Read Biete 1 RICHISUINA 23 Bible Online

1 RICHISUINA 23 - Biete bible

1 RICHISUINA 23

¹Davida kha a hong ûnliana a hong tar ok tâk a. A naipa Solomona kha Israelhei rêngin a phun tâk a.

²Rêng Davida khan Israel lupuihei, thiampuhei neh Levia chihei murdi kha a koi bûm a.

³Levia chihei kha kum sômithumka ten chungtiang kha a tep riai a, an rêngkan mi sîngithumkah sângiriatkah an nit.

⁴Khahei lâia mi sînginikah sângilikah kha PUMAPA In isintuhei ruaitu rangin a phun a; sângirukkahei kha thurchi lei riziak infel neh thubuaihei rêl infeltu rangin a phun a;

⁵mi sângilikah kha kotbâi vêngtu rangin a sia a; mi sângilika danghei kha Pathian inpâknaa mang rang piala rêng Davidan ai pêk irîhoi mangruahei ngêi imanga Pathian inpâktu ranghein ai phun a nit.

⁶Davida khan Levia chihei kha an panam rui risui dân angkan pôl ithumkan a siam a, Gersona pôlhei, Kohatha pôlhei, Meraria pôlhei an nit.

⁷Gersona khan naiipa inikah: Ladana neh Simeia a nei a.

⁸Ladana khan naiipa ithumkah: Jehiela, Zethama neh Joela hei a nei a,

⁹Annihei kha Ladana richi zuang risui panam lupuihei chu an nit. Simeia khan naiipa ithumkah: Selemota, Haziela neh Harana hei a nei a.

¹⁰Simeia naiipa ilikah a ûnlian indônin hihei hih an nit: Jahata, Zina, Jeusa, Beria hei an nit. Jeusa neh Beria hin nai nei intam mak a; khasikin, panam rui khatka tep an nit.

¹²Kohatha nai pasal ilikahei chu Amrama, Izhara, Hebrona, Uziela hei an nit.

¹³Amrama hih Arona neh Mosia hei pa a nit. Arona kha amah neh archihei kha kumkhuaka ranga thilrithiang takhei ienkol a, kumkhuaka PUMAPA makunga namhoi ihâl a, a sin itho a, ama riminga mihei ṭhativurtu ranga inran an nit.

¹⁴Khannisela, Pathian mi Mosia richihei kha chu Levia richihei lâia tep an nit.

¹⁵Mosia naipahei chu Gersoma neh Eliezera an nit.

¹⁶Gersoma richihei lâia a lupui tak chu Sebuela a nit.

¹⁷Eliezera khan nai pasal khatkah Rehabia bang kha a nei a; khanniseh, Rehabia khan chu nai itam takkah ai nei a nit.

¹⁸Kohatha naipa â nikna Izhara khan naiipa khatkah Selomita a nei a, ani kha panam lupui a nit a.

¹⁹Kohatha naiipa â thumna Hebrona khan nai pasal ilikah Jeria, Amaria, Jehaziela neh Jekameama hei a nei a.

²⁰Kohatha naipa â lina Uziela khan nai pasal inikah Mika neh Isia ai nei a nit.

²¹Meraria khan naipa inikah Mahlia neh Musia a nei a. Mahlia naihei chu Eleazara neh Kisa hei an nit.

²²Eleazara khan nai ipa nei loiin nai nupanghei bang ineiin a thi a. A nai nupanghei khan an suapui Kisa naipahei kha pasalin an inei a nit.

²³Meraria naipa â nikna Musia khan nai pasal ithumkah Mahlia, Edera neh Jeremota hei ai nei a nit.

²⁴Khahei kha an panam neh an insungkua angkah chita tepa an riming riziak Levia richihei chu an nit; kum sôminika ten ata chungtianga mihei kha chu PUMAPA In sinnaah khan sintum an inei seng a nit.

²⁵Davida khan, “PUMAPA Israelhei Pathian khan a mihei chu râlringam takkan ân om tâk a; amah khom Jerusalemah khan ai om mai rang tâk a nit a.

²⁶Khasikin, Levia chihei khom hin Ritongna Puan-In neh ribôlna ranga tinmatuahei murdi hi an rizôn nang khâi no nih,” a ti a.

²⁷Davida thupêk nungkhôn tak dung izuiin Levia richihei kha kum sôminikah an nit tenan chu sin itho rangin an riming riziak riai a nit.

²⁸Hingkan sintum inkot an nit: Arona richi thiampuhei Pathian chubai ûnnaa san hei, Tempil kot tual neh chontan ienkol hei, bûrbêl rithiang murdi vong inrithiang hei;

²⁹Pathian ziangah ibai thillan rang isiam hei, ibaidi thillan rang baidi siam hei, chol pol ino bairiam thillan rang isiam hei, bêla ibai iur manih izêi manih inrifûk hei, ibaidi oliv riak neh inripol hei, Tempila thillan lei ilaa lei ivar neh lei rikhî infel hei;

³⁰zîng tin neh kholoi tina PUMAPA roinpuina inpâka zâi hei hi a nit.

³¹Sabatnî hei, thla thar ruaiṭhe nî hei, neh kût nikhuaheia PUMAPA ziangah hâlrivâm thillan an lan lâia inpâk lâ lei isak ranghei a nit. A zoro ṭum khatka kipa hi sin itho rang inkunga om Levihei tam rang dân zâk chu ifel takka dan isiam a nit. Levihei kha PUMAPA chubai ûnnaa sin kha inkol mai an nit.

³²Ritongna Puan-In ienkol, Tempil ienkol neh PUMAPA Ina sinthonaa an suapui Arona richi thiampuhei iṭangpui kha an sintum a nit.