Read Biete 1 RICHISUINA 21 Bible Online

1 RICHISUINA 21 - Biete bible

1 RICHISUINA 21

¹Khante, Soitana khan Israelhei chungah siatna thlun a nuam a; khanchu, Davida kha Israelhei tep nuamna ân nei a.

²Davida khan Joaba neh a milianhei ziangah, “Israel ram pumpuiah fe unla, Beerseba ata Dan idênin Israel mihei tep rei. A tam zâk kî riat nuam a nit,” a ti a.

³Joaba khan a sâm a, “PUMAPA khan Israel mihei hi a bâk rizakan inpung riseh. Rêngpa epu, an rêngkan ni mihei korong an nit. Îtho rang im hi thil hih itho a, Israelhei thiamno inchang nî nuam?” a ti a.

⁴Khannisela, rêng thu khan Joaba â nê tâk a. Khanchu, Joaba kha a suak a, Israel ram pumpui khah arfang suak a; khanungchu, Jerusalemah a hong kîr nôk a.

⁵Joaba khan miriam om zâk kha Davida â ril a. Israel ram pumpuiah khandai ilek thei murdi chu dâpkah neh nuaikah an nit a; Judai rama khandai ilek thei murdi chu nuaiilikah neh sîngsarikah an nit.

⁶Levia namhei neh Benjamin namhei chu ai tep sa no a nit; Rêng thupêk khah Joaba theimâk lam tak a nit sikin.

⁷Khante, kha thilah khan Pathian lôm khâi mak a; khanchu, Israelhei kha kuttum a tho tâk a.

⁸Davida khan Pathian ziangah, “Hi ki thil lei thoah hin ki însual tak tak a nit tâk; nikhomsela, ni suak siatna hi lungkhamin ne ngaidam roh. Invêt takkan sin ki lei itho tâk a nit,” a ti a.

⁹Khanungchu, PUMAPA khan Davida zânthla Gada ziangah,

¹⁰“Fen la, Davida ziangah, ‘Thil ithumkah rithlang rang nang kî pêk a nit, ni chungah ki tho rangin khatka khôk tak rithlang ta roh, PUMAPA khan a ti,’ ti roh,” a ti a.

¹¹Gada kha Davida ziangah a fe a, a ziangah, “PUMAPA khan hingkan a ti, ‘A îtak hîm nî nuam rithlang roh;

¹²Kum ithumka ṭâmpui itla hîm? A nit nole irâlhei ata thla thumka sung lâizâm itho hîm? A nit nole sûn thumka sung ripui ni ram sunga lênga, PUMAPA vântirtônin Israel ram pumpuia mi khandaia a înrimang hîm?’ a ti. PUMAPA ne tirtu kha ingkam ki sâm rang, ringaituan la, ne ril roh tho,” a ti a.

¹³Davida khan Gada ziangah, “Ke lung a dong tak tak. Nikhomsela, miriamhei kutah khan chu nen tuang tlak no riseh. A lungkhamna a lian sikin PUMAPA kuta tuang rangin ribei ki ti,” a ti a.

¹⁴Khanchu, PUMAPA khan Israelhei lâiah khan ripui ân lêng tâk a, mi sîngsarikah an thi a.

¹⁵Khanungchu, PUMAPA khan Jerusalem khua iseh rangin a vântirtôn a tir a; khannisela, â siat rangto a khan PUMAPA khan a lungril a thleng a, vântirtôn ziangah khan, “Ân rup tâk, ni kut ilek khâi no roh,” a ti a. PUMAPA vântirtôn kha Jebus mi Arauna rîzôl kôlah khan â ding a.

¹⁶Davida khah a hang tang a, PUMAPA vântirtôn, khandai ithuat saia Jerusalem tiang itina, rinêng neh rivân kâra ding a mu a. Khanungchu, Davida neh mipui ruaituhei khan borapuan an sil koronga, rinêngah lingisikin an ibok tâk a.

¹⁷Davida kha a ṭongṭai a, “O Pathian, thilisual ithotu chu keimah hih ki nit; riteppui itho ranga thu petu chu keimah hih ki nit; hi mipuihei, thil îte lei tho nohei hin thil isual îte nei mak e. O PUMAPA ki Pathian, keimah neh ki insungkuahei chungah ni kut tlâk inla, ni mihei hi chu hi rî hih tuang khâi no riseh,” a ti a.

¹⁸PUMAPA vântirtôn khan Gada ziangah, “Davida chu Jebus mi Arauna rîzôlah PUMAPA ta ranga mâichâm isiam rangin iril roh,” a ti a.

¹⁹Davida khan PUMAPA thupêk kha a zôm a, Gadan â ril lam angkan a fe tâk a.

²⁰Rîzôlah khan Arauna neh a naipa pasal ilikahei khan bu an lei chîl lâi tak a nit a, vântirtôn kha an mun chu a naipa pasal ilikahei kha an ribîk a.

²¹Araunan Davida a ziang tianga hong a mun chu a rîzôl ata a hong suak a, a mâia rinêng isikin Davida makungah khan â bok a.

²²Khanchu, Davida khan Arauna ziangah, “Mipuihei lâia ripui arkiang theina ranga PUMAPA ta ranga mâichâm ki siamna rangin hi ni rîzôl hih ne peh roh. A man chu itluk thapkan nang pêng ki ti,” a ti a.

²³Arauna khan Davida ziangah, “Dong zel roh, Rêngpa epu, ni lungdo angkah takin tho roh. Hih hâlrivâma lan rang serâtchal hei, thinga tua rang rîzôl mangrua hei, ibaidi thillan rang buhei khom ai om a nit. An rêngkan nang kî pêk riai a nit,” a ti a.

²⁴Khannisela, rêng Davida khan Arauna ziangah, “Khangkan ni mak e, a man chu itluk thapkan nang pêng ki ti. PUMAPA zianga thillan rangin ni ta îte â tlongin lah no ning; â tlonga kî mu îte hâlrivâm thillan khomin lan no ning e,” a ti a.

²⁵Khanungchu, Davida khan Arauna kha rîzôl manin rângkachak tangka rizarukkah a pêk tâk a.

²⁶Kha munah khan Davidan PUMAPA rang mâichâm a siam tâk a, hâlrivâm thillanhei neh ringeina thillanhei a lan a, PUMAPA chu â sam a. Khante, PUMAPA khan ani chu a zuk sâm a, mâichâma hâlrivâm thillan kha rivâna rithoka meiin a zuang kâng tâk a.

²⁷PUMAPA khan vântirtôn khah a khandai kha a koka thun nôk rangin thu a pêk a, a thupêk angkan a tho tâk a.

²⁸PUMAPA khan a ṭongṭaina a zuang sâm iti Davida khan a riat a, Arauna rîzôlah khan ribôlna thillan a lan mai tâk a.

²⁹Kha lâiah khan Ritongna Puan-In neh hâlrivâm thillana mâichâm Mosian ramchâra ai siam kha Gibeon khuaah Pathian chubai ûnna munah khan a om mai a.

³⁰Nikhomsela, Davida khan PUMAPA vântirtôn khandai a ṭi sikin Pathian isôn rangin kha munah khan ai fe ngam ino a nit.