, Ziglag khuaah a om lâiah khan

²Saula chu Benjamina richia mi ni khom sela, Benjamin nama mi sipai irât, lung idet tak tak itam takkan Davida kha an hong thlop a. Anni kha voitiang neh changtianga thal kâp ithiam neh vailungdêng ithiam an nit.

³Anni chu Gibea mi Semaa naipahei Joasa neh Ahiezera hei iruaina nuaia om an nit. Kha sipaihei kha hihei hi an nit: Azmaveta naipahei Jeziela neh Peleta, Anathot kho mi Beraka neh Jehua, “Pasal sômithumkahei” an itihei lâia ṭang sipai ihâi neh inthang Gibeon mi Ismaia, Gedera mi Jeremia, Jahaziela, Johanana neh Jozabada, Harif mi Eluzaia, Jerimotha, Bealia, Semaria neh Sefatia, Kora panama mi Elkana, Isia, Azarela, Joezera neh Jasobeama, Gedor mi Jerohama naipahei Joela neh Zebadia.

⁸Gad mihei lâia mi rât ihâi, ridoi ithiam, ipho neh ifei mang ithiam ṭhenkahei kha ramchâra kulpuia Davida a om lâiah khan an va thlop a. Anni kha sakeibaknei inrît mêl an riput a, itlâng pang sarza angkana rât an nit.

⁹An dingmun zuk ridot dân chu hingkan a nit: Ezera, Obadia, Eliaba, Mismana, Jeremia, Ataia, Eliela, Johanana, Elzabada, Jeremia neh Makbanaia.

¹⁴Kha Gada richi sipai ṭhenkahei kha chu sipai sângka ruaitu an nit a, a ṭhen ruaitu chîn ualhei kha sipai rizaka ruaitu an nit.

¹⁵Kum phut, thla masatak, Jordan vadung a lian a, valong a sip ngai lâiah khan vadung kha an hong rikan a, vadung sak tiang neh thlang tiang phâia omhei kha an iûm rizûl indar chit a nit.

¹⁶Benjamin nama neh Juda nama mi ṭhenkah kha Davida omna kulpuiah an fe a.

¹⁷Davida kha anmani don rangin a fe a, “Ṭhat tiang thua ne thlop ranga ki zianga hong nin nitin chu, ki lungril takin nangni kî lôm a nit. Khannisela, ki kutin thil ṭhano îte tho mang iti ireh ṭianka ke râlhei nen man ituma hong nin nitin chu, ei pi neh puhei Pathian khan richikin, kuttum nangni tho riseh,” a ti a.

¹⁸An lâia ruaitu khatkah Amasaia kha Pathian rithla khan a zuang tôn a, hingka hin thu â sîr tâk a. Ani hi nungah chu Pasalṭha sômithumkahei lâia ruaitu a hong ichang a nit. “Jesaia naipa David, ni mihei kin nit a, Ni tianga ṭang kin nit. Nangmah neh nang ithloptuhei chungah thlangamna om riseh. Ni Pathian kha ni tianga ṭang a nit,” a ti a. Khanchu, Davida khan anni kha a lôm lût a, sipai pôl ruaituhein a siam tâk a.

¹⁹Filistiahein Saula doi ranga an rithok lâiah khan Davida khom a ṭang sa a, kha lâiah khan Manasea nama mi ṭhenkahei khom Davida tiang an hong kop a. Khannisela, Davida khan Filistiahei khom ṭangpui ual khâi mak a; an rênghei khan, “A pu Saula tiang kop zâi a ta, ei thina ka kêng chang a ti,” itin an risôn a. Khanchu, Ziglag tiang an itir kîr nôk tâk a nit.

²⁰Khante, Ziglag khua tiang a hong kîr nôk a, Manaseahei lâia sipai Davida tianga hong ikophei chu Adna, Jozabada, Jadiaela, Mikaela, Jozabada, Elihua neh Zilethaia hei an nit. Manasea richihei lâiah chu anni hi an rêngkan sipai sângka ruaitu korong an nit.

²¹Davida sipai pôl ruaitun an om a, mi rok pôlhei idoiin Davida kha an doipui tâk a, an rêngkah khan mi rât ihâi, sipai iṭha tak tak an nit.

²²Nîn tin Davida tianga ṭang rangin mi thar an hong mai a; khanchu, sipai pôl roinpui tak an hong nit tâk a.

²³PUMAPA thu angkan rêng Saula rithûla Davida kha rênga siam itum, Hebron khuaah Davida a om lâia, ridoina râlthluka rithluk sipai a zianga kophei tam zâk chu hingkan a nit.

²⁴Juda richia, ridoina râlthluka rithluk, ipho neh ifei ichôi mi sângirukka rizariatkah an nit.

²⁵Simeona richia, mi rât ihâi ridoi ithiam tak tak mi sângsarika rizakah an nit.

²⁶Levia richia rithokin mi sângilika rizarukkah an nit.

²⁷Khante, Jehoiada kha Arona richi ruaitu a nit a, a ziangah mi sângithumka rizasarikah an om sa a.

²⁸Zadoka suapui, tlangvâl rât ihâi tak tak mi sôminika inikah an om a.

²⁹Khante, Benjamina richihei lâia mi Saula chipuihei mi sângithumkah rizathumkah an nit. (Benjamina richi â tam ualhei chu Saula tianga ṭang khap mai an nit.)

³⁰Efraim richihei lâia mi, mi rât ihâi an panama miriam riming inthang mi sînginikah rizariatkah an nit.

³¹Jordan thlang tianga om Manasea nam rizâtkahei lâia mi, Davida rênga siam ranga rithlang suaka honghei kha mi sîng lei sângiriatkah an nit.

³²Isakara richihei lâia mi, ruaitu ual ual mi rizanikah neh an ṭhui ruai hei. Hi ruaituhei hin Israelhein an thil tho ngêt rang neh an tho rang zoro an iriat thap thap ngai a nit.

³³Zebuluna richihei lâia mi lungril idet, râl idoi ranga risiam diam, ridoina mangrua tinrêng imang thiam mi sîngringakah an nit.

³⁴Naftalia richihei lâia mi sipai ruaitu mi sângkah neh sipai ipho neh ifei ichôi mi sîngithumkah sângsarikah an nit.

³⁵Dana richihei lâi ata ridoi ithiam, râlthluka rithluk sa mi sînginikah sângiriatkah an nit.

³⁶Asera richihei lâia mi, râltuk buala ranga risiam ṭian mi sîngilikah an nit.

³⁷Jordan sak tianga om Reubenhei, Gadhei, Manase nam rizâtkahei lâi ata ridoina râlthluk chi tinrêng imang thiam mi nuaikah neh sînginikah an nit.

³⁸Kha sipaihei murdi kha ridoi mi râltuk buala ranga rifo ṭian an nit a, Davida kha Israelhei murdi chunga rênga siam rangin lungril khatka riputin Hebrona an hong a. Israel nam dang murdihei khomin Davida kha rênga siam rangin lungril munkah an irput riai a nit.

³⁹Davida ziangah khan sûn thumka sung an chipuihein ruai an lei înrifûk pêk kha an fâkin an in a.

⁴⁰Kha bang khah ni loiin mâr tianga om Isakar namhei, Zebulun namhei, Naftali namheia rithok khomin ibaihei, theipui lomhei, grep irâ phoi inchârhei, uainhei, riakhei kha sakuartunghei, saringseihei, sakorhei, serâtchalhei hong inpêlin mihei kha an zuang zun zun a. Ithat rang berahei neh serâtchalhei itam takkah an zuang ṭhui a. Israel ram pumpui chu lômnan a sip tâk a.