Read Biete 1 RICHISUINA 16 Bible Online

1 RICHISUINA 16 - Biete bible

1 RICHISUINA 16

¹Khante, Thuthlung Bôm kha a siana ranga Davidan ai siam puan in sungah khan an chôi lût a, an sia tâk a. Khanungchu, hâlrivâm thillanhei neh ringeina thillanhei Pathian maah khan an lan a.

²Davida khan hâlrivâm thillan neh ringeina thillanhei a lan zoiin chu, PUMAPA rimingin mipuihei kha ṭhat a vur a;

³ifah rang a sem pêk a. Israel mi murdihei kha nupang ipan an rêngkan ibai thliamkah neh sa tlinkah neh grep irâ phoi inchâr khûkah a pêk chit a.

⁴PUMAPA Thuthlung Bôm maah PUMAPA chubai ûnna iruai a, inpâkna lâ sak rangin Levia chi mi ṭhenkah kha Davida khan ân kung a.

⁵Asafa kha an ruaitu tak a nit a; a thuai zelah Zakaria iphun a nit. Jeiela, Semiramota, Jehiela, Matithia, Eliaba, Benaia, Obed Edoma neh Jeiela hei kha perkhuang neh seranda âttu rang an nit. Asafa khan dârribuhei inring takka suk rang a nit.

⁶Thiampu inikah, Benaia neh Jahaziela kha Pathian Thuthlung Bôm maa bekul itum inring mai rang a nit.

⁷Asafa neh a chipui Levia chihei kha PUMAPA inpâkna lâ sak ruaitu ranga phun masataktu chu Davida hi a nit.

⁸O, PUMAPA ziangah lômthu ril unla, Arming chu rilam rei. Nam tin tin lâiah a sinthohei hih inpuang rei.

⁹Amah chôiinrisângin lâ sak unla, amah inpâkin zâi rei. A sinrikhêl tho murdi kha ril rei.

¹⁰Arming rithiang chu roinpui sela, PUMAPA zongtuhei lungril chu lôm riseh.

¹¹PUMAPA neh a râtna kha zong unla, A ompuina chu zong mai rei.

¹²O, Pathian bôi, Jakoba richihei, Israela richi, Pathian irthlanghei, Pathian sinrikhêl thohei kha remai unla, A roirêlhei kha remai rei.

¹⁴PUMAPA chu ei Pathian a nit a, A thupêkhei chu rammual pumpui rang a nit.

¹⁵A Thuthlung kha kumkhuakan remai unla, Rikhûk sâng idêna a thu lei pêk,

¹⁶Abrahama zianga a Thuthlung neh, Isaka zianga a ṭongrikhâm kha.

¹⁷PUMAPA khan Jakoba ziangah Thuthlung a siam a, Kumkho Thuthlung rangin ân det a.

¹⁸Ani khan, “Kanan ram hi nang pêng ki ta, Ni dongtum rang ram nîng a ti,” a ti a.

¹⁹Pathian mihei kha iroichekah bang an nit a, Kanan ramah khan mikhual angkah an nit a.

²⁰Nam dang dang ziangah an fe lôr a, Ram dang dangah an ivâi a.

²¹Pathianin anni kha tutên an sirde phal mak a; Anmani ihoina rangin rênghei kha a ngo a.

²²“Ki riak inrithuhei kha tôn no unla, Ki zânthlahei innah no rei,” itin.

²³Leilung pumpui, PUMAPA inpâkin la sak unla, Nîn tin a saninringna thu ril rei.

²⁴Nam tin lâiah a roinpuizia inpuang unla, Mi tinrênghei lâiah a sinrikhêl thohei kha ril rei.

²⁵PUMAPA chu a roinpuia, natinsat takka inpâk rang a nit; Pathian murdihei nêka marit rang a nit.

²⁶Nam danghei murdi pathian chu mirmil an nit a; PUMAPA khan chu rivânhei khi ai siam a nit.

²⁷Chôiinrisângna neh roinpuinan a hual vêl a, A mun rithiang chu sinthotheina neh lômnan a sip.

²⁸Rammuala mi tinrênghei o, PUMAPA chu chôiinrisâng unla, PUMAPA râtna neh roinpuina chu inpâk rei.

²⁹PUMAPA riming roinpui chu chôiinrisâng unla, Thilpêk ichôiin a biak inah hong rei, Rithiang enhoina ribelin PUMAPA chu chubai ûn rei.

³⁰Leilung pumpui, a makungah inthing rei, Rinêng khom hi inîng thei loi rangin indetin a om a.

³¹Rivânhei o, lôm unla; O leilung, nang khom lôm roh. Nam tin lâiah khan PUMAPA chu rêng a nit iti ril rei.

³²Tuikhanglian neh a sunga om murdi hi irî vung vung sela, Mual tlâng neh a sunga om murdi hi ilôm takkan om riseh.

³³Rinêngah roiirêl ranga a zuang tenan chu, Rampui thing murdi khom PUMAPA maah khan râifânin zâi an ti.

³⁴O, PUMAPA ziangah lômthu ril rei, ani chu a ṭhat a, A lungkhamlianna chu kumkhuantluanga om a nit.

³⁵“O kin saninringna Pathian, ne saninring inla, Ner ming rithiang inpâk rang neh roinpui takka nang inpâk rangin, Nam tin lâi ata ne san isuan la, ne ṭhui bûm roh,” ti rei.

³⁶Israelhei Pathian, PUMAPA chu inpâk unla, Kumkhuantluangkan inpâk rei. Khanungchu, mipui murdi khan, “Amen,” an ti a, PUMAPA chu an inpâk a.

³⁷Rêng Davida khan PUMAPA Thuthlung Bôm an siana muna Pathian chubai ûnnaa nîn tina a nang lam angkana sin itho rangin Asafa neh a suapui Levia chihei kha a sia a.

³⁸Jeduthuna naipa Obed Edoma neh a panama mi sômirukka iriatkahei kha â thloptu rang an nit. Hosa neh Obed Edoma kha kotbâi vêngtu an nit.

³⁹Gibeon khuaa Pathian chubai ûnna muna PUMAPA chubai ûnnaa rimang rangin chu thiampu Zadoka neh a suapui thiampuhei kha ruaitua inkung an nit.

⁴⁰Israelhei zianga PUMAPA thupêk, PUMAPA Dân bua riziak murdi angkan nîn tin zîngah neh kholoiah hâlrivâm thillan kha mâichâmah an lan mai ngai rang a nit.

⁴¹Kha munah khan Hemana neh Jeduthuna khom, mi dang rithlang suakhei neh an om sa a, PUMAPA lungkhamna chu kumtluanga rang a nit sika PUMAPA inpâka lâ sak ranga rithlang bîkhei an nit.

⁴²Hemana neh Jeduthuna hei kha bekul hei, dârribuhei, neh irîhoi chi dang dang inpâkna lâ an sak ruala an imang ngaihei ikoltu an nit. Jeduthuna panama mihei chu kotbâi vêngtu rang an nit.

⁴³Khanungchu, mipui murdi kha mahni in chitah an fe tâk a, Davida khom a insungkuahei ṭhativur rangin a fe tâk a.