Read Biete 1 RICHISUINA 18 Bible Online

1 RICHISUINA 18 - Biete bible

1 RICHISUINA 18

¹Zoro sôt zanka nungah khan rêng Davida khan Filistia mihei chu a doi a, â nê a, Gath khua neh a kôlvêl khuahei kha Filistia mihei a sutpai a.

²Moabhei khom kha â nê nôk a, Moab mihei chu Davida thunuaiah an hong om a, siahei an pêk ngai a.

³Kha rizoin, Davida khan Hamath ram kôla, Suria ram hual khatkah Zoba rêng Hadadezera khom kha a doi nôk a. Hadadezera khan Eufratis vadung mâr tiang pang ram idong a tum sikin Davida khan ai doi a nit.

⁴Davida khan a tâli sângkah neh sakor chuangmi sângsarikah neh kea lôn ngai sipai sînginikah a man pêk a. Davida khan tâli rizaka kâi thei rang sakor bang kha a zua a, a dang murdi chu an ritharuipui â sat pêk a.

⁵Khante, Damaskaa Suria mihei kha rêng Hadadezera san rang sipai an tir a. Davida khan a lei doi a, mi sînginikah neh sânginikah a lei that a.

⁶Khanungchu, Davida khan Damaskaa Suria mihei ramah khan sipai a sia a. Khanchu, Suria mihei kha a thunuaia om an nit tâk a, siahei an pêk ngai a. PUMAPA khan Davida chu kil tinah nêna a pêk mai a.

⁷Davida khan Hadadezera milianhei ichôi rângkachak iphohei kha a lâk pêk a, Jerusalemah a chôi a.

⁸Khabanah, Hadadezera khopui Tibhat neh Kun ata sumsen itam takka a chôi sa a. Nungah khan khahei kha Solomona khan Tempila dâr tuipang hei, dâr chopui hei neh bûrbêl hei siamnan ai mang a nit.

⁹Hamath rêng Toia khan Zoba rêng Hadadezera sipai murdi Davidan â nê iti a lei riat a.

¹⁰Toia neh Hadadezera hi lei ridoi mai ngai an nit a, Davida khan Hadadezera kha â nê tâk sikin chibai lei ibûk rang neh ilômpui rangin a naipa Jorama kha Toia khan Davida ziangah a tir a. Jorama khan rângkachak hei, tangkarua hei neh sumsen heia siam thil itam takkah a pêk a.

¹¹Kha thilhei banah khan ram dang a înê Edom hei, Moab hei, Amon hei, Filistia hei neh Amalek hei ata ai lâk murdi tangkarua hei, rângkachak hei, sumsen hei kha rêng Davida khan Tempila mang rangin PUMAPA ziangah a lan a.

¹²Zeruii naipa Abisaia khan Ichi Phâiah Edomhei kha â nê a, mi sîng lei sângiriatkah a that a.

¹³Edom ram pumpuiah khan sipaihei a sia a; khanchu, Davida thunuaiah an hong om tâk a. PUMAPA khan Davida kha a fena kipah nêtun a siam mai a.

¹⁴Davida kha Israel pumpui chungah rêng a chang tâk a; a mi murdihei chungah khan ifel takkan roi a rêl a.

¹⁵Zeruii naipa Joaba kha sipai ruaitu lûtak a nit a, Ahiluda naipa Jehosafata kha thurchi riziaktu a nit.

¹⁶Ahituba naipa Zadoka neh Abiathara naipa Ahimeleka kha thiampu an nit a; Seraia kha ziaktu a nit.

¹⁷Jehoiada naipa Benaia kha Davida vêngtuhei ruaitu a nit a; rêng Davida naipahei khom ram chunga dingmun risâng tak tak itu an nit.