Read Biete 1 RICHISUINA 19 Bible Online

1 RICHISUINA 19 - Biete bible

1 RICHISUINA 19

¹Zoro sôt zanka nungah khan Amonhei rêng Nahasa kha a thi a, a naipa Hanuna kha arthûlin a hong inlal a.

²Rêng Davida khan, “A pa khan lung a lei inkham ngai sikin kei khomin Nahasa naipa Hanuna chu lung inkham ki ti,” a ti a. Khanchu, Davida khan a pa chungchânga lungngam isak rangin mihei a tir a. Khante, Davida mihei kha Amonhei ram an tlung a, lungngam isak rangin Hanuna ziangah an va lêng a.

³Nikhomsela, Amon milianhei khan Hanuna ziangah, “Davida hin ni pa a marit sikin lungngam nang isak rang ni ziangah a zuk itir nî sôn mani? Ei ram hi an lâk theina ranga a mihei hi ram enthlâttu ranga ni ziangah a zuang itir an nit,” an ti a.

⁴Khanungchu, Hanuna khan Davida mihei kha a man a, an rikhamul a voi inkol pêk a, an silbomhei kha a lâi takah an pinbul rikhû phâk chakkan a tan pêk a, a tir kîr nôk tâk a.

⁵An lei tho dân kha Davida ril rangin mi an tir a, anmani chu an izak tak tak a, in tianga kîr nôk a, rêng zianga fe khom an îzak a nit. Kha thu khah Davida khan a lei riatin chu, “Nin rikhamul a môngsei mâkah chu Jeriko khuaah om hi unla, khanungah khan la hong ta rei,” itin he archa a.

⁶Rêng Hanuna neh Amon mihei khan Davida theimâk an hong nit tâk iti an riatin chu Mesopotamia rama mihei, Suria rama Maaka neh Zoba mihei kha sakor tâli neh sakor chungchuang mihei iruaina rangin tangkarua her sîngithumkah neh sângilikah an pêk a.

⁷Tâli sîngithumkah sânginikah an ṭhui a, khahei neh khan Maaka rêng sipaihei kha an zuang a, Medeba kôlah ṭangmun an khuar a. Amon mihei khom an khopui murdi ata ridoi rangin an hong rithok suak a.

⁸Kha thu khah Davida khan a lei riatin chu Joaba neh a sipai ihâi murdihei kha a tir suak a.

⁹Amon mihei kha an hong rithok a, an rêng omna khopui Raba kotsuaah khan ṭangmun an khuar a; anmani san ranga rênghei neh an sipaihei kha chu a ranin phûlah ṭangmun an khuar a.

¹⁰Joaba khan an maton tiang neh an inung tiang an hong idoi rang a nit iti a riat a, Israel sipaihei lâia â ṭha ṭha arthlang suak a, Suria rama rithoka hong sipaihei lei idoi rangin a lei inrizar a.

¹¹Sipai dang murdi kha ân zirpuipa Abisaia ruaina nuaiah a sia a, Amonhei idoi rangin an rizar a.

¹²Joaba khan Abisaia ziangah, “Suria ram sipaihei ke nê no rangin chu nangman ne san ni ta; Amon mihei ne nê no rangin chu keiman nang hong san ki ti.

¹³Ihâi tak neh irât takkan om rei. Ei mihei neh ei Pathian khopuihei isanin lei pânsal rei u. PUMAPA khan ṭha a ti lam angkah takin itho ni riseh,” a ti a.

¹⁴Joaba neh a mihei khan ridoina mun tianga Suria mihei kha an va nâi a, Suria mihei kha lâizâm an tho tâk a.

¹⁵Amon mihei khan Suria mihei lâizâm an tho iti an riatin chu anni khom kha Abisaia matona rithokin lâizâm an tho a, an khopuiah an lût tâk a. Khanungchu, Joaba kha Jerusalemah a kîr nôk tâk a.

¹⁶Khante, Suria mihei khan Israelhei makungah an chan a siat tâk iti an riatin chu mi an tir a, Eufratis vadung râl tianga Suriahei kha an koi a, Zoba rêng Hadadezera sipai ruaitu Sobaka ruaina nuaiah khan an rithok suak a.

¹⁷Kha thu khah Davidan a lei riatin chu Israel sipaihei murdi a koibûm a, Jordan dung an rikan a, Suriahei idoi rangin an rizar a. Davida sipaihei kha an hang rizar zoin chu Suriahei khah an hang doi tâk a.

¹⁸Suria mihei kha Israelhei maah khan lâizâm an tho tâk a. Davida neh a mihei khan Suria mi, sakor tâli chunga chuang mi sângsarikah neh kea lôn sipai sîngilikah an that a. Suria sipai ruaitu Sobaka khom an that sa tâk a.

¹⁹Hadadezera nuaia rênghei khan Israelhei maah an chan a siat tâk iti an riatin chu Davida neh ringeina an siam a; khanchu, a thunuaia om an hong nit tâk a. Suria mihei khom khan Amonhei kha san nuam khâi mak a.