Read Biete 1 RICHISUINA 27 Bible Online

1 RICHISUINA 27 - Biete bible

1 RICHISUINA 27

¹Hihei hi Israelhei insungkua lupuihei, panam ruaituhei neh an milianhei rêng rama sin rêlbôltuhei chu an nit. Kumka sungah thla tina rithleng thiai maiin pôl tina mi sînginika sângilikah chitin sipai ruaitu nuaiah thlaka sung sin an itho ngai a nit.

²Hihei hih thla tina sin itho pôl mi sînginikah sângilikahei irui ngai sipai ruaituhei chu an nit: Thla khatna: Zabdiela naipa Jasobeama, ani hi Juda nam Pereza panama mi a nit. Thla nikna: Ahohia richia mi Dodaia; Miklotha kha a thuai zela ruaitu a nit. Thla thumna: Thiampu Jehoiada naipa Benaia; ani hih “Pasalṭha Sômithumkahei” ruaitu a nit. A naipa Amizabada khan hi pôl ruaitu nitna a hong ithûl a nit. Thla lina: Joaba unaipa Asahela; a naipa Zebadia khan a hong ithûl a nit. Thla ringana: Izhara richia mi Samhutha. Thla rukna: Tekoa mi Ikesa naipa Irâ. Thla sarina: Efraim richi Pelon mi Heleza. Thla riatna: Husa mi Sibekaia, ani hi Juda nam Zera panam mi a nit. Thla kuakna: Benjamina namhei rama Anathot mi Abiezera. Thla sômna: Netofa mi Maharaia, ani hih Zera panama mi a nit. Thla sômleikhatna: Efraim namhei rama Pirathon mi Benaia. Thla sômleiinikna: Netofa mi Heldaia, ani hi Othniela richia mi a nit.

¹⁶Hihei hi Israel namhei rirêlbôlnaa ruaituhei chu an nit. Reuben namhei rêlbôltu kha Zikria naipa Eliezera a nit a. Simeon namhei rêlbôltu kha Maaka naipa Sefatia a nit a. Levi namhei rêlbôltu kha Kemuela naipa Hasabia a nit a. Aron namhei rêlbôltu kha Zadoka a nit a. Juda namhei rêlbôltu kha rêng Davida unaihei lâia mi Elihua a nit a. Isakar namhei rêlbôltu kha Mikaela naipa Omria a nit a. Zebulun namhei rêlbôltu kha Obadia naipa Ismaia a nit a. Naftali namhei rêlbôltu kha Azriela naipa Jeremota a nit a. Efraim namhei rêlbôltu kha Azazia naipa Hosea a nit a. Thlang Manase namhei rêlbôltu kha Pedaia naipa Joela a nit a. Sak Manase namhei rêlbôltu kha Zakaria naipa Idoa a nit a. Benjamin namhei rêlbôltu kha Abnera naipa Jaasiela a nit a. Dan namhei rêlbôltu kha Jerohama naipa Azarela a nit a.

²³Israelhei chu rivâna ârsi zâka khin lân pung a ti iti PUMAPA khan a lei isîr tâk sikin rêng Davida khan kum sôminika ten nuaitianga mi kha chu tep mak a.

²⁴Zeruii naipa Joaba khan ritepna kha a nei a; khanniseh, ritepna kha zoi mak e. Ritepna sikin Israelhei chungah PUMAPA ningthikna a zuang tlung tâk a; khasikin, rêng Davida inlal lâi thurchi riziakna Bu-ah a zon riziak ai nit khâi ino a nit.

²⁵Hihei hih rêng sum neh puan enkolnaa rimanghei chu an nit: Rêng richon siana chontanhei kha Adiela naipa Azmaveta khan a enkol a. Kho dang danga rêng dongtum siana inhei kha Uzia naipa Jonathana khan a enkol a. Rêng loia loima sinhei kha Keluba naipa Ezria khan a enkol a. Rêng grep rikulhei kha Rama mi Simeia khan a enkol a. Uain siabûmna kha Sefam mi Zabdia khan a enkol a. Thlang tiang phâia rêng oliv thing neh theipui rikulhei kha Geder mi Baal Hanana khan a enkol a. Oliv riak siabûmna kha Joasa khan a enkol a. Saron phâia rêng ran rualhei kha Saron mi Sirtaia khan a enkol a. Phâi dang danga ran rualhei kha Adlaia naipa Safata khan a enkol a. Saringseihei kha Ismael mi Obila khan a enkol a. Sakuartunghei kha Meronot mi Jehdeia khan a enkol a. Kêl neh berahei kha Hagri mi Jaziza khan ai enkol a nit.

³²Davida pangâk, Jonathana, roisak ithiam neh lekha thiam tak a nit a. Amah neh Hakmonia naipa Jehiela kha rêng naipahei inriseitu an nit.

³³Ahithofela kha rêng roisakpuitu a nit a; Arki mi Husaia kha rêng malpa neh roiinrifûkpuitu a nit.

³⁴Ahithofela thi nungah khan Benaia naipa Jehoiada neh Abiathara kha rêng roisakpuitu an hong chang tâk a. Rêng sipaihei ruaitu chu Joaba a nit.