Read Biete 1 RICHISUINA 17 Bible Online

1 RICHISUINA 17 - Biete bible

1 RICHISUINA 17

¹Rêng Davida kha a rêng inah a om tâk a. Sûnkah chu zânthla Nathana khah a koi a, a ziangah, “Kei chu sidar thinga sin inah hin ki om a; nikhomsela, PUMAPA Thuthlung Bôm chu puan in paih nuaiah a om a,” a ti a.

²Nathana khan Davida ziangah, “Ni lungrila om angkah taka khan tho roh, Pathian ni ziangah ai om a nit,” a ti a.

³Khannisela, kha zân ngirah khan Nathana ziangah Pathian thu a zuang tlung a,

⁴“Ki suak Davida kha va ril roh, ‘PUMAPA khan, ki omna rang in isin rang kha nangmah ni mak cheh.

⁵Israela richihei Aigupta ram ata ki ṭhui isuaa rithokin atûn tenah hin Tempilah la om tlak ngai mang e. Mun khatka ata mun danga rithon maiin puan inah kêng kî om ngai a nit.

⁶Israel mihei neh ken zinna rêng rêngah khom ki mihei ienkol ranga thu kî pêk Israel ruaituhei ziangah, ithôm sidar thingin in nin ne sin pêk no la ti ngai mang e.’

⁷“Khasikin, ki suak Davida ziangah hingka hin ti roh, Tinrêngthothei PUMAPA khan hingka hin ai ti a nit, ‘Bera lêngna mun ata ni bera vêng lâi kha ki mi Israelhei chungah rêng rangin nang ki lâk suak a.

⁸Ni fena kipah ni ziangah ki om mai a, ne râldoi kha ni matonah nang ken rimang pêk thiai a. Rinêng chunga mi roinpui takhei angkan riming roinpui takin nang kî siam rang a nit.

⁹Khante, ki mi Israelhei rang mun ken kung a, rithon khâi iloia anmani dongtum bîk munah an om mai theina rangin anni chu kî phun tâk a nit. Sûn ithlenga ki mi Israelhei chunga roirêltuhei ki phun lâia mi pualoihein an nuam an ilo ngai angkah khan denginthei nôk tlak khâi no nih. Ne râlhei murdi chu nang intlôm pêk ki ta, khabanah khan richi suanpâr itam takkah nang ipe ki înkung a nit.

¹¹Khante, ni sûn a hek a, ni pi neh puhei ziangah ni fe tenan chu, ni naipahei lâia mi khatkah kha rêngin siam ki ta, a ram chu indet ki ti.

¹²Ani khan in a ne isin pêk rang a nit; a rêngṭhungmun chu kumkhuakan indet ki ti.

¹³Khanchu, a pa nîng ki ta, ani chu ki naipa nîng a ti. Ki lungkhamna Saula zianga ata kî lâk kîr angkah khan, ama ziang ata chu la kîr no ning e.

¹⁴Ki mihei neh ki ram chungah roirêltun kumkhuan phun indet ki ta; a rêngṭhungmun chu kumkhuaka indetin om a ti,’ ti roh,” a ti a.

¹⁵Pathianin thu a îril neh a îsîr pêk murdi kha Nathana khan Davida ziangah â sîr a.

¹⁶Khanungchu, rêng Davida kha Ritongna Puan-Inah a fe a, â ṭhung a, a ṭongṭai a, “O PUMAPA Pathian, tu ngân im ki nit a, ki insungkua khom hi im a nit a, hingka ten ten ni ne îruai hi?

¹⁷O Pathian kha bang khah inrup ti loiin, kha nêka thil roinpui ni ne tho pêk a, O PUMAPA Pathian, ker chi suanpârhei kum itam takka sunga an hong om rang dân ṭonginkung ni ne siam pêk a, PUMAPA Pathian mi roinpui angkan nangman ni ne ibe a nit.

¹⁸Ingân im ni ziangah hin ki la ti rang tâk a. Ni ne riat infel riai a; nikhomsela, ni suak hi ni ne chôiinrisâng tak tak a.

¹⁹O PUMAPA, ki chunga thil roinpui itho neh ki sun maton roinpuizia nen mu hi ni thiltum neh lungdo chu a nit.

²⁰PUMAPA, nangma angkana rêng rêng omak a. Kin lei hong iriat ngai angkan nangmah bang hi Pathian chu ni nit.

²¹Ni miheia siam ranga bôi ata ni hong irtlan suak Israel mihei angkana rêng rêng rammualah nam dang omak. An ta ranga thil roinpui neh thil rikhêl nî tho khan rammual pumpuiah ner ming a înthang a nit. Ni mihei chu Aigupta ata ner tlan suak a, an matonah khan nam danghei chu nen tlôm a.

²²Ni mi Israelhei chu kumkhuaka ni mihei rangin ni hong siam tâk a; nangmah PUMAPA chu an Pathian ni hong nit tâk a.

²³“Atûnah hin O PUMAPA, ni suak chungchâng thu neh a insungkuahei chungchâng thu ni îsîr kha kumkhuaka rangin indet inla, ni îsîr tâk angkah khan tho roh.

²⁴Ner ming chu inthang a ta, kumkhuakan mihei khan, ‘Tinrêngthothei Pathian chu Israelhei Pathian, Israelhei rang ngêia Pathian a nit,’ tîng an ti. Ni bôi Davida insungkuahei chu ni makungah indetin om mai riseh.

²⁵O ki Pathian, ni bôi ziangah hi thilhei hi ne sîr a, ker chihei khom la hong inlal mai an ti iti ne sîr sikah khan ni bôi hin ni ziangah ki lai ṭongṭai ngam a nit.

²⁶O PUMAPA nang chu Pathian ni nit a, hi thil roinpui tak hi ne tho pêk ni înkung a nit.

²⁷Ni suak insungkuahei kha ni makungah kumkhuaka an om mai theina rangin ṭhat ivur rangin nang kî ngên a nit. O PUMAPA, nangman ṭhat ni vur tâk a, ni ṭhatvurna chu an chungah kumkhuakan om mai riseh,” a ti a.