Read Biete 1 RICHISUINA 24 Bible Online

1 RICHISUINA 24 - Biete bible

1 RICHISUINA 24

¹Hihei hih Arona richihei pôl ṭhen dân chu a nit. Arona khan nai pasal ilikah Nadaba, Abihua, Eleazara neh Ithamara hei a nei a.

²Nadaba neh Abihu kha chu an pa nêkan an thi masa a, nai nei mak a; khasikin, an inzirpuihei Eleazara neh Ithamara kha thiampu an hong ichang tâk a nit.

³Rêng Davida khan Arona richihei kha an sintum dung izuiin a pôl pôlin a ṭhen a. Eleazara naipa Zadoka neh Ithamara naipa Ahimeleka khan Davida kha hi pôl ṭhennaah hin an ṭangpui a.

⁴Eleazara richiah khan insungkua lupui rang an tam ual sikin Eleazara richihei kha pôl sômleiirukkan iṭhen an nit a; Ithamara richihei kha chu pôl iriatka ṭhen an nit.

⁵Eleazara richia mi neh Ithamara richia mihei lâia Tempila ruaitu neh Pathian sinthonaa ruaitu an om seng seng sikin thlasânin an sintum chit rang kha inkot a nit.

⁶Eleazara richihei neh Ithamara richihei khan rithlâk liangkan thla an sân a. Khanungchu, khahei kha Nathanela naipa Semaia, Levihei ziaktu khan a lei riziak tap a. Rêng neh a milianhei, thiampu Zadoka hei, Abiathara naipa Ahimeleka hei, thiampu insungkua lupui hei neh Levia richi insungkua lupui hei murdi kha riatpuituhei an nit.

⁷Pôl sôminika ilikahei khan hingkana ridot dânah hin an sintum chit an tho rang a nit: 1) Jehoiariba pôl; 2) Jedaia pôl; 3) Harima pôl; 4) Seorima pôl; 5) Malkija pôl; 6) Mijamina pôl; 7) Hakoza pôl; 8) Abija pôl; 9) Jesua pôl; 10) Sekania pôl; 11) Eliasiba pôl; 12) Jakima pôl; 13) Hupa pôl; 14) Jesebeaba pôl; 15) Bilga pôl; 16) Imera pôl; 17) Hezira pôl; 18) Hapizeza pôl; 19) Pethahia pôl; 20) Jehezkela pôl; 21) Jakina pôl; 22) Gamula pôl; 23) Delaia pôl; 24) Maazia pôl.

¹⁹PUMAPA, Israelhei Pathian thupêk angkana an bulpui Aronan tho tum a lei inkung lama Tempilah ife a, an sintum chit kha itho ranga hi mihei hih an riming riziak an nit.

²⁰Hihei hi Levia richihei lâia insungkua lupui danghei chu an nit: Amrama richihei lâia mi Sobuela richi Jedaia;

²¹Rehabia richihei lâiah Isia;

²²Izara richihei lâia mi Selomita richi Jahata;

²³Hebrona naipahei an kum ridot dânin Jeria, Amaria, Jehaziela neh Jekameama hei an nit.

²⁴Uziela richihei lâia mi Mika richi Samira;

²⁵Uziela richihei lâia mi Mika unaipa Isia richi Zakaria hei.

²⁶Meraria richihei kha Mahlia, Musia neh Jaazia hei an nit a.

²⁷Jaazia khan nai pasal ithumkah Sohama, Zakura neh Ibria a nei a.

²⁸Mahlia khan nai pasal inikah Eleazara neh Kisa a nei a. Eleazara khan nai ipa nei mak a, Kisa khan nai pasal khatkah Jerameela ai nei a nit.

³⁰Musia khan nai pasal ithumkah Mahlia, Edera neh Jeremota ai nei a nit. Khahei murdi kha Levia richihei lâia insungkuahei chu an nit.

³¹Anni khom khan an suapui Arona richia thiampuhei tho lam angkah khan insungkua ulian tak neh a unaihei lâia khatkah khan Levia chihei lâia sinthotu rang riatnan thlasânin an en ngai a. Rêng Davida hei, Zadoka hei, Ahimeleka hei neh thiampu insungkua lupuihei neh Levia chihei insungkua lupuihei kha riatpuitu an nit.