Read Biete 1 RICHISUINA 14 Bible Online

1 RICHISUINA 14 - Biete bible

1 RICHISUINA 14

¹Sumrivai munka tho risakna rang chungchângah Tura rêng Hirama khan Davida ziangah palâi a tir a. Rêng in sinna rang sidar thinghei a pêk a, lung isuk thiamhei, thing isin thiamhei kha rêng in isin pêk rangin a tir sa a.

²Khanchu, Davida khan PUMAPA khan a mi Israelhei sikin ani chu Israel mihei chungah rêngin a îndetin, a ram chu ai chôiinrisâng a nit iti a riat tâk a.

³Davida khan Jerusalemah nupui itam takkah a nei sa nôk a, nai nupang nai ipa khom itam takkah a nei nôk a.

⁴Jerusalema a naihei chu hihei hi an nit: Samua, Sobaba, Nathana, Solomona,

⁵Ibhara, Elisua, Elpeleta,

⁶Noga, Nefega, Jafia,

⁷Elisama, Beeliada[4] neh Elifeleta.

⁸Filistia mihei khan Davida chu Israel mi murdihei rêng rangin riak an inrithu iti an riatin, Davida man rangin Filistia sipai itam takkah an tir tâk a. Davida khan a lei riat a, anmani doi rangin arthok suak a.

⁹Filistia sipaihei kha Refaim phâi an tlung a, amakhan mihei irok an phut tâk a.

¹⁰Khante, Davida khan, “Filistia mihei idoi rangin ki hang ife rang im? Ki kutah hin annihei kha ni ne ipêk rang im?” itin PUMAPA â sôn a. PUMAPA khan Davida ziangah, “Fe roh, annihei chu ni kutah nang kî pêk rang a nit,” a ti a.

¹¹Khanchu, Davida khan annihei kha Baal Perazimah[5] a hang doi a, annihei chu â nê tâk a. “PUMAPA khan ke râlhei chu ki kut imangin tui ilian ifen angkan a ne ṭhêi indar pêk tâk,” a ti a. Khanchu, kha mun rimingah khan Baal Perazim a be a.

¹²Filistiahei kha lâizâm an tho a, an pathian rilimhei kha an mâk rak a. Davida khan thu a pêk a, an hâl riai a.

¹³Khante, sôt inote nungah kha phâi ngirah khan Filistiahei kha an hong nôk a, kha muna mihei kha an hong irok nôk a.

¹⁴Â tharin Davida khan Pathian â sôn nôk a; Pathianin a ziangah, “Hin taka tah hin chu doi no roh; khannisela, vêl inla, lingsaru kung ridîn tiang ata hang doi roh.

¹⁵Lingsaru kunglêrah kalchôi irî angkana rî suat suat ni riat tenan doi roh, Filistia mihei idoi rangin ni matonah ki zuang isuak tâk tina nîng a ti,” a ti a.

¹⁶Pathianin thu a pêk lam angkan Davida khan a tho a; khanchu, Filistia sipaihei kha Gibeon ata Gezer idênin a ûmrizûl tâk a.

¹⁷Khanchu, ram tinah Davida riming kha a hong inthang tâk a; PUMAPA sikin nam tinin an iṭi tâk a nit.