Read Biete 1 RICHISUINA 22 Bible Online

1 RICHISUINA 22 - Biete bible

1 RICHISUINA 22

¹Khanchu, Davida khan, “Hi munah hin PUMAPA, Pathian Tempil omna rang chu a nit. Hi mâichâm hih Israelhein hâlrivâm thillan an lanna ngai rang mâichâm chu a nit hi te,” a ti a.

²Rêng Davida khan Israel rama nam dang iomhei kha hong ribûm rangin thu a pêk a, anni kha sin ân tho a. A ṭhenhei khan Tempil sinna rang lung an suk a.

³A kotbâia mang rang perek hei, â khopna (Kopza) hei siamna rang thîr itam takka neh sumsen itam takka, var zoi zât ino Davida khan a pêk a, ân icher a.

⁴Sidon mi neh Tura mihein sidar thing itam takka zuang ipeh rangin a ti a.

⁵Davida khan a lungrilin, “Ki naipa Solomonan Tempil a sin rang kha roinpui tak, rammuala roinpui inthang tak a nit rang a nit. Khannisela, ani lak a la naiinpangin, îte riatna inthûk la nei ino a nit a; khasikin, lei inrifûk pêk diam ki ti,” a ti a. Khanchu, Davida khan a thi ma ngêiin in neh rua itam takkah a lei înrifûk diam a nit.

⁶Khanchu, a naipa Solomona a koi a, PUMAPA Israelhei Pathian rang Tempil isin rangin â ril a.

⁷Davida khan a naipa Solomona ziangah, “PUMAPA ki Pathian riminga in isin chu ki nuam tak tak a.

⁸Khannisela, PUMAPA khan, ‘Nang chu thisen ne sua natinsat ok a, ridoi lak ni uar tak tak a, rinêng chungah hin ki mitmuah thisen ne sua natinsat sikin ker ming rang in sin no tin e.

⁹Ringai roh, naipa Solomona la nei ni ta, ani chu ringeina nuam mi nîng a ta, arming ringeina iti ai nit angkan a vêla â râlhei ata râlringam takkan in om ki ti, ân lal sungin Israel ram chu râlringam neh thlangam takkan om an ti.

¹⁰Ani khan ki In rang chu sin a ta, ani chu ki naipa nîng a ta, keimah a pa nîng ki ti. Khante, Israelhei chungah a rêngṭhungmun chu kumkhuaka rangin indet ki ti,’ itin PUMAPA thu ki ziangah a zuang itlung a nit.

¹¹“Khasikin, ki naipa, PUMAPA chu ni ziangah om sela, thluantlung mai inla, ni chungchâng thu a lei iril tâk angkah khan PUMAPA ni Pathian In rang chu sin roh.

¹²PUMAPA dân angkah taka Israelhei chungah roi ni rêl theina rangin vârna hei, riatna hei chu PUMAPA ni Pathianin nang peh riseh.

¹³Israelhei ranga PUMAPA thupêkhei neh dânhei, Mosia zianga ai pêk murdi kha ni zômin chu thluantlung mai ni ti. Irât takkan om inla, ihâi takkan om roh; ṭi non la, indôp no roh.

¹⁴PUMAPA In sinna rang rângkachak talent nuaikah neh tangkarua talent dâpkah ki lei inrifûk thei tâk a. Khabanah khan dâr neh thîrhei khom var zoi zât ino, itam takka ai om a nit. Thing neh lung khom ki lei înrifûk diam tâk a nit. Khannisela, khahei banah khan la lah sa chu ai nang rang a nit.

¹⁵Sinthotu rang ni nei intam a; thing âttu hei, lungsuktu hei banah sin tinrêng isin thei kutithiam,

¹⁶rângkachak hei, tangkarua hei, dârhei neh thîrhei tianga siam thiam mi itam takkah an iom a nit. Atûnah hin sin chu phut zel roh, PUMAPA chu ni ziangah om riseh,” a ti a.

¹⁷Davida khan Israel lupuihei murdi kha a naipa Solomona san rangin thu a pêk a.

¹⁸“PUMAPA nin Pathian kha nin ziangah a om a, kil tinah râlringam takkan nangni a în-om a nit. Hi rama lei iom mihei kha PUMAPA khan ki kutah a hong lan tâk a, an ram chu nin thunuaia om a nit tâk a.

¹⁹Atûnah hin nin lungril neh nin ringna murdin PUMAPA nin Pathian sin chu tho rei. PUMAPA Thuthlung Bôm neh Pathian Ina mangrua rithianghei kha nin sia lût theina rangin PUMAPA In kha sin phut zel ta rei,” a ti a.