Read Biete 1 RICHISUINA 13 Bible Online

1 RICHISUINA 13 - Biete bible

1 RICHISUINA 13

¹Rêng Davida khan ruaitu murdi, sângka ruaituhei neh rizaka ruaituhei kha â sôn a.

²Khanungchu, Israel mi ribûmhei murdi ziangah khan, “PUMAPA ei Pathian lungdo a nit a, nangni khomin ṭha nin ti lam a nitin chu, Israel ram pumpuia ei mihei murdi ziangah neh khotina thiampu omhei ziangah neh Levia chi omhei ziangah mi tir ei la, hin ei zianga hong ribûm sa rangin lei fial rei u.

³Khanungchu, fêng ei ta, ei Pathian Thuthlung Bôm la va lah rei u, Saula inlal lâiah khan lak lei uksak khâi mang me a,” a ti a.

⁴Mipuihei khan kha thu khah ṭha an ti a, an rêngkan an izoi tâk a.

⁵Khanchu, Davida khan sim tiang Aigupta ramrî Sihor vadung ata Hamath kho lûtna dênin Israel mi murdihei kha Kiriath Jearim khuaa rithoka Thuthlung Bôm kha Jerusalema la lût rangin a bûm riai a.

⁶Davida neh mi murdihei kha Judai rama Baala khua, Kiriath Jearim khom an iti ngaiah khan Cherubhei chunga ṭhung PUMAPA riming chuangna Pathian Thuthlung Bôm khah ilah rangin an fe tâk a.

⁷Pathian Thuthlung Bôm kha Abinadaba in ata kha an lâk suak a, serât tâli tharah an sia a. Uza neh Ahioa khan tâli kâi serât kha an hôl a.

⁸Davida neh Israel mihei murdi khan serandahei, perkhuanghei, khuangtehei, dârribuhei, bekulhei neh lâ sakin Pathian maah an thei dôrkan an lâm a.

⁹Khante, Kidona rîzôl an hong tlungin chu, serâthei kha ritolin an pêm a, Uza khan a hang iban a, Thuthlung Bôm khah a hang man a.

¹⁰Voikazelin PUMAPA kha Uza chungah a ning a thik a, Bôm khah a tôn sikah khan a that zel tâk a. Kha munah khan Pathian maah a thi tâk a.

¹¹Khanchu, PUMAPA khan Uza chungah ningmurin a kut a tlâk sikin Davida kha a ning a thik a. Kha mun khah Perez Uza a be a; atûn tenan a lai nit mai a nit.

¹²Khanungchu, Davida khan kha nî-ah khan Pathian kha a ṭi tak tak tâk a, “Ingkan im Thuthlung Bôm kha ki ziangah chôi thei tâng ki ta?” a ti a.

¹³Khanchu, Davida khan Bôm khah Jerusalem khuaah ama ziangah khan chôi khâi mak a.

¹⁴Pathian Thuthlung Bôm kha Gath mi Obed Edoma inah khan thla thumkah a om a; khanchu, Obed Edoma insungkua neh ai nei murdihei kha PUMAPA khan ṭhat a vur a.