Read Biete 1 RICHISUINA 20 Bible Online

1 RICHISUINA 20 - Biete bible

1 RICHISUINA 20

¹Khante, kum a hong thar a, kholum hong riphut tiang rênghei ridoi ranga an suak ngai zoro a hong tlung a. Joaban sipai a ṭhui a, Amonhei ram kha a va rûn a. Rêng Davida chu Jerusalemah a la om a. Raba khua kha an hual a, an doi a, an isiat chit tâk a.

²Amonhei pathian rilim Milkoma lukhum kha rângkachak her sômithumkailika rik a nit a. Amakhan lungilu a kop sa a. Davida khan kha lungilu khah a lâk a, ama rênglukhumah â khop a; khopuia rithokin thil itam takkah râllâk thilin a lâk sa a.

³Kha khopuia mihei khah a ṭhui a, thing-âtna hei, âlkâina thîr rizum hei, reipui hei imangin sin ân tho a. Khangkah khan Amonhei khopui murdiheia mihei kha Davida khan a tho a. Khanungchu, Davida neh a mihei murdi kha Jerusalemah an kîr nôk tâk a.

⁴Kha rizoiah khan Filistia mihei neh Gezeraah khan an ridoi nôk a. Kha zoroah khan Husa mi Sibekaia khan Filistia mi lâia milian richi Sifaia a that a, Filistiahei chu inen an iom tâk a nit.

⁵Filistia mihei neh ridoina a om nôk a, Jaira naipa Elhana khan Goliatha unaipa Lahmia, Gath kho mi kha a that a; kha mi feingul lian dân kha pheirâi tiaka lian a nit.

⁶Gath khuaah ridoina a om nôk a, amakhan milian khatkah, kutṭim iruk rukka seng seng, keṭim khom iruk rukka seng seng inei, a rêngkan sôminikailika nei hi a om a, ani khom kha milian richia zuang inzir a nit.

⁷Ani khan Israel mihei a va sarai a, Davida ulianpa Sama naipa Jonathana khan a lei that a.

⁸Davida neh a mihein an ithat tâk, kha pasal ithumkahei khah Gath khuaa mi lian richia zuang inzir an nit.